୬୦ ଟଙ୍କାରେ ଟମାଟୋ କିଣିବାକୁ ୫ ଘଣ୍ଟାରୁ ଅଧିକ ସମୟ ଅପେକ୍ଷା !

ବର୍ତ୍ତମାନ ଟମାଟୋ ଦର ଆକାଶ ଛୁଆଁ। ୨୦୦ ଛୁଇଁଲାଣି କେଜି। ଯେଉଁଠି ଗ୍ରାହକମାନେ କିଲେ ଲେଖାଏଁ ଟମାଟୋ କିଣନ୍ତି, ଆଜି ସେଠି ହାତଗଣତି ତଥା ଦୁଇ ଶହ, ଅଢେଇ ଶହ ଗ୍ରାମ୍‌ରେ ମନ ବୁଝେଇବାକୁ ପଡୁଛି । ନଚେତ୍‌ ଟମାଟୋ ଆଡ଼େ  ଚାହୁଁନାହାନ୍ତି  । କିନ୍ତୁ ଏପରି ସ୍ଥିତିରେ ଗ୍ରାହକ ସିନା କାନ୍ଦୁଛି ହେଲେ ବେପାରୀ କିନ୍ତୁ ମାଲେମାଲ। ଟମାଟୋ ବିକି ଶହେ କି ହଜାରେ ନୁହେଁ, ଏକାଥରକେ କୋଟି କୋଟି ଟଙ୍କା ରୋଜଗାର କଲେଣି ଚାଷୀ । ଏଇଭିତରେ ଏମିତି ଖବର ଆପଣ ଅନେକ ଶୁଣିଛନ୍ତି ।

ତେବେ ଆଜି ଆମେ ଯେଉଁ ଖବର ଦେଉଛୁ, ତାହା ଜାଣିଲେ ଆପଣ ବି କହିବେ ଟମାଟୋ ଦର ଲୋକଙ୍କୁ କେତେ ବାଧୁଛି । ଏହି ଟମାଟୋ ପାଇଁ ଲୋକେ ୫ ଘଣ୍ଟାରୁ ଅଧିକ ସମୟ ଧରି ଧାଡ଼ିରେ ଛିଡ଼ା ହେଉଛନ୍ତି । କାରଣ ଟମାଟୋ ହେଉଛି ଆମ ଦୈନନ୍ଦିନ ଖାଦ୍ୟରେ ବ୍ୟବହାର ହେଉଥିବା ଏକ ଜରୁରୀ ପରିବା । 

ଆପଣ ଜାଣନ୍ତି ବଜାରରେ ଟମାଟୋ ଦର ୨୦୦ ଛୁଇଁଥିବା ବେଳେ କିଛି ସ୍ଥାନରେ ସ୍ଥାନୀୟ ପ୍ରଶାସନ ପକ୍ଷରୁ କଣ୍ଟ୍ରୋଲ ଦୋକାନରେ ଟମାଟୋ ରିହାତି ଦରରେ ବିକ୍ରି ହେଉଛି । ଠିକ୍‌ ସେମିତି ଚେନ୍ନାଇରେ ମଧ୍ୟ ରିହାତି ଦରରେ ବିକ୍ରି ହେଉଛି ଟମାଟୋ । ଯେଉଁଠି ବଜାର ଦର କିଲୋ ପିଛା ୧୮୮ ରହିଛି । ସେଠାରେ କଣ୍ଟ୍ରୋଲ ଦୋକାନରେ କିଲୋ ପିଛା ୬୦ ଟଙ୍କାରେ ମିଳୁଛି ଟମାଟୋ ।

ଏହି ରିହାତି ଦରରେ ଟମାଟୋ କିଣିବା ପାଇଁ ରୋୟାପେଠା କୋପରେଟିଭ୍‌ ସୋସାଇଟିର ନିକଟରେ ଲୋକଙ୍କ ଲମ୍ବା ଲାଇନ୍‌ ଦେଖିବାକୁ ମିଳିଛି । ଏତେ ଭିଡ଼ ଯେ, ଟମାଟୋ ପାଇଁ ଲୋକଙ୍କୁ ଏଠାରେ ୫ ଘଣ୍ଟାରୁ ଅଧିକ ସମୟ ଧରି ଛିଡ଼ା ହେବାକୁ ପଡ଼ିଛି । 

କେବଳ ଯେ, ଶସ୍ତାରେ ଟମାଟୋ ମିଳୁଛି, ସେଇଥିପାଇଁ ଏହି ଲୋକମାନେ ଭିଡ଼ ଜମାଇଛନ୍ତି ତା’ ନୁହେଁ । ଏହି ଅଞ୍ଚଳକୁ ଟମାଟୋ ଯୋଗାଣ ମଧ୍ୟ କମ୍‌ ରହିଛି । ତେଣୁ ଲୋକେ ଘଣ୍ଟା ଘଣ୍ଟା ଧରି ଲାଇନ୍‌ରେ ଛିଡ଼ା ହୋଇ ଟମାଟୋ କିଣୁଛନ୍ତି । ଖାଲି ସାଧାରଣ ଲୋକ ନୁହଁନ୍ତି ବରଂ ବିଭିନ୍ନ ହୋଟେଲ ମଧ୍ୟ ଏହି ରିହାତି ଦରରେ ମିଳୁଥିବା ଟମାଟୋ ଉପରେ ବା କୋପରେଟିଭ୍‌ ସୋସାଇଟି ଉପରେ ନିର୍ଭର କରେ । 

ସବୁଠାରୁ ମଜା କଥା ହେଲା, କୋପରେଟିଭ୍‌ ସୋସାଇଟିର କଣ୍ଟ୍ରୋଲ ଦୋକାନ ସକାଳ ୯ଟାରେ ଖୋଲିଥାଏ । କିନ୍ତୁ ସ୍ଥାନୀୟ ଲୋକେ ସକାଳ ୬ଟାରୁ ଆସି ଧାଡ଼ି ଲମ୍ବାଇଥାନ୍ତି । ଆଉ ତାଠାରୁ ବଡ଼ ମଜା କଥା ହେଲା, ୫ ଘଣ୍ଟା ଧରି ଲୋକେ ଲାଇନ୍‌ରେ ଛିଡ଼ା ହୋଇ ୬୦ ଟଙ୍କାରେ ଟମାଟୋ କିଣିବା ପରେ ତାକୁ ସେଇଠି ହିଁ ଅନ୍ୟ ଲୋକଙ୍କୁ ୧୮୦ ଟଙ୍କା ବିକ୍ରି କରୁଛନ୍ତି । ସିଧା ସିଧା କିଲୋ ପିଛା ୧୨୦ ଟଙ୍କା ଲାଭ ବୋଲି ଗର୍ବରେ କହୁଛନ୍ତି ।