ବିରଜୁ କୁଲୁଙ୍କୁ ଠକିଦେଲା କି ପ୍ରଶାସନ? ପ୍ରତିଶ୍ରୁତିର ୩ବର୍ଷ ପରେ ବି ମୁଣ୍ଡକୁ ଛାତ ନାହିଁ କି ମିଳିନି ସହାୟତା

ସୁଦୂର ପାକିସ୍ତାନରେ ୨୫ ବର୍ଷର ଜେଲ୍ ଜୀବନ କାଟି ଭିଟାମାଟିକୁ ଫେରିଥିବା ସେଦିନର ସେହି ଚର୍ଚ୍ଚିତ ବୃଦ୍ଧଙ୍କୁ ଭୁଲିଗଲେ ରାଜ୍ୟ ସରକାର । ଘରକୁ ଫେରିଥିବା ସୁନ୍ଦରଗଡ଼ର ବିରଜୁ କୁଲୁଙ୍କୁ ଘରଦ୍ୱାର ସହ ଆର୍ଥିକ ସାହାଯ୍ୟର ମାଳ ମାଳ ପ୍ରତିଶ୍ରୁତି ଦେଇଥିଲା ପ୍ରଶାସନ । ହେଲେ ୩ ବର୍ଷ ବିତିଗଲା, ସହାୟତାର ନାଁ ଗନ୍ଧ ନାହିଁ । ଯାହା ପାଖରେ ଆପଣାର ବୋଲି କେହି ନାହିଁ, ପରିଣତ ବୟସରେ ସେହି ବିରଜୁଙ୍କୁ ସମସ୍ତେ ଆଜି ଭୁଲି ଯାଇଛନ୍ତି ।

ଧିରେ ଧିରେ କ୍ଷୀଣ ହୋଇ ଆସିଲାଣି ଶରୀରର ବଳବପୁ । ବାପା ମା’ ତ ଦୂରର କଥା, ଜୀବନରେ ପୁଅ, ଝିଅ କି ପତ୍ନୀ ବୋଲି କେହିନାହାଁନ୍ତି । ସଂପର୍କିୟଙ୍କ ହାତ ଟେକାରେ ଯାହା ଜୀବନ ଜୀଇଁବାକୁ ପଡୁଛି । ଦିନେ ଏହି ଶରୀର କେତେ ସହିଛି ଶତ୍ରୁରାଷ୍ଟ୍ରର ନିର୍ଯାତନା । ପାକିସ୍ତାନ ଜେଲ ଭିତରେ ଅନ୍ଧାରୀ ମାଡ଼ର ବେଦନା ଆଜି ବି ମନେ ଅଛି ତାଙ୍କର । କାରଣ ଏ ହେଉଛନ୍ତି ସେହି ବିରଜୁ କୁଲୁ । ଯିଏ ୨୫ ବର୍ଷ ଧରି ପାକିସ୍ତାନ ଜେଲରେ ବନ୍ଦୀ ଜୀବନ କାଟି ୨୦୨୦ରେ ଫେରିଛନ୍ତି ସୁନ୍ଦରଗଡ଼ର ଭିଟାମାଟିକୁ । ଜୀବନ ବଞ୍ଚାଇ ଫେରିଆସିଛନ୍ତି ସତ, ହେଲେ ଜୀବନର ଯନ୍ତ୍ରଣାରୁ କିନ୍ତୁ ମିଳୁନି ଉପଶମ ।

ପାକିସ୍ତାନରୁ ଫେରିବା ପରେ ଅମ୍ରିତସରରୁ ସୁସ୍ଥ ସବଳ ଅବସ୍ଥାରେ ଯେଉଁ ପ୍ରଶାସନ ବାଟ କଢ଼େଇ ଆଣିଥିଲା ବିରଜୁଙ୍କୁ । ସେହି ପ୍ରଶାସନ ସତେଯେମିତି ଆଜି ଅଧାବାଟରେ ଠକିଦେଲା । ବିରଜୁଙ୍କ ନା କେଉଁଠି ଥଇଥାନ କଲା ନା ମୁଣ୍ଡ ଗୁଞ୍ଜିବାକୁ ଘର ଖଣ୍ଡେ ଦେଲା । ଶେଷରେ ଜରାଜୀର୍ଣ୍ଣ ଜୀବନ ଜୀଉଁଛନ୍ତି ବିରଜୁ ।

