ଆଶ୍ଚର୍ଯ୍ୟ ! ମାତ୍ର ୧୦ ବର୍ଷ ବୟସରେ ୫୦ ଦେଶ ବୁଲିଲେଣି, ଦିନେ ବି ସ୍କୁଲ ବନ୍ଦ କରିନାହାନ୍ତି

ଦଶ ବର୍ଷର ଝିଅ ଆଦିତି । ବୁଲି ସାରିଲାଣି ୫୦ ଦେଶ । ଖାଲି ଆଦିତି ନୁହେଁ ଆଦିତି ତ୍ରିପାଠି ହେଉଛି ତାଙ୍କର ନାଁ । ଆପଣ ଭାବୁଥିବେ ମାତ୍ର ୧୦ ବର୍ଷ ବୟରେ ସେ କେମିତି ୫୦ଟି ଦେଶ ବୁଲିସାରିଲେଣି । ଏମିତିକି ନେପାଳ, ସିଙ୍ଗାପୁର ଓ ଥାଇଲାଣ୍ଡ ଭଳି ଯାଗା ମଧ୍ୟ ସେ ବୁଲିସାରିଛନ୍ତି । ଆପଣ ଆଶ୍ଚର୍ଯ୍ୟ ହେଉଛନ୍ତି କି ? ତେବେ ଏତିକିରେ ଆଶ୍ଚର୍ଯ୍ୟ ହୁଅନ୍ତୁ ନାହିଁ । ଏହାଠାରୁ ବଡ଼ ଆଶ୍ଚର୍ଯ୍ୟର କଥା ହେଲା, ଆଦିତି ୧୦ ବର୍ଷର ହୋଇଥିବା ବେଳେ ୫୦ ଦେଶ ବୁଲିବା ସହ ଗୋଟିଏ ବି ଦିନ ସେ ତାଙ୍କର ସ୍କୁଲ ମିସ୍‌ କରି ନାହାନ୍ତି ବା ବନ୍ଦ କରି ନାହାନ୍ତି ।

ଆଦିତି ନିଜ ପିତା-ମାତାଙ୍କ ସହ ସାଉଥ ଲଣ୍ଡନରେ ରୁହନ୍ତି । ତାଙ୍କ ବାପାଙ୍କ ନାଁ ଦୀପକ ଓ ମାଆଙ୍କ ନାଁ ଅଭିଳାସା । ଉଭୟ ପିତା-ମାତା ନିଷ୍ପତ୍ତି ନେଲେ ଯେ ତାଙ୍କ ଝିଅ ସ୍କୁଲ ବନ୍ଦ ନକରି ସବୁ ଦେଶ ବୁଲିବାରେ ରେକର୍ଡ କରୁ । ତେଣୁ ସେ ଏଥିପାଇଁ ପାଣି ଭଳି ଟଙ୍କା ଖର୍ଚ୍ଚ କରିବାକୁ ବି ପ୍ରସ୍ତୁତ ଥିଲେ । ସେ ଚାହୁଁଥିଲେ ତାଙ୍କ ଝିଅ ଏବେଠାରୁ ବିଭିନ୍ନ ଦେଶର ଖାଦ୍ୟ, ପରମ୍ପରା, ଶାସନ ଏବଂ ଲୋକଙ୍କୁ ଜାଣନ୍ତୁ ।

