ପଶ୍ଚିମବଙ୍ଗ ଶିକ୍ଷକ ନିଯୁକ୍ତି ସ୍କାମରେ ଅଭିଯୁକ୍ତ ପାର୍ଥ ଚାଟାର୍ଜୀଙ୍କ ଘନିଷ୍ଠ ସହଯୋଗୀ ଅର୍ପିତା ମୁଖାର୍ଜୀଙ୍କ ଘରେ ଇଡି ରେଡ୍ ପରେ ତାଙ୍କର ଚାରିଟି କାର ଗାୟବ ଥିବା କୁହାଯାଉଛି । ଇଡି ପକ୍ଷରୁ ମିଳିଥିବା ସୂଚନା ଅନୁଯାୟୀ, ଅର୍ପିତାଙ୍କ ଏହି ଚାରିଟି କାର ତାଙ୍କ ଡାଇମଣ୍ଡ ସିଟି କମ୍ପ୍ଲେକ୍ସରୁ ଗାୟବ ହୋଇଛି । ଏଥିରୁ ଦୁଇଟି କାର ଅର୍ପିତାଙ୍କ ନାଁରେ ରହିଛି । ଡାଇମଣ୍ଡ ସିଟି ଫ୍ଲାଟରୁ ଅର୍ପିତାଙ୍କୁ ଗିରଫ କରାଯିବା ପରଠାରୁ ଏହି କାର ସବୁ ଉଭାନ୍ ହୋଇଯାଇଛି । ଏବେ ସିସିଟିଭି ଫୁଟେଜ ଆଧାରରେ କାରଗୁଡ଼ିକୁ ଖୋଜିବା ପାଇଁ ଉଦ୍ୟମ ଚାଲିଛି ।
Also Read
ଡାଇମଣ୍ଡ ସିଟି ଫ୍ଲାଟରୁ ଯେଉଁ ୪ଟି କାର ଗାୟବ ହୋଇଛି, ସେଥିମଧ୍ୟରୁ ଦୁଇଟି ଅର୍ପିତା ମୁଖାର୍ଜୀଙ୍କ ନାଁରେ ରହିଛି । ଏଥିରେ ଗୋଟିଏ ହୋଣ୍ଡା ସିଟି (WB 06T 6000) ଏବଂ ଅଡି (WB 02AB 9561) ରହିଥିଲା । ଏହାସହ ଏକ ମର୍ସିଡିସ୍ ଓ ହୋଣ୍ଡା ସିଆରଭି ମଦ୍ୟ ରହିଥିଲା । ଯେଉଁଥିରେ ଟଙ୍କା ଭର୍ତ୍ତ କରି ଗାୟବ କରାଯାଇଥିବା ଆଶଙ୍କା କରାଯାଉଛି । ଏହାପୂର୍ବରୁ ଗୁରୁବାର ଏନଫୋର୍ସମେଣ୍ଟ ନିର୍ଦ୍ଦେଶାଳୟ (ଇଡି) ଅର୍ପିତା ମୁଖାର୍ଜୀଙ୍କ ଆଉ ଏକ ଫ୍ଲାଟ ବିଷୟରେ ଜାଣିବାକୁ ପାଇଥିଲା । ଏହି ଫ୍ଲାଟ କୋଲକାତା ବିମାନବନ୍ଦର ନିକଟ ଚିନାର ପାର୍କରେ ରହିଛି । ରୟାଲ ରେସିଡେଣ୍ଟ ବିଲ୍ଡିଂର ଚତୁର୍ଥ ମହଲାର ଫ୍ଲାଟ ନମ୍ବର 404 ଅରପିତା ମୁଖାର୍ଜୀଙ୍କ ନାଁରେ ରହିଛି । ଏହି ବିଲ୍ଡିଂର ଆକାଉଣ୍ଟାଣ୍ଟଙ୍କ କହିବା ଅନୁଯାୟୀ, ଫ୍ଲାଟ୍ର ମେଣ୍ଟେନାନ୍ସ ବାବଦକୁ ଅନେକ ଟଙ୍କା ଅର୍ପିତାଙ୍କ ନାଁରେ ବକେୟା ରହିଛି । ଏନେଇ ଅର୍ପିତାଙ୍କୁ ଅନେକ ଥର ଯୋଗାଯୋଗ କରାଯିବା ପରେ ମଧ୍ୟ ଏଥିପ୍ରତି କର୍ଣ୍ଣପାତ କରିନାହାନ୍ତି ।
୨୩ ଜୁଲାଇରେ ଇଡି ପ୍ରଥମ ଥର ପାଇଁ ଅର୍ପିତାଙ୍କ ଫ୍ଲାଟ ଉପରେ ଚଢ଼ଉ କରିଥିଲା । ଏହି ସମୟ ମଧ୍ୟରେ ଇଡି ପାଖାପାଖି ୨୧ କୋଟି ଟଙ୍କା ଜବତ କରିଥିଲା । ଖାଲି ସେତିକି ନୁହେଁ, ଆର୍ପିଟାଙ୍କ ଘରୁ ୫୦ ଲକ୍ଷ ଟଙ୍କା ମୂଲ୍ୟର ଗହଣା ଓ ୨୦ଟି ମୋବାଇଲ ମଧ୍ୟ ଉଦ୍ଧାର କରିଥିଲା ଇଡି । ଅର୍ପିତାଙ୍କ ଘରୁ ପ୍ରାୟ ୬୦ ଲକ୍ଷ ଟଙ୍କାର ବିଦେଶୀ ମୁଦ୍ରା ମଧ୍ୟ ମିଳିଥିଲା । ଏହାପରେ ଅର୍ପିତା ମୁଖାର୍ଜୀଙ୍କୁ ଗିରଫ କରିଥିଲା ଇଡି ।
ଇଡି ଅର୍ପିତାଙ୍କୁ ଗିରଫ କରିବା ପରେ ଅନେକ ଦିଗରୁ ପଚାରାଉଚରା କରିଥିଲା । ସେଥିରୁ ଅର୍ପିତାଙ୍କ ଅନ୍ୟ କିଛି ସମ୍ପତ୍ତି ବିଷୟରେ ଜଣାପଡ଼ିଥିଲା । କୋଲକାତାର ବେଲଘରିଆରେ ଥିବା ଫ୍ଲାଟ ବିଷୟରେ ମଧ୍ୟ ଜାଣିବାକୁ ପାଇଥିଲା ଇଡି । ପରେ କବାଟ ଭାଙ୍ଗି ସେହି ଫ୍ଲାଟରେ ପଶିଥିଲା ଇଡି । ସେଠାରୁ ପ୍ରାୟ ୨୮ କୋଟି ଟଙ୍କା ନଗଦ ଜବତ କରାଯାଇଥିଲା । ଏଥିରେ କେବଳ ୨୦୦୦ ଟଙ୍କିଆ ଏବଂ ୫୦୦ ଟଙ୍କିଆ ନୋଟ୍ ଥିଲା । କୁହାଯାଉଛି ଯେ, ନୋଟଗୁଡିକ ୨୦ ଲକ୍ଷ ଏବଂ ୫୦ ଲକ୍ଷ ଲେଖାଏଁ ବିଡ଼ା କରି ରଖାଯାଇଥିଲା । ତେବେ ଦୁଇ ଦିନର ଚଢ଼ଉରେ ଅର୍ପିତାଙ୍କ ଘରୁ ପାଖାପାଖି ୫୦ କୋଟି ଟଙ୍କା ଚଢ଼ଉ କରିଥିଲା ଇଡି ।