ଶୁଣିଲାନି ପ୍ରଶାସନ : କୋଦାଳ ଶାବଳ ଧରି ଗାଁକୁ ରାସ୍ତା କଲେ ଗ୍ରାମବାସୀ

ଏକାଠି ହୋଇଛନ୍ତି ଗାଁ ଲୋକେ...ମହିଳାଙ୍କଠାରୁ ପୁରୁଷ ସମସ୍ତଙ୍କ ହାତରେ ରହିଛି କୋଦାଳ, ଶାବଳ, ସିରା । ମୁଣ୍ଡ ଝାଳ ତୁଣ୍ଡରେ ମାରି ସମସ୍ତେ କାମରେ ବ୍ୟସ୍ତ । କେମିତି ରାସ୍ତା ହେବ, ଗାଁକୁ ଗାଡି ଗଡ଼ିବ । ବାସ୍‌ ଏଇ ଗୋଟିଏ ଲକ୍ଷ୍ୟ ନେଇ ଚାଲିଛି ରାସ୍ତା ତିଆରି କାମ ।

ଏମିତି ଦୃଶ୍ୟ ଦେଖିବା ପରେ ଆପଣ ବି କହିବେ ବୋଧହୁଏ ନିଜ ଗାଁର ରାସ୍ତା ନିଜେ ଗାଁ ଲୋକ ମିଶି କରୁଛନ୍ତି । ବାହାର ଗାଁର ଲୋକ କାହିଁକି ଟଙ୍କା ନେବେ ବରଂ ଆମ ଗାଁ ରାସ୍ତା ଆମେ କରିବା, ଦୁଇ ପଇସା ରୋଜଗାର କରିବା କିଛି ଏମିତି ଚିନ୍ତା ନେଇ କାମ କରୁଛନ୍ତି ଗାଁ ଲୋକେ । ଯଦି ଆପଣ ଏମିତି ଭାବୁଛନ୍ତି ତାହାଲେ ପୂରା ଭୁଲ୍‌ । କାରଣ ଗାଁକୁ ନିତିଦିନିଆ ରାସ୍ତା କରିବାକୁ ସରକାରଙ୍କ ପାଖରେ ଗୁହାରି କରିକରି ଥକିଯିବା ପରେ ବି ତାଙ୍କ ଦାବି କେହି ଶୁଣିଲେନି । ସେଇଥି ଲାଗି ତ ନିଜସ୍ୱ ଉଦ୍ୟମରେ ନିଜ ଗାଁକୁ ନିଜେ ରାସ୍ତା ତିଆରି କରିବାରେ ବ୍ୟସ୍ତ ଅଛନ୍ତି ଗାଁ ଲୋକ ।

କୋରାପୁଟ ନନ୍ଦପୁର ବ୍ଲକ ବାଡେଲ ପଂଚାୟତର ଗୋଡିପୁଟ ଗାଁ । ପିଡବ୍ଲ୍ୟୁଡି ରାସ୍ତାଠୁ ଗାଁର ଦୂରତା ମାତ୍ର ୨ କିଲୋମିଟର । କିନ୍ତୁ ବାଟରେ ଥିବା ନାଳ ଯୋଗୁଁ ନାହିଁ ନଥିବା ଅସୁବିଧାର ସାମ୍ନା କରୁଛନ୍ତି ଗାଁ ଲୋକେ । ସ୍ଥିତି ଏମିତି ହେଉଛି କି, ଗାଁ ଭିତରକୁ ଖଣ୍ଡେ ଗାଡି ବି ଯାଇପାରୁନି । ରୋଗୀଙ୍କ ଲାଗି ଆମ୍ବୁଲାନ୍ସ ୭ ସପନ ସଦୃଶ୍ ରହିଛି । ଶୀତ, ଖରାଦିନରେ ଯାହା ଯେମିତି ଚଳୁଛି ହେଲେ ବର୍ଷାଦିନେ ସ୍ଥିତି ପୂରା ଗମ୍ଭୀର ହୋଇଯାଉଛି ।

ଏତେ ଅସୁବିଧାର ସାମ୍ନା କରୁଥିବାରୁ ଗାଁକୁ ସବୁଦିନିଆ ରାସ୍ତାଟିଏ କରିବା ଲାଗି ବହୁଦିନରୁ ଦାବି କରୁଥିଲେ ଗାଁ ଲୋକେ । କିନ୍ତୁ ସେମାନଙ୍କ ଦାବିକୁ କର୍ଣ୍ଣପାତ କରିବାକୁ ସତେ ଯେମିତି କାହା ପାଖରେ ସମୟ ନାହିଁ । ରାଜସ୍ୱ ବିଭାଗ ପକ୍ଷରୁ ଜମି ଚିହ୍ନଟ ହେବା ପରେ ଚାନ୍ଦା ଆଦାୟ କରି ରାସ୍ତା ତିଆରିରେ ଲାଗି ପଡିଛନ୍ତି ସମସ୍ତେ । ସେପଟେ ଲୋକଙ୍କ ଅଭିଯୋଗକୁ ନେଇ ବାଡେଲ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ କହିଛନ୍ତି ଗାଁରେ ଜମି ବିବାଦ ଯୋଗୁଁ ରାସ୍ତା କାମ ହୋଇପାରୁ ନାହିଁ । ରାଜସ୍ୱ ବିଭାଗ ରାସ୍ତା ପାଇଁ ଜମି ଚିହ୍ନଟ ପରେ ଗାଁ ଲୋକେ ରାସ୍ତା କାମ କରିଛନ୍ତି । ଖୁବଶୀଘ୍ର ସମସ୍ୟାର ସମାଧାନ କରାଯିବା ସହିତ ଗାଁର ବିକାଶ ହେବ । ଗାଁର ଉନ୍ନତି ଲାଗି ମାଳମାଳ ଯୋଜନା କରୁଛନ୍ତି ସରକାର । ପୂଳାପୂଳା ଟଙ୍କା ବି ଖର୍ଚ୍ଚ ହେଉଛି । ହେଲେ ବାସ୍ତବରେ ଯୋଜନା କେତେ କାର୍ଯ୍ୟକାରୀ ହେଉଛି ତାହା ଏଇ ଗାଁରୁ ହିଁ ସ୍ପଷ୍ଟ ହୋଇଛି ।

(ଲମତାପୁଟରୁ ଜଗତ ଜୀବନ କାଂଚିମଙ୍କ ରିପୋର୍ଟ)