ଏହି ଆଶା ରଖି ପିତା-ମାତା ଝିଅର ବୁଲିବା ପ୍ଲାନ୍‌ କଲେ । ତେଣୁ ସ୍କୁଲର ପ୍ରତ୍ୟେକ ଛୁଟିରେ ଏବଂ ପ୍ରତ୍ୟେକ ବ୍ୟାଙ୍କ୍‌ ଛୁଟିରେ ସେ ନିଜ ଝିଅର ବିଭିନ୍ନ ଦେଶ ବୁଲିବା ପ୍ଲାନ୍‌ ପ୍ରସ୍ତୁତ କଲେ । ଏଥିପାଇଁ ତାଙ୍କୁ ବର୍ଷକୁ ପ୍ରାୟ ୨୦ ହଜାର ପାଉଣ୍ଟ ବା ୨୧ ଲକ୍ଷ ଟଙ୍କାରୁ ଅଧିକ ଟଙ୍କା ଖର୍ଚ୍ଚ କରିବାକୁ ପଡ଼ିବ ବୋଲି ସେ ବଜେଟ୍‌ ସ୍ଥିର କଲେ । ତାଙ୍କ କହିବାନୁଯାୟୀ ଯେଉଁ ଟଙ୍କା ସେ ଝିଅର ବୁଲିବା ପାଇଁ ଖର୍ଚ୍ଚ କରୁଛନ୍ତି ତାହା ଅଯଥା ନୁହେଁ । ତାହା ସମ୍ପୂର୍ଣ୍ଣ ରୂପେ ଯଥାର୍ଥ ଭାବେ ଖର୍ଚ୍ଚ ହେଉଛି । ଏହାଦ୍ୱାରା ତାଙ୍କ ଝିଅ ଅନେକ କିଛି ଶିଖିବାକୁ ପାଉଛି ।

ଅଭିଳାସା ଏବଂ ଦୀପକ ନିଜ ଝିଅ ଆଦିତି ବିଷୟରେ ଆହୁରି ସୂଚନା ଦେଇ କହିଛନ୍ତି, ସେ ନେପାଳ, ଭାରତ ଏବଂ ଥାଇଲାଣ୍ଡର ପରମ୍ପରା ଦେଖି ବହୁତ ଖୁସି । ଆଉ ଏଥିପାଇଁ ସେ ଖୁବ୍‌ ଆଗ୍ରହୀ ମଧ୍ୟ ଥିଲା । ତାଙ୍କ ଝିଅର ବୁଲିବା ପ୍ଲାନିଂ ସେ ନର୍ସରୀ କ୍ଲାସ୍‌ରୁ ଆରମ୍ଭ କରିଛନ୍ତି । ଯେତେବେଳେ ଝିଅକୁ ମାତ୍ର ୩ ବର୍ଷ ବୟସ ହୋଇଥିଲା , ସେତେବେଳେ ସେ ସପ୍ତାହକୁ ଅଢ଼େଇ ଦିନ ସ୍କୁଲ ଯାଉଥିଲା। ଏବେ ସୋମବାରରୁ ଶୁକ୍ରବାର ପର୍ଯ୍ୟନ୍ତ ସ୍କୁଲ ।

ତେଣୁ ଆମେ ଝିଅକୁ ଶୁକ୍ରବାର ଦିନ ସ୍କୁଲରୁ ନେଇ ଡାଇରେକ୍ଟ ଏୟାରପୋର୍ଟ ଯାଉଛୁ । ସେଠାରୁ ଟୁର୍‌ରେ ବାହାରୁଛୁ । ଟୁର୍‌ରୁ ସବୁବେଳେ ରବିବାର ବିଳମ୍ବିତ ରାତି ପ୍ରାୟ ୧୧ଟା ଫ୍ଲାଇଟ୍‌ରେ ଘରକୁ ରିଟର୍ଣ୍ଣ କରୁଛୁ । ସୋମବାର ଦିନ ଏୟାରପୋର୍ଟରେ ପହଞ୍ଚିବା ପରେ ଝିଅକୁ ଏୟାର୍‌ପୋର୍ଟରୁ ସିଧା ନେଇ ସ୍କୁଲ୍‌ରେ ଛାଡ଼ୁଛୁ । ଏହିଭଳି ଭାବେ ତାର ଟୁର୍‌ ପ୍ଲାନ୍‌ କରାଯାଉଛି । ଯେଉଁଥିରେ କି ତାର ପାଠ ପଢ଼ାରେ ବିଲ୍‌କୁଲ ବ୍ୟାଘାତ ସୃଷ୍ଟି ହେଉ ନାହିଁ ।