ମୂଷା ମାରିବା ପାଇଁ ଟମାଟୋରେ ବିଷ ଦେଇଥିଲେ; ହେଲେ ନିଜେ ଖାଇଦେଲେ

କଥାରେ ଅଛି ‘ଯେ ପାଞ୍ଚେ ପର ମନ୍ଦ…ତା ମନ୍ଦ ପାଞ୍ଚନ୍ତି ଗୋବିନ୍ଦ’ । ଏହି ପ୍ରବାଦକୁ ପ୍ରମାଣିତ କରୁଥିବା ଏକ ଖବର ସାମ୍ନାକୁ ଆସିଛି । ଯେଉଁଥିରେ ମୂଷା ମାରିବା ପାଇଁ ଟମାଟୋ ଉପରେ ଲଗାଇଥିଲେ ବିଷ । ହେଲେ ନିଜେ ଖାଇବା ଦ୍ୱାରା ତାଙ୍କର ମୃତ୍ୟୁ ହୋଇଛି । ଏଠାରେ ଆପଣ ଭାବୁଥିବେ କିଏ କାହିଁକି ଓ କିପରି ଭାବେ ସେହି ବିଷ ଲାଗିଥିବା ଟମୋଟୋକୁ ଖାଇଲେ ? ତେବେ ଆସନ୍ତୁ ଜାଣିବା କଣ ଥିଲା ସମ୍ପୂର୍ଣ୍ଣ ଘଟଣା...

ମୁମ୍ବାଇରେ ରହୁଥିବା ଜଣେ ମହିଳା ମୂଷା ମାନଙ୍କୁ ମାରିବାକୁ ନିଜ ଘରେ କିଛି ଟମାଟୋରେ ବିଷ ଲଗାଇ ରଖିଥିଲେ । ହେଲେ କିଛି ଦିନ ପରେ ସେ ସେହି ଟମାଟୋକୁ ଖାଇଦେଇଥିଲେ । ଏହା ପରେ ମହିଳାଙ୍କ ସ୍ୱାସ୍ଥ୍ୟବସ୍ଥା ବିଗିଡ଼ିବାରୁ ତାଙ୍କୁ ଡାକ୍ତରଖାନାକୁ ସ୍ଥାନାନ୍ତରଣ କରାଯାଇଥିଲା । ହେଲେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଛନ୍ତି । ହେଲେ ଏଠାରେ ପ୍ରଶ୍ନ ଉଠୁଛି ଜଣେ କିପରି ଏତେ ବଡ଼ ଭୁଲ କରିପାରିବ ?

ଜାତୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ମୁମ୍ବାଇର ମଲାଡ଼ ଅଞ୍ଚଳରେ ରେଖା ନିଷାଦ ନାମକ ଜଣେ ମହିଳା ନିଜ ସ୍ୱାମୀ ଓ ଦିଅରଙ୍କ ସହ ରହୁଥିଲେ । ଦିନକୁ ଦିନ ତାଙ୍କ ଘରେ ମୂଷାଙ୍କ ସଂଖ୍ୟା ବଢ଼ିବାରେ ଲାଗିଥିଲା । ଏମିତିକି ସେମାନେ ମହିଳାଙ୍କ ଘରର ଆସବାବ ପତ୍ର ମଧ୍ୟ କାଟି ନଷ୍ଟ କରିଦେଉଥିଲା । ଯାହାକୁ ନେଇ ସେ ଚିନ୍ତିତ ଥିଲେ । ତେଣୁ ସେ ଦିନେ ମୂଷାଙ୍କୁ ମାରିବା ପାଇଁ ଟମାଟୋ ଉପରେ ବିଷ ବୋଳି ଦେଇଥିଲେ । ହେଲେ ସେହି ଟମାଟୋ ଗୁଡିକୁ ମୂଷା ଖାଇବା ବଦଳରେ ସେ ନିଜେ ଅନ୍ୟମନସ୍କ ହୋଇ ମ୍ୟାଗିରେ ପକାଇ ଖାଇ ଦେଇଥିଲେ । ଯାହା ପରେ ଦିନକୁ ଦିନ ତାଙ୍କ ଅବସ୍ଥା ବିଗିଡ଼ିବାକୁ ଲାଗିଲା । ତେଣୁ ତାଙ୍କୁ ତୁରନ୍ତ ହସ୍ପିଟାଲରେ ଭର୍ତ୍ତି କରାଯାଇଥିଲା ।

ତେବେ ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ କୋଳାହଳ ଛାଇଯାଇଛି । ସୋସିଆଲ୍‌ ମିଡିଆରେ ଏହି ଖବର ଭାଇରାଲ୍ ହେବା ପରେ ଏହି ଦୁଃଖଦ ଖବରକୁ ନେଇ ଶୋକର ଛାୟା ଖେଳିଯାଇଛି ।