ଜମିରେ ସାର ପ୍ରୟୋଗ କଲେ ବଢ଼ୁଛି କ୍ୟାନସର, ଏଣିକି ସବୁ ଜିଲ୍ଲାରେ ଜୈବିକ ଚାଷ: କୃଷିମନ୍ତ୍ରୀ

ସାର ପ୍ରୟୋଗ କରି ଚାଷ ଦ୍ୱାରା ବଢୁଛି କ୍ୟାନସର । ଖାଲି ସେତିକି ନୁହେଁ ମାଟିର ଉର୍ବର ଶକ୍ତି ମଧ୍ୟ କମୁଛି । ତେଣୁ ଜୈବିକ ପ୍ରଣାଳୀ ଚାଷକୁ ପ୍ରୋତ୍ସାହନ ପାଇଁ ଆଜି ବିଧାନସଭାରେ ଅନୁରୋଧ କରିଛନ୍ତି ଉପମୁଖ୍ୟମନ୍ତ୍ରୀ ତଥା କୃଷିମନ୍ତ୍ରୀ କନକ ବର୍ଦ୍ଧନ ସିଂହଦେଓ । ଚଳିତ ବର୍ଷରୁ ପ୍ରତି ଜିଲ୍ଲାରେ ଜୈବିକ ଚାଷ ଲାଗି ପଦକ୍ଷେପ ନିଆଯିବ ବୋଲି ମଧ୍ୟ ତଥ୍ୟ ରଖିଛନ୍ତି କୃଷିମନ୍ତ୍ରୀ ।

ବିଜେଡି ବିଧାୟକ କ୍ୟାପଟେନ୍ ଦିବ୍ୟଶଙ୍କର ମିଶ୍ରଙ୍କ ପ୍ରଶ୍ନରେ ମନ୍ତ୍ରୀ ତାଙ୍କ ଉତ୍ତରରେ ଆହୁରି ମଧ୍ୟ କହିଥିଲେ ଯେ-ଏବେ ମାଲକାନଗିରି, କୋରାପୁଟ, କନ୍ଧମାଳ, ରାୟଗଡା, ଢେଙ୍କାନାଳ, ବଲାଙ୍ଗୀର, କଳାହାଣ୍ଡି, ମୟୂରଭଞ୍ଜ ପରି ୧୦ଟି ଆଦିବାସୀ ଜିଲ୍ଲାରେ ଜୈବିକ ଚାଷ ହେଉଛି। ୨୦୧୮ ମସିହାରେ ଜୈବିକ କୃଷି ନୀତି ପ୍ରଣୟନ ହୋଇଥିଲା । ବର୍ତ୍ତମାନ ଏହା ୧୦ଟି ଜିଲ୍ଲାରେ କାର୍ଯ୍ୟକାରୀ କରାଯାଉଥିବାବେଳେ ଏ ବର୍ଷଠାରୁ ସବୁ ଜିଲ୍ଲାରେ ଜୈବିକ ଚାଷ କରାଯିବ ବୋଲି ମନ୍ତ୍ରୀ ସୂଚନା ଦେଇଛନ୍ତି ।