କଠୋର ହେଲେ ସରକାର, ଏଣିକି ଚଢ଼ା ଦରରେ ଆଳୁ ବିକିଲେ କାର୍ଯ୍ୟାନୁଷ୍ଠାନ

କଠୋର ହେଲେ ରାଜ୍ୟ ସରକାର । ଏଣିକି ଅସାଧୁ ବ୍ୟବସାୟୀଙ୍କ ଉପରେ ହେବ ଆକ୍ସନ । ଚଢ଼ା ଦରରେ ଆଳୁ ବିକିଲେ ଅସାଧୁ ବେପାରୀଙ୍କ ଉପରେ ହେବ କାର୍ଯ୍ୟାନୁଷ୍ଠାନ । ଯେଉଁମାନେ ଆଳୁ ବ୍ୟାପକ ପରିମାଣରେ ବେଆଇନ ଭାବେ ମହଜୁଦ ରଖିଛନ୍ତି ସେମାନଙ୍କ ଉପରେ ଚଢ଼ାଉ କରାଯାଇ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ । ଏହା କହିଛନ୍ତି ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ।

ଯୋଗାଣ ବିଭାଗ ପକ୍ଷରୁ ୧୯ ଶହ ଦୋକାନ ଓଡ଼ିଶାରେ ଖୋଲାଯାଇଛି, ଯେଉଁଠି ଆଳୁ କିଲୋ ପିଛା ୩୦ଟଙ୍କାରେ ବିକ୍ରି ହେଉଛି ବୋଲି କହିଛନ୍ତି ମନ୍ତ୍ରୀ । ସେପଟେ ଆଳୁ ସଂକଟର ସମାଧାନ ଲାଗି କେନ୍ଦ୍ର ସରକାରଙ୍କ ହସ୍ତକ୍ଷେପ ଲୋଡିଛି ବ୍ୟବସାୟୀ ମହାସଂଘ । ଉଭୟ ରାଜ୍ୟର ଖାଉଟି ଓ ବ୍ୟବସାୟୀ କ୍ଷତି ସହୁଛନ୍ତି । କେବଳ ମୌଖିକ ଭାବେ କଥାବାର୍ତ୍ତା ଚାଲିଥିବାବେଳେ, କୌଣସି ଲିଖିତ ବ୍ୟବସ୍ଥା ହେଉନଥିବା କହିଛନ୍ତି ବ୍ୟବସାୟୀ ମହାସଂଘ ସାଧାରଣ ସଂପାଦକ ସୁଧାକର ପଣ୍ଡା । 

ଗତ ରବିବାର ଠାରୁ ଲୋଡ ହୋଇଥିବା କିଛି ଆଳୁ ଟ୍ରକ୍ ଆଜି ଆସି ପହଞ୍ଚିଛି । ଆଜି ପଶ୍ଚିମବଙ୍ଗ ସଚିବାଳୟରେ ବ୍ୟବସାୟୀ ସଂଘ ସହ ଆଳୁ ସଂପର୍କରେ ତୃତୀୟ ବୈଠକ ବସୁଥିବା କହିଛନ୍ତି ବ୍ୟବସାୟୀ ମହାସଂଘ ସାଧାରଣ ସଂପାଦକ ।