କେଉଁଠି ସିସିଟିଭି ନାହିଁ, ତ କେଉଁଠି ନାହାନ୍ତି ପର୍ଯ୍ୟାପ୍ତ ସୁରକ୍ଷାକର୍ମୀ; ସୁରକ୍ଷିତ ମଣୁନାହାନ୍ତି ମହିଳା ଡାକ୍ତର

ସ୍ବାସ୍ଥ୍ୟସେବା କ୍ଷେତ୍ରରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରିବା ପାଇଁ ରାଜ୍ୟ ସରକାରଙ୍କ ନୂଆ ଗାଇଡ୍ ଲାଇନ୍। ହସ୍ପିଟାଲ ଭିତରେ ଡାକ୍ତରଙ୍କ ସହ କୌଣସି ପ୍ରକାର ଦୁର୍ବ୍ୟବହାର କିମ୍ବା ଦୁର୍ଘଟଣା ରୋକିବାକୁ ନିର୍ଦ୍ଦେଶାବଳି ଆଣିଛି ସ୍ବାସ୍ଥ୍ୟ ବିଭାଗ । ତେବେ ଉଣା ଅଧିକ ସବୁ ହସପିଟାଲରେ ଭିତ୍ତିଭୂମିର ଅଭାବ ଓ ଆବଶ୍ୟକ କର୍ମଚାରୀ ନଥିବା ବେଳେ ନିର୍ଦ୍ଦେଶାବଳିର କିପରି ଅନୁପାଳନ ହେବ ତାକୁ ନେଇ ଉଠିଛି ପ୍ରଶ୍ନ। ଉପାନ୍ତ 
ମାଲକାନଗିରିରୁ କଟକ SCB ଓ କ୍ୟାପିଟାଲ୍ ହସପିଟାଲରେ ସ୍ଥିତି ପରଖିଛନ୍ତି ଆମ ପ୍ରତିନିଧି।

କୋଲକାତା ଅଭୟା କାଣ୍ଡ ପରେ ଚେତିଛି ଓଡ଼ିଶା ସରକାରଙ୍କ ସ୍ବାସ୍ଥ୍ୟ ବିଭାଗ। ଡାକ୍ତର, ନର୍ସ ଓ ଡାକ୍ତରୀ ଛାତ୍ରଛାତ୍ରୀ ଓ ଡାକ୍ତରଖାନା କର୍ମଚାରୀଙ୍କ ସୁରକ୍ଷା ପାଇଁ ପ୍ରକାଶ ପାଇଛି ତତ୍ପରତା। ରାଜ୍ୟ ସରକାର ଆଣିଥିବା ନୂଆ ଗାଇଡଲାଇନରେ ରହିଛି- ହସ୍ପିଟାଲ ଭିତରକୁ ଅବାଧ ପ୍ରବେଶ ଉପରେ ରୋକ୍ ଲାଗିବ। ସ୍ବାସ୍ଥ୍ୟ କର୍ମଚାରୀଙ୍କ ଆଇଡି କାର୍ଡ ଓ ରୋଗୀ ସମ୍ପର୍କୀୟଙ୍କ ପାଇଁ ଭିଜିଟର୍ ପାସ୍‌ର ବ୍ୟବସ୍ଥା ହେବ। ତା ସହ ୨୪ ଘଣ୍ଟିଆ ସୁରକ୍ଷା, ବାଧ୍ୟତାମୁଳକ ସିସିଟିଭି, କଣ୍ଟ୍ରୋଲ ରୁମ୍, ଡାକ୍ତର ଓ କର୍ମଚାରୀଙ୍କ ପାଇଁ ଡ୍ୟୁଟି ରୁମ ଓ ବିଶ୍ରାମକକ୍ଷ, ଜରୁରୀକାଳୀନ ପ୍ରତିକ୍ରିୟା ଯୋଜନା, କର୍ମକ୍ଷେତ୍ରରେ ଭେଦଭାବ ଓ ମନିଟରିଂ କମିଟି ଗଠନ ଭଳି ବିସ୍ତୃତ ନିର୍ଦ୍ଦେଶାବଳୀ ଦେଇଛି ବିଭାଗ । ମନିଟରିଂ କମିଟି ସମସ୍ତ ପଦକ୍ଷେପଗୁଡିକରେ ମାସିକ ସମୀକ୍ଷା କରିବାକୁ ବି ନିର୍ଦ୍ଦେଶ ରହିଛି। 

