ମିଳନ ଖୁସିରେ ଧୋଇଗଲା ଟ୍ରେନ୍ ଟ୍ରାଜେଡିରେ ବିଚ୍ଛେଦ ଯନ୍ତ୍ରଣା

ମଥା ସିନ୍ଦୂର ବଜ୍ର ଥିଲା ବୋଲି ଲୌହ ଦାନବ ମୁହଁରୁ ବର୍ତ୍ତିଗଲେ କାହା ସ୍ୱାମୀ, ପୂର୍ବଜନ୍ମରେ ପୂଣ୍ୟ ଅର୍ଜିଥିଲେ ବୋଲି କିଛି ବାପା, ମା’ଙ୍କ କୋଳ ବି ଖାଲି ହେଲାନି । ବାହାନଗାର ଭୟଙ୍କର ଟ୍ରେନ ଟ୍ରାଜେଡ଼ିରେ ଶହ ଶହ ଯାତ୍ରୀ ଶବ ପାଲଟିଯିବା ପରେ ବି କିଛି ଯାତ୍ରୀଙ୍କ ଭାଗ୍ୟ ଏତେ ଟାଣ ଥିଲା ଯେ, ଫେରିପାଇଲେ ଜୀବନ । ପରସ୍ପରକୁ ଜୀବନ୍ତ ଅବସ୍ଥାରେ ପାଇ ଭାବବିହ୍ୱଳ ପତି-ପତ୍ନୀ, ବାପା, ମାଆ ଏବଂ କିଛି ଆତ୍ମୀୟ ସ୍ୱଜନ । ଆଉ ସେହି ମିଳନ ପଛରେ କେତେକ ମାମଲାରେ ଓଟିଭିର ଭୂମିକା ଥିଲା ଗୁରୁତ୍ୱପୂର୍ଣ୍ଣ, କେମିତି ଜାଣନ୍ତୁ...

ବୋଲ ମାନୁନି ଖୁସିର ଲୁହ । ଆନନ୍ଦରେ ଫାଟି ପଡୁଛି ଛାତି । ରକ୍ତମୁଖା ଲୌହ ଦାନବର ପ୍ରକୋପ ପରଠୁ ଗତ ୫ଦିନ ଧରି ଯେଉଁ ଭୟ ଆତଙ୍କ ଆଉ କୋହରେ ବତୁରି ଯାଉଥିଲା ପ୍ରାଣ, ଆଜି ବଦଳିଯାଇଛି ସବୁକିଛି । କେଉଁ ଜନ୍ମରେ ପୂଣ୍ୟ ଅର୍ଜିଥିଲେ ବୋଲି ଆଜି ନିଜ ରକ୍ତର ସନ୍ତାନଙ୍କୁ ପାଇଛନ୍ତି ଭାଗ୍ୟବାନ ବାପା, ମା’। କଟକ ବଡ଼ ଡାକ୍ତରଖାନା ICU ରେ ଏକ ନାବାଳକ ଚିକିତ୍ସିତ ହେଉଛନ୍ତି ୧୫ ବର୍ଷିୟା ରାମାନନ୍ଦ ପାଶ୍ୱାନୀ । ଯାହାଙ୍କ ଘର ନେପାଳରେ ବୋଲି ସୂଚନା ମିଳିଛି । ରାମାନନ୍ଦଙ୍କୁ ଖୋଜିବା ପାଇଁ ଏ ମେଡ଼ିକାଲରୁ ସେ ମେଡ଼ିକାଲକୁ ଯାଇ କେତେ ଧନ୍ଦି ହୋଇଛନ୍ତି ତାଙ୍କ ବାପା, ମା ।

ଏପରିକି ଭୁବନେଶ୍ୱର ଏମସ୍‌କୁ ଯାଇ ରାମାନନ୍ଦଙ୍କୁ ଖୋଜୁଥିବାବେଳେ ଓଟିଭି କ୍ୟାମେରାରେ ନିଜ ପୁଅର ସନ୍ଧାନରେ ଥିବାନେଇ ପ୍ରତିକ୍ରିୟା ଦେଇଥିଲେ । ଯାହାର ଦୃଶ୍ୟକୁ ଓଟିଭି ମାଧ୍ୟମରେ SCBରେ ଚିକିତ୍ସାଧିନ ଅବସ୍ଥାରେ ଥାଇ ଦେଖୁଥିଲେ ରାମାନନ୍ଦ। ଏନେଇ ସେ କର୍ତ୍ତୃପକ୍ଷଙ୍କୁ ଜଣାଇଥିଲେ । ଆଉ ଆଜି ରାମାନନ୍ଦଙ୍କ ପାଖରେ ପହଞ୍ଚିଛନ୍ତି ତାଙ୍କ ବାପା । କିନ୍ତୁ ଦୁର୍ଭାଗ୍ୟ, ସାଙ୍ଗରେ ଥିବା ୩ଜଣ ଯାତ୍ରୀଙ୍କୁ ହରାଇଛନ୍ତି ରାମାନନ୍ଦ । 

