ଚଳିତ ବର୍ଷ ଜୁନ୍ ମାସରେ ୱେଷ୍ଟଇଣ୍ଡିଜ୍ ଓ ଆମେରିକାରେ ହେବାକୁ ଥିବା ଆଇସିସି ପୁରୁଷ ଟି-୨୦ ବିଶ୍ୱକପ୍ ପାଇଁ ଭାରତୀୟ ଟିମ୍ରେ କେଉଁମାନଙ୍କୁ ସାମିଲ କରାଯିବ? କେମିତି ହେବ ଟିମ୍ର ରୂପରେଖ? ଏହାକୁ ନେଇ ଏବେ ଜୋର୍ସୋର୍ରେ ଚର୍ଚ୍ଚା ଚାଲିଛି।
ଆନ୍ତର୍ଜାତିକ କ୍ରିକେଟ୍ ପରିଷଦ ଟିମ୍ ଘୋଷଣା କରିବାର ଡେଡ୍ଲାଇନ୍ ମେ’ ୧ ରଖିଛି । ଭାରତୀୟ କ୍ରିକେଟ୍ ନିୟନ୍ତ୍ରଣ ବୋର୍ଡର ଚୟନ କମିଟି ଏପ୍ରିଲ୍ ଶେଷ ସୁଦ୍ଧା ବୈଠକ କରି ଟିମ୍ ଘୋଷଣା କରିପାରେ । ଟି-୨୦ ଆନ୍ତର୍ଜାତିକ ଛଡ଼ା ଇଣ୍ଡିଆନ୍ ପ୍ରିମିଅର୍ ଲିଗ୍ (ଆଇପିଏଲ୍)ର ଚଳିତ ସିଜନ୍ ମଧ୍ୟ ବିଶ୍ୱକପ୍ ପାଇଁ ଚୟନର ମାପକାଠି ହୋଇଥିବାରୁ ଦାବିଦାରଙ୍କ ସଂଖ୍ୟା ବଢ଼ୁଛି।
ଅଧିକ ପଢ଼ନ୍ତୁ: ଟି-୨୦ ବିଶ୍ୱକପ୍: ଖୁବଶୀଘ୍ର ହେବ ଟିମ୍ ଘୋଷଣା, ଏହି ୧୫ ଖେଳାଳିଙ୍କୁ ମିଳିପାରେ ସୁଯୋଗ...
ଟି-୨୦ ବିଶ୍ୱକପ୍ରେ ରୋହିତ ଶର୍ମା ଭାରତୀୟ ଟିମ୍ର ଅଧିନାୟକତ୍ୱ କରିବେ । ପୂର୍ବରୁ ଏହାର ଘୋଷଣା ସରିଛି । ଗତ ବର୍ଷ ଦିନିକିଆ ବିଶ୍ୱକପ୍ରେ ଟିମ୍ ଇଣ୍ଡିଆକୁ ଫାଇନାଲ୍ ଯାଏଁ ନେଇଥିବା ରୋହିତଙ୍କୁ ଏହି ଗୁରୁଦାୟିତ୍ୱ ମିଳିବାର ଯଥାର୍ଥତା ରହିଛି। ଏହାଛଡ଼ା, ସୀମିତ ଓଭର୍ କ୍ରିକେଟ୍ରେ ସେ ଜଣେ ଧୂଆଁଦାର ବ୍ୟାଟର୍ । ଆଇପିଏଲ୍ରେ ମୁମ୍ବାଇ ଇଣ୍ଡିଆନ୍ସ ତାଙ୍କ ନେତୃତ୍ୱରେ ପାଞ୍ଚ ଥର ଚାମ୍ପିଅନ୍ ହୋଇଛି।
Also Read
ଚଳିତ ଆଇପିଏଲ୍ରେ ବି ରୋହିତ ଦମ୍ଦାର ପ୍ରଦର୍ଶନ କରୁଛନ୍ତି । ଏପ୍ରିଲ୍ ୧୮ ସୁଦ୍ଧା ସେ ସାତ ଇନିଂସ୍ ଖେଳି ୪୯.୫ ଆଭରେଜ୍ ଓ ୧୬୪.୦୮ ଷ୍ଟ୍ରାଇକ୍ ରେଟ୍ରେ ୨୯୭ ରନ୍ ସଂଗ୍ରହ କରିଛନ୍ତି । ଏଥିରେ ଗୋଟିଏ ଶତକ ରହିଛି ।
