ମୁଖିଆ ହିସାବରେ ମୁଖ୍ୟମନ୍ତ୍ରୀ ଦାୟୀ : ଆକ୍ରମଣ ପରେ ନବୀନଙ୍କ ଉପରେ ବର୍ଷିଲେ ଭୁବନେଶ୍ୱର ସାଂସଦ

ଭୁବନେଶ୍ୱର : ମୁଁ ଜଣେ ମହିଳା ସାଂସଦ, ମୁଁ ସୁରକ୍ଷିତ ନୁହେଁ । ରାଜଧାନରୀ ରାସ୍ତାରେ ଆକ୍ରମଣ ପରେ ନିଜକୁ ଅସୁରକ୍ଷିତ ମଣିଲେ ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ । ଜଣେ ମହିଳା ସାଂସଦ ଭାବେ ସୁରକ୍ଷିତ ନୁହଁନ୍ତି ବୋଲି କହିଛନ୍ତି । ଏହାସହ ତାଙ୍କୁ ସୁରକ୍ଷା ଯୋଗାଇ ଦେବାକୁ ସେ ଦାବି କରିଛନ୍ତି । ସମସ୍ତ ଘଟଣା ପାଇଁ ଘରର ମୁରବୀ ଭାବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଦାୟୀ କରିଛନ୍ତି । କୌଣସି ବ୍ୟକ୍ତିଗତ ଆକ୍ଷେପ ନକରି ଆସନ୍ତା ୨୪ ଘଣ୍ଟା ଭିତରେ ଘଟଣାରେ ସଂପୃକ୍ତ ବ୍ୟକ୍ତି ବିଶେଷଙ୍କୁ ଗିରଫ ଲାଗି ଦାବି କରିଛନ୍ତି ଅପରାଜିତା । ଏହାଛଡ଼ା ଏ ଘଟଣା ସେ ସଂସଦରେ ଉପସ୍ଥାପନ କରିବେ ବୋଲି କହିଛନ୍ତି ।

ରାଜ୍ୟରେ ସୃଷ୍ଟି ହେଉଥିବା ଗୁଣ୍ଡାଗର୍ଦ୍ଦି, ଅରାଜକତା, ଅଶାନ୍ତି ସମ୍ପର୍କରେ ନବୀନ ବାବୁ ଅବଗତ କି ନାହିଁ ବୋଲି ପ୍ରଶ୍ନ କରିଛନ୍ତି । ରାଜଧାନୀରେ ମୁଖ୍ୟମନ୍ତ୍ରୀଙ୍କ ଘର ଠାରୁ ମୋ ଘର ଦୁଇ କିଲୋମିଟର । ରାଜଧାନୀରେ ମୋତେ ଆକ୍ରମଣ ହୋଇଥିବା କଥା ସେ ଜାଣିଛନ୍ତି ତ ?ଯଦି ଜାଣି ନାହାନ୍ତି ତେବେ ରାଜ୍ୟର ଜନତା ଓ ମହିଳାଙ୍କ ପାଇଁ ଏହା ବଡ଼ ଦୁର୍ଭାଗ୍ୟ । ରାଜ୍ୟରେ ମହିଳାଙ୍କ ପ୍ରତି ନିର୍ଯାତନା ବଢ଼ିବାରେ ଲାଗିଛି । ଏନସିଆରବି ରିପୋର୍ଟ ଅନୁସାରେ ମହିଳାଙ୍କ ପ୍ରତି ନିର୍ଯାତନା କ୍ଷେତ୍ରରେ ଓଡ଼ିଶା ଦ୍ୱିତୀୟ ସ୍ଥାନରେ ରହିଛି । ହେଲେ ରାଜ୍ୟ ସରକାର ଏଭଳି ଘଟଣାକୁ ପ୍ରୋତ୍ସାହନ ଦେଇ ଓଡ଼ିଶାକୁ ୧ ନମ୍ବର କରିବା ଲାଗି ପ୍ରୟାସ ଜାରି ରଖିଥିବା ସେ କହିଛନ୍ତି । ଓଡ଼ିଶାରେ ଏବେ ପଶ୍ଚିମବଙ୍ଗ ପଥ ଅନୁସରଣ କରୁଛି କି ବୋଲି ସେ ପ୍ରଶ୍ନ କରିଛନ୍ତି ।

ରାଜ୍ୟରେ ମହିଳା ସୁରକ୍ଷିତ ନୁହଁନ୍ତି ବୋଲି କୁହାଯାଉଛି । ଆଜି ଅସୁରକ୍ଷିତ ରାଜଧାନୀରେ ଭୁବନେଶ୍ୱରର ସାଂସଦ ହୋଇ ବି ତାଙ୍କ ଉପରେ ଆକ୍ରମଣ ହୋଇଥିବା ଅପରାଜିତା କହିଛନ୍ତି । ଗତକାଲି ରାତିରେ ଭୁବନେଶ୍ୱର ଆଚାର୍ଯ୍ୟ ବିହାରରେ ଆୟୋଜିତ କାର୍ଯ୍ୟକ୍ରମରେ ତାଙ୍କ ଉପରେ ହୋଇଥିବା ଆକ୍ରମଣ ନେଇ ସେ ରାଜ୍ୟ ସରକାରଙ୍କୁ ଟାର୍ଗେଟ କରିଛନ୍ତି । ମହିଳା ସାଂସଦ ହୋଇଥିବାରୁ ରାଜ୍ୟ ସରକାର ତାଙ୍କୁ କାମ କରାଇବାକୁ ଦେଉନାହାନ୍ତି ।

ଏପରିକି ସେ ଯାଉଥିବା କାର୍ଯ୍ୟକ୍ରମକୁ ଭଣ୍ଡୁର କରିବା ଲାଗି ଉଦ୍ୟମ ହେଉଥିବା ସେ କହିଛନ୍ତି । ଆଚାର୍ଯ୍ୟ ବିହାର କାର୍ଯ୍ୟକ୍ରମର ଆୟୋଜକଙ୍କୁ ଧମକ ଦିଆଯାଇଥିଲା ।  କେବଳ ଏତିକି ନୁହେଁ ଏହି କାର୍ଯ୍ୟକ୍ରମକୁ ତାଙ୍କୁ ନିମନ୍ତ୍ରଣ ନ କରିବାକୁ ଆୟୋଜକଙ୍କ ଉପରେ ଚାପ ପକାଯାଇଥିଲା ।  ବୈଠକ ସମୟରେ ବାହାରେ କିଛି ଲୋକ ହୋହାଲ୍ଲା କରିଥିଲେ ।  ବିରୋଧ ଓ ସମର୍ଥନକୁ ସ୍ୱାଗତ କରେ ବୋଲି ସେ କହିଛନ୍ତି । ହେଲେ ପ୍ରତ୍ୟେକ ବିରୋଧକୁ ଶାଳୀନତାର ସହ କରାଯିବା ଆବଶ୍ୟକ  । ମୋତେ ସୁରକ୍ଷା ଦେବା ରାଜ୍ୟ ସରକାରଙ୍କର କାର୍ଯ୍ୟ । ଗତକାଲିର ଘଟଣା ନେଇ ପୋଲିସ ପ୍ରଶାସନକୁ ଅବଗତ କରିଛି ବୋଲି କହିଛନ୍ତି ଅପରାଜିତା ।