ଅଗର୍ ମେସିନର ଖେଳ ଖତମ୍ । ଉତ୍ତରକାଶୀ ଟନେଲ ରେସ୍କ୍ୟୁ ଅପରେସନରେ ମୁଖ୍ୟ ଅସ୍ତ୍ର ସାଜିଥିଲା ଏହି ୨୫ ଟନ୍ ଓଜନର ଆମେରିକୀୟ ହେଭି ଡ୍ୟୁଟି ଡ୍ରିଲିଂ ମେସିନ । ହେଲେ ପୁଣିଥରେ ଲୁହା ବିମ୍ ବାଜିବାରୁ ଖାଲି ମେସିନ ଅଟକିନି, ବରଂ ତାର ବ୍ଲେଡ୍ ଗୁଡ଼ିକ ଖଣ୍ଡ ଖଣ୍ଡ ହୋଇଯାଇଛି । ଜେସିବି ମେସିନରେ ବୁହା ହୋଇ ଆସୁଛି ପଥର ଖୋଳି ଖୋଳି ଥକି ପଡ଼ିଥିବା ଭଙ୍ଗାରୁଜା ବ୍ଲେଡ୍ ।
ଅଗର ମେସିନ ଗତ ୧୬ ତାରିଖରୁ ସେଠାରେ କାମ ଆରମ୍ଭ କରିଥିଲା ଏବଂ ମାଟିପଥର ଅତଡ଼ାକୁ କଣା କରି କାଲି ସୁଦ୍ଧା ପ୍ରାୟ ୫୦ ମିଟର ଯାଏଁ ପାଇପ ବିଛାଇବାରେ ସଫଳ ହୋଇଥିଲା । ପଥର ଖୋଳିବା ବେଳେ ପୂର୍ବରୁ ମଧ୍ୟ ଲୁହା ପାଇପ ଓ ଲୁହା ବିମ୍ ଆଦି ବାଜିବାରୁ ଚାରିଥର ଅଟକିଥିଲା ଅଗର୍ ।ତେବେ ଏହା ସବୁଠୁ ଭରସାଯୋଗ୍ୟ ଭାରି ମେସିନ ହୋଇଥିବାରୁ, ତାକୁ ମରାମତି କରି କାମ ଆରମ୍ଭ ହେଉଥିଲା ।
Also Read
ହେଲେ ଏବେ ମେସିନ ଯେଉଁଭଳି କ୍ଷତିଗ୍ରସ୍ତ ହୋଇଛି, ତାକୁ ମରାମତି କରିବା ସମ୍ଭବ ନୁହେଁ ବୋଲି କହିଛନ୍ତି ସେଠାରେ ମୁତୟନ ଥିବା ଅନ୍ତର୍ଜାତୀୟ ଟନେଲ୍ ଏକ୍ସପର୍ଟ ଆର୍ନଲ୍ଡ ଡିକ୍ସ । ଖାଲି ଏତିକି ନୁହେଁ, ଅଗର ମେସିନର ଏକ ଅଂଶ ପଥରରେ ଅଟକିଯାଇଥିବାରୁ, ତାକୁ ବାହାର କରିବା ବି ନୂଆ ଚ୍ୟାଲେଞ୍ଜ ଆଣିଛି ।
ଅଗର ମେସିନକୁ କାଟି ବାହାର କରିବା ଲାଗି ହାଇଦ୍ରାବାଦରୁ ପ୍ଲାଜମା କଟର୍ ଆସୁଛି ଏବଂ ଆସନ୍ତାକାଲି ସକାଳ ସୁଦ୍ଧା ତାହା ପହଞ୍ଚିବା ପରେ ପୁଣି ଥରେ ଅପରେସନ ଆରମ୍ଭ ହେବ ବୋଲି କହିଛନ୍ତି ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମି ।