ରୋହିତଙ୍କ ସହିତ ଆଉ ଯେଉଁମାନେ ଟି-୨୦ ବିଶ୍ୱକପ୍ ଟିମ୍ରେ ସ୍ଥାନ ପାଇବେ, ସେମାନଙ୍କ ମଧ୍ୟରୁ ଅଧିକାଂଶଙ୍କ ନାମ ଆପାତତଃ ସ୍ପଷ୍ଟ ହୋଇଗଲାଣି । ଟିମ୍ରେ ବିଶେଷଜ୍ଞ ବ୍ୟାଟର୍ଙ୍କ ମଧ୍ୟରେ ପୂର୍ବତନ ଅଧିନାୟକ ବିରାଟ କୋହଲି ଓ ଟି-୨୦ ମାନ୍ୟତାରେ ବିଶ୍ୱର ନଂ.୧ ସୂର୍ଯ୍ୟକୁମାର ଯାଦବ ସାମିଲ ହେବା ପ୍ରାୟତଃ ନିଶ୍ଚିତ।
ବିରାଟ ଚଳିତ ଆଇପିଏଲ୍ରେ ଏ ଯାବତ (ଏପ୍ରିଲ୍ ୧୮ ସୁଦ୍ଧା) ସର୍ବାଧିକ ୩୬୧ ରନ୍ କରିଛନ୍ତି । ସେ ରୟାଲ୍ ଚାଲେଞ୍ଜର୍ସ ବାଙ୍ଗାଲୋର ପକ୍ଷରୁ ସାତ ଇନିଂସ୍ ଖେଳି ୭୨.୨୦ ଆଭରେଜ୍ ଓ ୧୪୭.୩୪ ଷ୍ଟ୍ରାଇକ୍ ରେଟ୍ରେ ସ୍କୋର୍ କରିଛନ୍ତି, ଯେଉଁଥିରେ ଗୋଟିଏ ଶତକ ରହିଛି ।
ସୂର୍ଯ୍ୟକୁମାର ଆଘାତରୁ ସୁସ୍ଥ ହୋଇ ବିଳମ୍ବରେ ମୁମ୍ବାଇ ଇଣ୍ଡିଆନ୍ସରେ ଯୋଗ ଦେଇଥିଲେ । ସେ ଚାରି ଇନିଂସ୍ ଖେଳି ୩୨.୫୦ ଆଭରେଜ୍ ଓ ୧୭୧.୦୫ ଷ୍ଟ୍ରାଇକ୍ ରେଟ୍ରେ ୧୩୦ ରନ୍ କରିଛନ୍ତି । ଟି-୨୦ କ୍ରିକେଟ୍ରେ ସେ ଜଣେ ବଡ଼ ଖେଳାଳି । ଫିଟ୍ ରହିବା ସ୍ଥଳେ ତାଙ୍କ ଚୟନ ନେଇ ସନ୍ଦେହ ନାହିଁ।
ରୋହିତଙ୍କ ସହ କିଏ ଓପନିଂ କରିବେ, ତାହା କୌତୂହଳର ବିଷୟ । ପୂର୍ବରୁ ଦୌଡ଼ରେ ଋତୁରାଜ ଗାଏକୱାଡ଼, ଶୁବମନ ଗିଲ୍ ଓ ଯଶସ୍ୱୀ ଜୟସ୍ୱାଲ ଥିଲେ; ଏବେ ଏଥିରେ ବିରାଟଙ୍କ ନାଁ ଯୋଡ଼ି ହୋଇଛି।
ନୂଆ ଚର୍ଚ୍ଚା ଅନୁଯାୟୀ, ଆଇପିଏଲ୍ରେ କିଛି ସିଜନ୍ ଧରି ବାଙ୍ଗାଲୋର ଟିମ୍ ପକ୍ଷରୁ ଇନିଂସ୍ ଓପନ୍ କରୁଥିବା ବିରାଟଙ୍କୁ ଟି-୨୦ ବିଶ୍ୱକପ୍ରେ ଓପନର୍ ଭାବେ ଖେଳାଇବା ପାଇଁ ବିଚାର କରାଯାଉଛି। କିନ୍ତୁ ଏହାର ସମ୍ଭାବନା ଉଜ୍ଜ୍ୱଳ ନୁହେଁ ।