ପ୍ରଶ୍ନ ଉଠୁଛି, ଗ୍ରାଉଣ୍ଡରେ କିଭଳି କାର୍ଯ୍ୟକାରୀ ହେବ ଏହି ଗାଇଡଲାଇନ୍ ? କାରଣ ରାଜ୍ୟର ବିଭିନ୍ନ ସ୍ବାସ୍ଥ୍ୟକେନ୍ଦ୍ର, ଜିଲ୍ଲା ମୁଖ୍ୟ ଚିକିତ୍ସାଳୟ, ଏପରିକି ପ୍ରମୁଖ ମେଡିକାଲ କଲେଜରେ ବି ସ୍ଥିତି ସଂପୂର୍ଣ୍ଣ ଓଲଟା। କେଉଁଠି ସିସିଟିଭି କ୍ୟାମେରା ନାହିଁ, ତ ଆଉ କେଉଁଠି ଡାକ୍ତରଙ୍କ ପାଇଁ ଆବଶ୍ୟକ ସୁବିଧା ନାହିଁ। 

ମାଲକାନଗିରି ଖଇରିପୁଟ ବ୍ଲକ୍ ଗୋବିନ୍ଦପାଲି ପ୍ରାଥମିକ ସ୍ବାସ୍ଥ୍ୟ କେନ୍ଦ୍ର। ସ୍ବାସ୍ଥ୍ୟକେନ୍ଦ୍ର ଭିତରେ ଡାକ୍ତର ଓ ଡାକ୍ତରଖାନା କର୍ମଚାରୀ ବି ରହନ୍ତି। ହେଲେ ଏହାର ଗୋଟିଏ ମାତ୍ର ଗେଟ୍। ଭାଙ୍ଗିରୁଜି ଯାଇଛି ପାଚେରୀ, କାମ ଚଳାଉଛି ବାଉଁଶ ପାତିଆ। ଆଉ ସିସିଟିଭି କଥା ନକହିବା ଭଲ। ଅନୁରୁପ ଚିତ୍ର ଖୋର୍ଦ୍ଧା ଜିଲ୍ଲା ବାଲୁଗାଁ ସ୍ବାସ୍ଥ୍ୟକେନ୍ଦ୍ରର। ମହିଳା ଡାକ୍ତର ଓ ଷ୍ଟାଫ୍ ଏମର୍ଜେନ୍ସି ରୁମ୍କୁ ବିଶ୍ରାମ କକ୍ଷ ଭାବେ ବ୍ୟବହାର କରନ୍ତି। 
କେନ୍ଦ୍ରାପଡା ଜିଲ୍ଲା ମୁଖ୍ୟ ଚିକିତ୍ସାଳୟରେ ଯଦିଓ ସିସିଟିଭି ଲାଗିଛି, କିନ୍ତୁ ଆବଶ୍ୟକ ସଂଖ୍ୟକ ପୋଲିସ କର୍ମଚାରୀ ଓ ମହିଳା ସିକ୍ୟୁରିଟିଙ୍କ ଅଭାବ ରହିଛି।

ରାଜ୍ୟର ସର୍ବବୃହତ୍ ମେଡିକାଲ କଲେଜ ଓ ହସ୍ପିଟାଲ କଟକ SCBରେ ବି ନିଜକୁ ସୁରକ୍ଷିତ ମଣୁନାହାନ୍ତି ମହିଳା ଡାକ୍ତର । ରାତିବେଳା ଏମର୍ଜେନ୍ସି କଲ୍‌ରେ କ୍ବାର୍ଟର କିମ୍ବା ଘରୁ ମେଡିକାଲ ଯିବାକୁ ଭୟ ଲାଗୁଥିବା କହିଛନ୍ତି। ସେହିପରି କୋରାପୁଟ ମେଡିକାଲ କଲେଜରେ ହଷ୍ଟେଲ ଓ କ୍ବାର୍ଟରଠୁ ମେଡିକାଲ ପର୍ଯ୍ୟନ୍ତ ଥିବା ରାସ୍ତା ଅସାମାଜିକ ବ୍ୟକ୍ତିଙ୍କ ଆଡ୍ଡାସ୍ଥଳୀ ପାଲଟିଥିବା ଅଭିଯୋଗ ହୋଇଛି। ଏପଟେ କ୍ୟାପିଟାଲ୍ ହସ୍ପିଟାଲରେ 
ବି ପର୍ଯ୍ୟାପ୍ତ ଷ୍ଟାଫ୍ ଓ ଆନୁସଙ୍ଗିକ ବ୍ୟବସ୍ଥାର ଅଭାବକୁ ନେଇ ପ୍ରଶ୍ନ ଉଠିଛି।