ସରକାରୀ କାର୍ଯ୍ୟକ୍ରମରେ ଜନପ୍ରତିନିଧିଙ୍କୁ ଅବହେଳା ଅଭିଯୋଗ, ହଙ୍ଗାମା କଲେ ସମର୍ଥକ...

ସରକାରୀ କାର୍ଯ୍ୟକ୍ରମରେ ଜନପ୍ରତିନିଧିଙ୍କୁ ଅବହେଳା ଅଭିଯୋଗ କରି ସମର୍ଥକଙ୍କ ହଙ୍ଗାମା । ଗତକାଲି ବଲାଙ୍ଗିର ଜିଲ୍ଲାର ୧୪ଟି ବ୍ଲକ୍‌ରେ ଅନୁଷ୍ଠିତ ହୋଇଥିଲା ‘ଆମ ଓଡିଶା ନବୀନ ଓଡିଶା’ କାର୍ଯ୍ୟକ୍ରମ ।

ସରକାରୀ କାର୍ଯ୍ୟକ୍ରମ ହୋଇଥିବାରୁ, ଏହି କାର୍ଯ୍ୟକ୍ରମରେ ନିର୍ବାଚିତ ପ୍ରତିନିଧିମାନଙ୍କୁ ଡକାଯିବ କଥା । କିନ୍ତୁ ବଲାଙ୍ଗିର ବିଧାୟକ ନରସିଂହ ମିଶ୍ରଙ୍କୁ ଡକାଯାଇନଥିବା ଅଭିଯୋଗ କରି ଦେଓଗାଁ ଠାରେ ହଙ୍ଗାମା କରିଥିଲେ କିଛି ସମର୍ଥକ ।

ସୂଚନା ଅନୁସାରେ, କଂଗ୍ରେସ ସମର୍ଥିତ ସମିତିସଭ୍ୟ ଓ ସରପଞ୍ଚମାନେ ଉପ-ଜିଲ୍ଲାପାଳ ଓ ଦେଓଗାଁ BDOଙ୍କ ସହିତ ଯୁକ୍ତିତର୍କ କରିଥିଲେ । କ’ଣ ପାଇଁ ବିଧାୟକ ଓ ସାଂସଦଙ୍କୁ ଡକାଯାଇନାହିଁ ବୋଲି ପ୍ରଶ୍ନ କରିଥିଲେ । ଯୁକ୍ତିତର୍କ ପରେ କାର୍ଯ୍ୟକ୍ରମକୁ ବର୍ଜନ କରି ଚାଲିଯାଇଥିଲେ । ଏହି ସମୟରେ ବିଜେଡି ନେତା ତଥା ହାଉସିଂ ବୋର୍ଡ ଅଧ୍ୟକ୍ଷ କଳିକେଶ ନାରାୟଣ ସିଂହଦେଓ ନିକଟରେ ଉପସ୍ଥିତ ଥିଲେ ।

ଖବର ଲେଖାଯିବା ସୁଦ୍ଧା ଏନେଇ ସ୍ଥାନୀୟ ପ୍ରଶାସନର ପ୍ରତିକ୍ରିୟା ମିଳିପାରିନି । ତେବେ ଏହି ଭିଡିଓ ଆଜି ଭାଇରାଲ୍‌ ହେବା ପରେ ସରକାରୀ କାର୍ଯ୍ୟକ୍ରମରେ ରାଜନୀତିକରଣକୁ  ନେଇ ଚର୍ଚ୍ଚା ଜୋର ଧରିଛି ।