ପାଞ୍ଚ ବିଶେଷଜ୍ଞ ବ୍ୟାଟର୍ ରହିବା ସ୍ଥଳେ ରୋହିତ, ବିରାଟ ଓ ସୂର୍ଯ୍ୟକୁମାରଙ୍କ ଛଡ଼ା ଋତୁରାଜ, ଶୁବମନ, ଯଶସ୍ୱୀ ଓ ରିଙ୍କୁ ସିଂହ (ଫିନିଶର୍ ଭୂମିକା ପାଇଁ)ଙ୍କ ମଧ୍ୟରୁ ଆଉ ଦୁଇ ଜଣ ସ୍ଥାନ ପାଇବେ । ଯଦି ବ୍ୟାଟିଂ ସାମର୍ଥ୍ୟକୁ ଅଧିକ ମଜଭୁତ କରିବା କଥା ଚିନ୍ତା କରାଯାଏ, ତା’ହେଲେ ରିଙ୍କୁ ବାଦ୍ ପଡ଼ିବେ ଏବଂ ଅନ୍ୟ ତିନି ଜଣଙ୍କ ମଧ୍ୟରୁ ଦୁଇ ଜଣଙ୍କୁ ସୁଯୋଗ ଦିଆଯିବ । ଏମିତି ହେଲେ, ଅଧିକ ଓପନିଂ ବିକଳ୍ପ ରହିବ।
ଚଳିତ ଆଇପିଏଲ୍ରେ ଗୁଜରାଟ ଟାଇଟନ୍ସର ଅଧିନାୟକ ଶୁବମନ ଏ ଯାବତ (ଏପ୍ରିଲ୍ ୧୮ ସୁଦ୍ଧା) ସାତ ଇନିଂସ୍ ଖେଳି ୪୩.୮୩ ଆଭରେଜ୍ ଓ ୧୫୧.୧୪ ଷ୍ଟ୍ରାଇକ୍ ରେଟ୍ରେ ୨୬୩ ରନ୍ କରିଥିବା ବେଳେ ଚେନ୍ନାଇ ସୁପର୍ କିଙ୍ଗ୍ସର ଅଧିନାୟକ ଋତୁରାଜ ଛଅ ଇନିଂସ୍ ଖେଳି ୪୪.୮୦ ଆଭରେଜ୍ ଓ ୧୩୦.୨୩ ଷ୍ଟ୍ରାଇକ୍ ରେଟ୍ରେ ୨୨୪ ରନ୍ କରିଛନ୍ତି।
କିନ୍ତୁ ଯଶସ୍ୱୀ ଏ ଯାଏଁ ଖାସ୍ ପ୍ରଦର୍ଶନ କରିପାରି ନାହାନ୍ତି । ସେ ରାଜସ୍ଥାନ ରୟାଲ୍ସ ପକ୍ଷରୁ ସାତ ଇନିଂସ୍ ଖେଳି ୧୭.୨୯ ଆଭରେଜ୍ ଓ ୧୪୫.୭୮ ଷ୍ଟ୍ରାଇକ୍ ରେଟ୍ରେ ମାତ୍ର ୧୨୧ ରନ୍ କରିଛନ୍ତି । କିନ୍ତୁ ଆନ୍ତର୍ଜାତିକ କ୍ରିକେଟ୍ରେ ସେ ବହୁତ ପ୍ରଭାବିତ କରିଛନ୍ତି । ଏହାଛଡ଼ା ସେ ଜଣେ ବାମହାତି ବ୍ୟାଟର୍ । ଚୟନ ବେଳେ ଏ ସବୁକୁ ବିଚାରକୁ ନିଆଯିବ।
