ରାଜଘାଟରେ ବିଶ୍ୱନେତା : ଗାନ୍ଧିଙ୍କ ସ୍ମୃତିଚାରଣ ସହ ଦେଲେ ଶ୍ରଦ୍ଧାଞ୍ଜଳି

ଜି ଟ୍ୱେଣ୍ଟି ଅବସରରେ ଗାନ୍ଧିଜୀଙ୍କ ସ୍ମୃତିଚାରଣ କଲେ ସାରା ବିଶ୍ୱ ନେତା । ଆଜି ବୈଠକର ଦ୍ୱିତୀୟ ଦିନ ପୂର୍ବରୁ ରାଜଘାଟ ଯାଇ ଗାନ୍ଧିଜୀଙ୍କ ସମାଧିସ୍ଥଳରେ ଶ୍ରଦ୍ଧାଞ୍ଜଳି ଜଣାଇଛନ୍ତି ବିଭିନ୍ନ ରାଷ୍ଟ୍ରର ରାଷ୍ଟ୍ରମୁଖ୍ୟ । ଆଜି ସକାଳୁ ମହାତ୍ମା ଗାନ୍ଧୀଙ୍କ ସମାଧିସ୍ଥଳରେ ପହଞ୍ଚିଥିଲେ ଜଣକ ପରେ ଜଣେ ରାଷ୍ଟ୍ର ମୁଖ୍ୟ । ସମସ୍ତଙ୍କୁ ରାଜଘାଟରେ ସ୍ୱାଗତ କରିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।

ସବୁ ରାଷ୍ଟ୍ରମୁଖ୍ୟଙ୍କୁ ଖଦୀ ବସ୍ତ୍ର ଉପହାର ଦେଇଥିଲେ ମୋଦି । ଜି-20 ସମ୍ମିଳନୀରେ ଯୋଗ ଦେଇଥିବା ବିଭିନ୍ନ ଦେଶର ନେତାମାନେ ଏକତ୍ରିତ ହେବା ପରେ ବାପୁଙ୍କୁ ସମୂହ ଶ୍ରଦ୍ଧାଞ୍ଜଳି ଦିଆଯାଇଥିଲା । ରାମ ଧୂନ ସହ ମହାତ୍ମା ଗାନ୍ଧୀଙ୍କୁ ଶ୍ରଦ୍ଧା ସୁମନ ଅର୍ପଣ କରାଯାଇଥିଲା । ଗାନ୍ଧିଙ୍କ ସମାଧିସ୍ଥଳରେ ଏତେ ସଂଖ୍ୟାରେ ବିଶ୍ୱନେତାଙ୍କ ଉପସ୍ଥିତି ଏକ ବିରଳ ମୂହୂର୍ତ୍ତି ସୃଷ୍ଟି କରିଥିଲା।...

ସେପଟେ ରାଜଧାନୀରେ ଦିଲ୍ଲୀରେ ଚାଲିଥିବା ଜି-ଟ୍ୱେଣ୍ଟି ଶିଖର ସମ୍ମିଳନୀର ଆଜି ଦ୍ୱିତୀୟ ତଥା ଅନ୍ତିମ ଦିନ । ଆଜି ଦ୍ୱିତୀୟ ଦିନରେ ମଧ୍ୟ ବିଭିନ୍ନ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଆଲୋଚନା ହେବ । ଗତକାଲି ପ୍ରଥମ ଦିନରେ ୱାନ୍ ଆର୍ଥ, ୱାନ୍ ଫ୍ୟାମିଲି ଅର୍ଥାତ ଗୋଟିଏ ପୃଥିବୀ, ଗୋଟିଏ ପରିବାର ବିଷୟବସ୍ତୁ ଉପରେ ବିଶ୍ୱନେତା ମାନେ ଆଲୋଚନା କରିଥିବା ବେଳେ ଆଜି ୱାନ୍ ଫ୍ୟୁଚର ଅର୍ଥାତ ଗୋଟିଏ ଭବିଷ୍ୟତ ବିଷୟବସ୍ତୁ ଉପରେ ମାନସ ମନ୍ଥନ ହେବ ।