ଆଉ ଜଣେ ପତି-ପତ୍ନୀ ହେଉଛି ଏମ୍.ଡି.ରିଆଜ୍ ଏବଂ ଦୀପିକା । ବାହାନଗାରେ ରେଳ ଦୁର୍ଘଟଣାର ମାତ୍ର ୩ ଦିନ ପୂର୍ବରୁ ସରିଥିଲା ଉଭୟଙ୍କ ବିବାଦ । ବିବାହ ପରେ ପରେ ପଶ୍ଚିମବଙ୍ଗ ଯାଉଥିଲେ ହାୱଡ଼ା-ଯଶୱନ୍ତପୁର ଏକ୍ସପ୍ରେସରେ । କିନ୍ତୁ ବାହାନଗାର ଭୟଙ୍କର ଦୁର୍ଘଟଣା ପରେ ସାଥୀରେ ବାଲେଶ୍ୱରରୁ କଟକ ଏସସିବିକୁ ଅଣାଯାଇଥିଲା ସତ, କିଏ ଏସସିବିରେ ଭିନ୍ନ ଭିନ୍ନ ବିଭାଗକୁ ରେଫର ହେବା ପରେ ଆଉ ପରସ୍ପରର ପତ୍ତା ପାଇନଥିଲେ । ହେଲେ ଦୀପିକାଙ୍କ ମଥାର ସିନ୍ଦୂର ବଜ୍ର ଥିଲା ବୋଲି ସୌଭାଗ୍ୟକୁ ଆଜି ଦୁହିଙ୍କ ମିଳନ ହୋଇଛି । ଏସ୍‌ସିବି ମେଡ଼ିକାଲରେ ପରସ୍ପରକୁ ପାଇ ଖୁସି ହୋଇଛନ୍ତି । 

ଲୁହ ଆଉ କୋହର କାଳ ଭିତରେ ଆପଣାର ମଣିଷଙ୍କୁ ଏମିତି କେତେ ଯେ ଆତ୍ମୀୟସ୍ୱଜନ ଖୋଜି ବୁଲୁଛନ୍ତି, ତା’ର ସଠିକ ସୂଚନା ନାହିଁ । ଖୋଜି ଖୋଜି କିଏ ମୃତଦେହକୁ ପାଉଛନ୍ତି ତ ଆଉ କିଏ ଜୀବିତ ଅବସ୍ଥାରେ ପାଇ ବିଭୋର ହେଉଛନ୍ତି । ଏହି ଯେମିତି ବିହାରରୁ ଆସିଥିବା ଲକ୍ଷେଶ୍ୱର ଠାକୁର। ନିଜର ୨ ଦାଦା ପୁଅ ଭାଇ ଏବଂ ୪ ପଡ଼ୋଶୀଙ୍କୁ ଖୋଜି ଚାଲୁଛନ୍ତି ଗତ ପ୍ରାୟ ୫ ଦିନ ହେଲା । ତେବେ ଜଣେ ଭାଇଙ୍କ ମୃତଦେହ ମିଳିଥିଲେ ବି ଅନ୍ୟଜଣେ ଭାଈ ରାମ ଭରୋସେ ଜୀବିତ ଥିବା ସେ ସୂଚନା ପାଇଛନ୍ତି ଓଟିଭି ନ୍ୟୁଜରୁ । ଦୁର୍ଘଟଣା ରାତିରେ ତାଙ୍କୁ ଉଦ୍ଧାରବେଳର ଭିଡ଼ିଓ ପ୍ରସାରିତ ହୋଇଥିଲା ଓଟିଭିରେ । ଯିଏ ଭୁବନେଶ୍ୱର ଏମସ୍‌ରେ ଏବେ ଚିକିତ୍ସିତ ହେଉଥିବା ସୂଚନା ପାଇଛନ୍ତି ଲକ୍ଷେଶ୍ୱର। ତେଣୁ ଅନ୍ୟ ପଡ଼ୋଶୀ ବି ଜୀବିତ ଥିବା ଆଶା ରଖିଛନ୍ତି ଲକ୍ଷ୍ମେଶ୍ୱର ଠାକୁର ।