ମଧ୍ୟକ୍ରମରେ କୋଲକାତା ନାଇଟ୍ ରାଇଡର୍ସର ଅଧିନାୟକ ଶ୍ରେୟାସ ଆୟର (ଛଅ ଇନିଂସ୍ରୁ ୧୪୦ ରନ୍) ସ୍ଥାନ ପାଇବାର ସମ୍ଭାବନା କ୍ଷୀଣ । ଚଳିତ ଆଇପିଏଲ୍ରେ ରାଜସ୍ଥାନ ରୟାଲ୍ସ ପକ୍ଷରୁ ଖେଳି ପ୍ରଭାବିତ କରିଥିବା ବ୍ୟାଟର୍ ରିୟାନ ପରାଗ (ସାତ ଇନିଂସ୍ରୁ ୩୧୮ ରନ୍) ଟି-୨୦ ବିଶ୍ୱକପ୍ ଟିମ୍ରେ ସ୍ଥାନ ପାଇବା କଷ୍ଟ । ଚୟନକାରୀମାନେ ସମ୍ପୂର୍ଣ୍ଣ ନୂଆ ଖେଳାଳିଙ୍କୁ ସୁଯୋଗ ଦେଇ ରିସ୍କ ନେବାକୁ ଚାହିଁବେନି।
ଟିମ୍ରେ ତିନି ଜଣ ଅଲ୍ରାଉଣ୍ଡର୍ ହାର୍ଦ୍ଦିକ ପାଣ୍ଡ୍ୟା, ରବୀନ୍ଦ୍ର ଜାଡ଼େଜାଙ୍କ ସହ ଶିବମ୍ ଦୁବେ (ଛଅ ଇନିଂସ୍ରୁ ୨୪୨ ରନ୍) ସାମିଲ ହୋଇପାରନ୍ତି । ଶିବମ୍ ନିଜ ପ୍ରତିଭା ଓ ଆଇପିଏଲ୍ ପ୍ରଦର୍ଶନ ଏବଂ ବିଶେଷକରି ଜଣେ ପେସ୍ ବୋଲିଂ ଅଲ୍ରାଉଣ୍ଡର୍ ହୋଇଥିବା ଦୃଷ୍ଟିରୁ ଟିମ୍ରେ ସୁଯୋଗ ପାଇପାରନ୍ତି।
ଚଳିତ ଆଇପିଏଲ୍ ସିଜନ୍ରେ ମୁମ୍ବାଇ ଇଣ୍ଡିଆନ୍ସର ଅଧିନାୟକ ତଥା ଅଲ୍ରାଉଣ୍ଡର୍ ହାର୍ଦ୍ଦିକ ପାଣ୍ଡ୍ୟା ଆଶାନୁରୂପ ପ୍ରଦର୍ଶନ କରିପାରୁ ନାହାନ୍ତି । ଦୁଇ ବର୍ଷ ପୂର୍ବରୁ ଗୁଜରାଟ ଟାଇଟନ୍ସ ଭଳି ନୂଆ ଟିମ୍କୁ ଚାମ୍ପିଅନ୍ କରାଇଥିବା ଏହି ଖେଳାଳିଙ୍କୁ ନେଇ ଏବେ ପ୍ରଶ୍ନ ଉଠୁଛି।
ଚଳିତ ଆଇପିଏଲ୍ ସିଜନ୍ରେ ହାର୍ଦ୍ଦିକ ବ୍ୟାଟିଂରେ ଏ ଯାବତ (ଏପ୍ରିଲ୍ ୧୮ ସୁଦ୍ଧା) ସାତ ଇନିଂସ୍ ଖେଳି ୨୩.୫୦ ଆଭରେଜ୍ ଓ ୧୪୬.୮୭ ଷ୍ଟ୍ରାଇକ୍ ରେଟ୍ରେ ମାତ୍ର ୧୪୧ ରନ୍ କରିଛନ୍ତି । ସେ ସବୁ ମ୍ୟାଚ୍ରେ ବୋଲିଂ କରୁ ନାହାନ୍ତି । ସେ ଏ ଯାଏଁ ପାଞ୍ଚ ମ୍ୟାଚ୍ରେ ୧୫ ଓଭର୍ ବୋଲିଂ କରି ୪ ୱିକେଟ୍ ନେଇଛନ୍ତି । ଜାଡ଼େଜାଙ୍କ ପ୍ରଦର୍ଶନ ମଧ୍ୟ ପ୍ରଭାବଶାଳୀ ହୋଇପାରି ନାହିଁ। କିନ୍ତୁ ହାର୍ଦ୍ଦିକ ଓ ଜାଡ଼େଜା ଆନ୍ତର୍ଜାତିକ ପ୍ରଦର୍ଶନ ଓ ଟିମ୍ର ଆବଶ୍ୟକତା ଦୃଷ୍ଟିରୁ ସ୍ଥାନ ପାଇବେ । ସେଠାରେ ସେମାନଙ୍କ ଆଇପିଏଲ୍ ପ୍ରଦର୍ଶନ ଅଧିକ ଗୁରୁତ୍ୱ ରଖି ନ ପାରେ।