ଅଗର ମେସିନ ଡ୍ରିଲିଂ କଲାବେଳେ ବାଟରେ କିଛି ବାଧା ଆସୁଛି କି ନାହିଁ ଜାଣିବା ପାଇଁ ଅଣାଯାଇଥିଲା ଗ୍ରାଉଣ୍ଡ୍ ପେନିଟ୍ରେଟିଂ ରାଡାର୍ । ହେଲେ ଏହା ଗତକାଲି ଧୋକା ଦେଇଦେଲା । ଗତକାଲି ରାଡାର ମ୍ୟାପିଂରୁ ଜଣା ପଡ଼ିଥିଲା ଯେ, ୫ ମିଟର ଯାଏଁ କୌଣସି ଲୁହା ବିମ୍ କି କୌଣସି ବାଧା ନାହିଁ । ହେଲେ ଡ୍ରିଲିଂ ଆରମ୍ଭ ହେଉ ହେଉ ଅଗର ମେସିନର କାମ ତମାମ୍ ହୋଇଗଲା । ତେଣୁ ଏହା ଆଉ ବିଶ୍ୱାସନୀୟ ନୁହେଁ ।
ଏବେ ପ୍ରଶ୍ନ ଉଠୁଛି, ଆଗକୁ ଉପାୟ କ’ଣ ? ଟନେଲ ଭିତରୁ କେମିତି ବାହାରିବେ ୧୪ ଦିନ ହେଲା ଫସି ରହିଥିବା ୪୧ ଶ୍ରମିକ ? ପଥର ଖୋଳିବା ପାଇଁ ଆପଣାଯିବ କେଉଁ ପଦ୍ଧତି ? ସୂଚନା ଅନୁସାରେ, ଆସନ୍ତାକାଲି ପ୍ଲାଜମା କଟର୍ ଅଗର ମେସିନକୁ କାଟି ବାହାର କରିବା ପରେ, ମାନୁଆଲ୍ ଡ୍ରିଲିଂ କରାଯିବ । ଅର୍ଥାତ୍ ପାରଂପରିକ ପଦ୍ଧତିରେ ଉଦ୍ଧାରକାରୀ ଯବାନମାନେ ପଥର ଖୋଳିବା ଭଳି, ବାକି ପ୍ରାୟ ୧୦ରୁ ୧୨ ମିଟର ଖୋଳି ବାଟ ବାହାର କରିବେ ।
ଏଥିସହ ପାହାଡ଼ ଉପରୁ ତଳ ଆଡ଼କୁ ଏକ ଗାତ ଖୋଳି ଶ୍ରମିକଙ୍କୁ ବାହାର କରିବା ପାଇଁ ଚିନ୍ତା କରାଯାଉଛି । ଏଥିପାଇଁ ଏକ ବିରାଟ ମେସିନ ଓ ସତଲେଜ ଜଳ ବିଦ୍ୟୁତ ନିଗମ ଏବଂ ONGCର ୧୨ ଜଣିଆ ଟିମ୍ ପାହାଡ଼ ଉପରକୁ ବଡ଼ ମେସିନ ସହ ଯାଇଛି । ଶ୍ରମିକ ମାନେ ଫସିଥିବା ଟନେଲ୍ ଉପରେ ସିଧାସଳଖ ୮୫ରୁ ୯୦ ମିଟର ଗାତ ଖୋଳିବାକୁ ୫ରୁ୬ ଦିନ ସମୟ ଲାଗିବ ବୋଲି ଅନୁମାନ କରାଯାଉଛି ।
ଅପେକ୍ଷା ଓ ଅନିଶ୍ଚିତତାର ଦିନ ଗଡ଼ି ଚାଲିଥିବା ବେଳେ, ଉତ୍ତରକାଶୀ ଉଦ୍ଧାର କାର୍ଯ୍ୟ କେବେ ସରିବ, ସେ ଉତ୍ତର ଏବେ କାହା ପାଖରେ ନାହିଁ । ଏସବୁ ଭିତରେ ଫସିଥିବା ୫ ଓଡ଼ିଶା ଶ୍ରମିକଙ୍କ ସଂପର୍କୀୟଙ୍କୁ ଆଜି ବିମାନ ଯୋଗେ ଓଡ଼ିଶାରୁ ଉତ୍ତରକାଶୀକୁ ପଠାଇଛନ୍ତି ରାଜ୍ୟ ସରକାର ।