ସୁନ୍ଦରଗଡ଼ କୁତ୍ରା ବ୍ଲକ କଟଙ୍ଗ ଜଙ୍ଗରପଡ଼ାର ବିରଜୁ ଦଶମ ପଢିବାବେଳେ ମାନସିକ ଭାରସାମ୍ୟ ହରାଇ ଅକସ୍ମାତ ଉଭାନ ହୋଇଗଲେ । ବିରଜୁଙ୍କ ପରିବାର କହିଲେ ବାପା, ମା’ ଓ ଗୋଟିଏ ଭଉଣୀ । କିନ୍ତୁ ବିରଜୁଙ୍କୁ ଜନ୍ମ ଦେଇ ଆରପାରିକୁ ଚାଲିଗଲେ ମା’ । ବାପା ବି ଝିଅକୁ ହାତକୁ ଦି’ହାତ କରିବା ପରେ ବିରଜଙ୍କୁ ଝୁରିଝୁରି ପ୍ରାଣ ହରାଇଥିଲେ । ତାହାରି ଭିତରେ ବିତିଯାଇଥିଲା ଅନେକ ବର୍ଷ । ଶତ୍ରୁ ଦେଶରେ ବନ୍ଦୀ ହୋଇ ଜୀବନର ଯୌବନକୁ ହରାଇ ବିରଜୁ ପାଲଟି ଯାଇଥିଲେ ବୃଦ୍ଧ । ତାହାରି ଭିତରେ ଜିଲ୍ଲା ପ୍ରଶାସନ ଖବର ପାଇଲା, ବିରଜୁ ୨୦ ବର୍ଷ ଧରି ସୁଦୂର ପାକିସ୍ତାନ ଜେଲରେ ବନ୍ଦୀ ଅଛନ୍ତି । ତାଙ୍କୁ ଉଦ୍ଧାର କରିବା ପାଇଁ ପ୍ରଶାସନ ପକ୍ଷରୁ ୩ ବର୍ଷ ଧରି ଉଦ୍ୟମ ଜାରି ରହିଥିଲା । ୨୦୨୦ ଅକ୍ଟୋବର ୨୬ରେ ପାକିସ୍ତାନ ଜେଲରୁ ମୁକୁଳିବା ପରେ ବିରଜୁଙ୍କୁ ପ୍ରଥମେ ପଞ୍ଜାବ ଅମୃତସର ଆଣି କୋଭିଡ୍ ସେଣ୍ଟରରେ ରଖାଯାଇଥିଲା ।

ପରେ ଅମୃତସର ଯାଇ ୨୦୨୦ ନଭେମ୍ବର ୧୩ରେ ବିରଜଙ୍କୁ ଧରି ଗାଁକୁ ଫେରିଥିଲା ସୁନ୍ଦରଗଡ଼ ଜିଲ୍ଲା ପ୍ରଶାସନ । ଗାଁକୁ ଫେରିବା ପରେ କେତେ ଖୁସି ମଉଜ ଦେଖିବାକୁ ମିଳିଥିଲା । ପହଞ୍ଚିଥିଲେ ନେତା, ଅଫିସରଙ୍କ ଯାଏଁ । ବିରଜୁଙ୍କୁ ସହାୟତାର ନାନା ପ୍ରତିଶ୍ରୁତି ବି ଦେଇଥିଲେ । କିନ୍ତୁ ମିଳିଲା ରାସନ କାର୍ଡ ଖଣ୍ଡେ । ଯାହା ବର୍ଷେ ହେଲା ବନ୍ଦ । କୁଲି ମଜୁରୀ କରି ଚଳୁଥିବା ବିରଜୁଙ୍କ କକା ପୁଅ ଭାଈ ପରିବାର ଯାହା କିଛି ସାହାଯ୍ୟ କରୁଛନ୍ତି । ଏଭଳି ସ୍ଥିତିରେ କୁତ୍ରା ବିଡ଼ିଓଙ୍କୁ ପଚାରିବାରୁ ସେ କହୁଛନ୍ତି, ମୁଁ କିଛି ଜାଣିନି । ଅନୁଧ୍ୟାନ ପରେ ଯାହାକିଛି ପଦକ୍ଷେପ ନିଆଯିବ ।

ଆତ୍ମୀୟଙ୍କ ପାଇଁ ଦିନେ ମରିସାରିଥିବା ଏହି ଅଲୋଡ଼ା, ଅଖୋଜା ଓ ଅସହାୟ ମଣିଷ ପାଇଁ ପ୍ରଶାସନ କେବେ ତା ପ୍ରତିଶ୍ରୁତି ପୂରଣ କରୁଛି, ତାକୁ ଅପେକ୍ଷା ।

(ରିପୋର୍ଟ- ରାଜଗାଙ୍ଗପୁରରୁ ବିଶ୍ୱକେତନ ରାୟ)