ୱିକେଟ୍କିପର୍ ଭାବେ ଆଘାତରୁ ସୁସ୍ଥ ହୋଇ ପ୍ରାୟ ୧୫ ମାସ ପରେ ଆଇପିଏଲ୍ ଜରିଆରେ କ୍ରିକେଟ୍କୁ ଫେରିଥିବା ରିଷଭ ପନ୍ତ ଓ ସଞ୍ଜୁ ସାମ୍ସନ୍ ସ୍ଥାନ ପାଇପାରନ୍ତି । ଦୌଡ଼ରେ ଦିନେଶ କାର୍ତ୍ତିକ ବି ରହିଛନ୍ତି । କିନ୍ତୁ ଦୁଇ ଜଣ ଟିମ୍ରେ ସ୍ଥାନ ପାଇବେ । ଲୋକେଶ ରାହୁଲ, ଈଶାନ କିଶନ, ଜିତେଶ ଶର୍ମା ଓ ଧ୍ରୁବ ଜୁରେଲ୍ ଦୌଡ଼ରେ ନାହାନ୍ତି।
ଚଳିତ ଆଇପିଏଲ୍ରେ ରାଜସ୍ଥାନର ଅଧିନାୟକ ସଞ୍ଜୁ ଏ ଯାବତ (ଏପ୍ରିଲ୍ ୧୮ ସୁଦ୍ଧା) ସାତ ଇନିଂସ୍ ଖେଳି ୫୫.୨୦ ଆଭରେଜ୍ ଓ ୧୫୫.୦୫ ଷ୍ଟ୍ରାଇକ୍ ରେଟ୍ରେ ୨୭୬ ରନ୍ କରିଛନ୍ତି । ଅନ୍ୟପଟେ, ଦିଲ୍ଲୀ କ୍ୟାପିଟାଲ୍ସର ଅଧିନାୟକ ରିଷଭ ଉଭୟ ବ୍ୟାଟିଂ ଓ ୱିକେଟ୍କିପିଂରେ ପ୍ରଭାବିତ କରିଛନ୍ତି । ସେ ଏ ଯାବତ ସାତ ଇନିଂସ୍ ଖେଳି ୩୫ ଆଭରେଜ୍ ଓ ୧୫୬.୭୧ ଷ୍ଟ୍ରାଇକ୍ ରେଟ୍ରେ ୨୧୦ ରନ୍ କରିଛନ୍ତି।
ଅନ୍ୟପଟେ, ବାଙ୍ଗାଲୋର ଟିମ୍ର କାର୍ତ୍ତିକ ଅଦ୍ୟାବଧି ଛଅ ଇନିଂସ୍ ଖେଳି ୭୫.୩୩ ଆଭରେଜ୍ରେ ୨୨୬ ରନ୍ କରିଛନ୍ତି, ଯେଉଁଥିରେ ତାଙ୍କ ଷ୍ଟ୍ରାଇକ୍ ରେଟ୍ ୨୦୦ରୁ ଅଧିକ ରହିଛି । କ୍ୟାରିଅର୍ର ଅନ୍ତିମ ପର୍ଯ୍ୟାୟରେ ପହଞ୍ଚିଥିବା ଡିକେ ଟିମ୍ରେ ସାମିଲ ହେଲେ, ରିଙ୍କୁଙ୍କୁ ସୁଯୋଗ ଦିଆ ନ ଯିବା ସ୍ଥଳେ ଫିନିଶର୍ ଭୂମିକା ବି ତୁଲାଇ ପାରିବେ । ଏହାଛଡ଼ା, ବିଶେଷଜ୍ଞ ସ୍ପିନର୍ ଭାବେ ଦୁଇ ଜଣ ଓ ବିଶେଷଜ୍ଞ ପେସର୍ ଭାବେ ତିନି ଜଣ ଖେଳାଳି ଟି-୨୦ ବିଶ୍ୱକପ୍ ଟିମ୍ରେ ସ୍ଥାନ ପାଇପାରନ୍ତି।
