କି ପୁରୁଷ, କି ମହିଳା; ମଦ ନିଶାରେ ସବୁ ବାଇଆ .. ନିଶାସକ୍ତଙ୍କ ଉତ୍ପାତକୁ ନେଇ ଚିନ୍ତା

ଚନ୍ଦକା ଥାନା ସୁନ୍ଦରପୁରରେ ମେଜର ଓ ବାନ୍ଧବୀଙ୍କ ସହ ଛେଡ୍‌ଛାଡ୍ .. କାଲି କୋଷ୍ଟଗାର୍ଡ ଡିଆଇଜି ଓ ପତ୍ନୀଙ୍କ ସହ ଅଭଦ୍ରୋଚିତ ବ୍ୟବହାର । ରାଜଧାନୀରେ ଚରମରେ ନିଶାସକ୍ତଙ୍କ ଉତ୍ପାତ .. ରାଜରାସ୍ତାରେ କାହାକୁ ଛାଡୁନାହାନ୍ତି, କେହି ବି ବାଦ୍ ପଡୁନାହାନ୍ତି । ଗଲାକାଲି ରାତିର ଘଟଣା । ମଦ୍ୟପଙ୍କ ଦୁର୍ବ୍ୟବହାରରର ଶିକାର ପରେ ନୟାପଲ୍ଲୀ ଥାନାରେ କୋଷ୍ଟଗାର୍ଡ ଡିଆଇଜି ସତ୍ୟରଞ୍ଜନ ଦାସ ।

ସତ୍ୟରଞ୍ଜନଙ୍କ ଅଭିଯୋଗ, ଗୁରୁବାର ରାତି ପାଖାପାଖି ୯ଟା ୪୦ରେ ସେ ତାଙ୍କ କାରରେ ଥିବା ବେଳେ ବେହେରାସାହି ଟ୍ରାଫିକ୍ ଠାରେ ଦୁଇ ମଦ୍ୟପ ଯୁବକ ହଠାତ୍ ତାଙ୍କ କାର ଆଗରେ ସ୍କୁଟି ରଖି ତାଙ୍କୁ ଏବଂ ତାଙ୍କ ପତ୍ନୀଙ୍କୁ ଦୁର୍ବ୍ୟହାର କରିଥିଲେ । କାରରେ ନାଲିବତୀ ଲାଗିଥିଲେ ବି ଟିକିଏ ବି ଖାତିର ନଥିଲା ଉତପାତିଆଙ୍କର ।

ବାଧ୍ୟ ହୋଇ ଡିଆଇଜି ଥାନାକୁ ଆସି ଅଭିଯୋଗ କରିବା ପରେ ତନାଘନା କରିଥିଲା ପୋଲିସ୍ । ଖୋଦ୍ ପୋଲିସ କମିଶନର ନୟାପଲ୍ଲୀ ଥାନାରେ ପହଞ୍ଚି ଘଟଣା ସଂପର୍କରେ ଅବଗତ ହୋଇ ତୁରନ୍ତ ଆକ୍ସନ ନେବାକୁ ନିର୍ଦ୍ଦେଶ ଦେଇଥିଲେ । ଅଭିଯୁକ୍ତମାନେ ହେଲେ ଜଗତସିଂହପୁର ବାଲିକୁଦା ଅଞ୍ଚଳର ଶିବାଶିଷ ମହାନ୍ତି ଓ ବିକାଶ ମହାନ୍ତି । ସିସିଟିଭି ଆଧାରରେ ଉଭୟଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଛି ।

ରାଜଧାନୀରେ ପୁରୁଷ ମହିଳା ନିର୍ବିଶେଷରେ ମଦ୍ୟପଙ୍କ ଉତ୍ପାତ ଯେମିତି ନିତିଦିନିଆ ଘଟଣା ପାଲଟିଗଲାଣି । କେତେବେଳେ ମଦ ପିଇ ମହିଳା ଥାନାରେ ଉତ୍ପାତ କଲେଣି .. ତ ଆଉ କେତେବେଳେ ମଦ ପିଇ ରାସ୍ତାରେ ଗଡ଼ିଲେଣି । ଗତ ୭ ତାରିଖରେ ତ ମଦ ନିଶାରେ ଚୁର୍ ଯୁବତୀ ବଡ଼ଗଡ଼ ଥାନା କଡ଼ରେ ଥିବା ପାଚେରି ଚଢ଼ି ପୋଲିସର ହର୍ ଟିମକୁ ବି ନାକେଦମ୍ କରିଥିଲେ ।

ରାଜଧାନୀର ସବୁ ମଦ ଆଡ୍‌ଡା ଓ ଖଟିରେ ଚଢ଼ାଉ ପରେ ବି ସ୍ଥିତିରେ ବ୍ରେକ୍ ଆସୁନି । ଡିସିପି କହିଛନ୍ତି ଉତ୍ପାତିଆଙ୍କୁ ସାବାଡ୍ କରିବାକୁ ଆଗକୁ ଚଢ଼ାଉକୁ ଜୋରଦାର କରାଯିବ ସହ ଡ୍ରଙ୍କ୍ ଆଣ୍ଡ ଡ୍ରାଇଭ୍ ରୋକିବାକୁ କଡ଼ାକଡ଼ି ଚେକିଂ କରାଯିବ । ଏକ ସର୍ଭେ ରିପୋର୍ଟର ତଥ୍ୟ କହୁଛି ରାଜ୍ୟରେ ୩୦.୨ ପ୍ରତିଶତ ଲୋକ ମଦ୍ୟପାନ କରୁଥିବା ବେଳେ ୨୨.୭ ପ୍ରତିଶତ ସହରୀ ଲୋକ ମଦ ପିଉଛନ୍ତି ।

ତେବେ ବଡ଼ କଥା ହେଉଛି ରାଜ୍ୟରେ ବଢୁଥିବା ମହିଳା ମଦ୍ୟପଙ୍କ ସଂଖ୍ୟା । ଏପରିକି ଏ ସଂଖ୍ୟା ଜାତୀୟ ହାର ଅପେକ୍ଷା ଅଧିକ । ରାଜ୍ୟର ୪.୩ ପ୍ରତିଶତ ମହିଳା ମଦ୍ୟପାନ କରୁଥିବା ବେଳେ ଜାତୀୟ ହାର ହେଉଛି ମାତ୍ର ୧.୬ ପ୍ରତିଶତ । ତେବେ ମଦ୍ୟପାନ ଜନିତ ଉତ୍ପାତିଆଙ୍କ ସଂଖ୍ୟା ବୃଦ୍ଧି ଚିନ୍ତାର କାରଣ ପାଲଟିଛି ।