ପୁଣି ସରକାରଙ୍କ ଉପରେ ବର୍ଷିଲେ ଅପରାଜିତା: କହିଲେ ଏବେବି ୪୨ ଲକ୍ଷ ପରିବାର ଋଣରେ

ରାଜ୍ୟ ସରକାରଙ୍କୁ ଟାର୍ଗେଟ କଲେ ସାସଂଦ ଅପରାଜିତା ଷଡ଼ଙ୍ଗୀ । କୋଣାର୍କ ଜମିଜମା ସମସ୍ୟା ଓ ସ୍ୱାସ୍ଥ୍ୟସେବା ନେଇ ଅପରାଜିତା ରାଜ୍ୟ ସରକାରଙ୍କ ଉପରେ ବର୍ଷିଛନ୍ତି । କୋଣାର୍କ ସୁରକ୍ଷା ପରିଷଦ ପକ୍ଷରୁ ଶାମୁକା ପଡିଆରେ ଆୟୋଜିତ ଏକ ବିଶାଳ ଜନ ସମାବେଶରେ ଯୋଗ ଦେଇ ସେ ଏହା କହିଛନ୍ତି ।

ଏହାସହ ଦୀର୍ଘ ୨୨ ବର୍ଷ ଧରି ବିଜେଡି ଶାସନକ୍ଷମତାରେ ଥିବା ସତ୍ତ୍ୱେ ରାଜ୍ୟରୁ ଗରିବୀ ହଟିନଥିବା ସେ ଅଭିଯୋଗ କରିଛନ୍ତି । ସେ ଆହୁରି ମଧ୍ୟ କହିଛନ୍ତି ଯେ, ରାଜ୍ୟରେ ୧ କୋଟି ୩୫ଲକ୍ଷ ଲୋକେ ଗରିବ ଅଛନ୍ତି । ସେଥିମଧ୍ୟରୁ ୪୨ଲକ୍ଷ ପରିବାର ଋଣ ବୋଝରେ ବୁଡ଼ି ରହିଛନ୍ତି । କେବଳ ଏତିକି ନୁହେଁ କୋଣାର୍କ ତଥା ନିମାପଡା ଓ କାକଟପୁର ଅଞ୍ଚଳର ବିଭିନ୍ନ ସମସ୍ୟା ସମ୍ପର୍କରେ ରାଜ୍ୟ ସରକାର ଓ କେନ୍ଦ୍ର ସରକାରଙ୍କ ନିକଟରେ ଦାବି ଉପସ୍ଥାପନ କରିବେ ବୋଲି ମଧ୍ୟ ସେ କହିଛନ୍ତି ।

ଏନେଇ ସେ କହିଛନ୍ତି ଯେ, ‘ଗୋଟିଏ ରାଜନୈତିକ ଦଳ ଦୀର୍ଘ ୨୨ବର୍ଷ ହେବ ଶାସନକ୍ଷମତାରେ ଅଛି । ହେଲେ କୋଣାର୍କରେ ସମସ୍ତଙ୍କ ପାଖରେ ପଟ୍ଟା ହେବା ଆବଶ୍ୟକ ହେଲେ ସେମାନଙ୍କ ପାଖରେ ନାହିଁ । ଏଇଥିପାଇଁ ଲୋକେ ସରକାରୀ ସୁବାଧା-ସୁଯୋଗ ପାଇବାରୁ ବଞ୍ଚିତ ହେଉଛନ୍ତି । ଯାହା ଏଠାକାର ସବୁଠୁ ବଡ଼ ବିଷୟବସ୍ତୁ ’ ।