ସ୍ପିନର୍ଙ୍କ ମଧ୍ୟରେ ଲେଗ୍ ସ୍ପିନର୍ ଯୁଜବେନ୍ଦ୍ର ଚହଲ ଓ ବାମହାତି ରିଷ୍ଟ ସ୍ପିନର୍ କୁଲଦୀପ ଯାଦବ ରହିବା ନିଶ୍ଚିତ । ଚହଲ ଟି-୨୦ ଆନ୍ତର୍ଜାତିକରେ ଭାରତ ପକ୍ଷରୁ ସର୍ବାଧିକ ୯୬ ୱିକେଟ୍ ନେଇଛନ୍ତି । ଅନ୍ୟପଟେ, ଏବେ ସବୁ ଫର୍ମାଟ୍ ଲାଗି କୁଲଦୀପ ଟିମ୍ ପାଇଁ ଜରୁରୀ ହୋଇଯାଇଛନ୍ତି । ଚଳିତ ଆଇପିଏଲ୍ରେ ଚହଲ ଏ ଯାବତ (ଏପ୍ରିଲ୍ ୧୮ ସୁଦ୍ଧା) ରାଜସ୍ଥାନ ରୟାଲ୍ସ ପକ୍ଷରୁ ସାତ ମ୍ୟାଚ୍ ଖେଳି ୧୨ ୱିକେଟ୍ ନେଇଥିବା ବେଳେ ଦିଲ୍ଲୀ କ୍ୟାପିଟାଲ୍ସର କୁଲଦୀପ ଚାରି ମ୍ୟାଚ୍ରୁ ଛଅ ୱିକେଟ୍ ପାଇଛନ୍ତି।
ପେସର୍ଙ୍କ ମଧ୍ୟରେ ଯଶପ୍ରୀତ ବୁମ୍ରା (ସାତ ମ୍ୟାଚ୍ରୁ ୧୩ ୱିକେଟ୍) ଓ ବାମହାତି ଅର୍ଶଦୀପ ସିଂହ (ସାତ ମ୍ୟାଚ୍ରୁ ନଅ ୱିକେଟ୍)ଙ୍କ ସ୍ଥାନ ସୁରକ୍ଷିତ। ମହମ୍ମଦ ଶାମୀ ନାହାନ୍ତି, ତେଣୁ ମହମ୍ମଦ ସିରାଜ ତୃତୀୟ ପେସର୍ ହୋଇପାରନ୍ତି । ଆନ୍ତର୍ଜାତିକ ପ୍ରଦର୍ଶନକୁ ବିଚାରରେ ରଖାଯାଇ ସିରାଜଙ୍କ ଚୟନ ହୋଇପାରେ। ଏହାଛଡ଼ା ମୁକେଶ କୁମାର ଓ ଚଳିତ ଆଇପିଏଲ୍ର ଦ୍ରୁତତମ ବୋଲର୍ ମୟଙ୍କ ଯାଦବ (ଆନ୍ତର୍ଜାତିକ ମ୍ୟାଚ୍ ଖେଳି ନାହାନ୍ତି) ମଧ୍ୟ ଦୌଡ଼ରେ ଅଛନ୍ତି ।
ଟି-୨୦ ବିଶ୍ୱକପ୍ ପାଇଁ ସର୍ବଶ୍ରେଷ୍ଠ ଟିମ୍ ବାଛିବା ଚୟନ କମିଟି ଲାଗି ଏତେ ସହଜ ହେବ ନାହିଁ । ଟିମ୍ ଚୟନ ବେଳେ ଚୟନକାରୀମାନେ ଏ କଥାକୁ ବି ଧ୍ୟାନରେ ରଖିବେ ଯେ ଭାରତ ୧୭ ବର୍ଷ ଧରି ଏହି ଟ୍ରଫି ଜିତିପାରି ନାହିଁ।
ଇମେଲ୍: biswasports@gmail.com
(ବି.ଦ୍ର: ଏହି ଲେଖାରେ ଥିବା ସମସ୍ତ ତଥ୍ୟ ଲେଖକଙ୍କ ନିଜସ୍ୱ ମତ)