ବଡ଼ ଭୁଲ୍ ! ଗୋଟିଏ ପ୍ଲାଟଫର୍ମରେ ଛିଡ଼ା ହୋଇଥିଲେ ଯାତ୍ରୀ, ଆଉ ଗୋଟେ ପ୍ଲାଟଫର୍ମରୁ ଛାଡ଼ିଦେଲା ଟ୍ରେନ୍‌

ପୁଣି ସାମ୍ନାକୁ ଆସିଲା ରେଲୱେର ଏକ ବଡ଼ ଭୁଲ । ଟିକଟ କାଟି ଟ୍ରେନ୍‌କୁ ଅପେକ୍ଷା କରିଥିଲେ ଯାତ୍ରୀ । ହେଲେ ଷ୍ଟେସନ୍‌ରେ ରହିଲାନି ଟ୍ରେନ୍‌ । ଯାତ୍ରୀଙ୍କ ମଧ୍ୟରେ ତେଜିଲା ଅସନ୍ତୋଷ । ହୋହଲ୍ଲା ସହ ଷ୍ଟେସନ୍‌ ଅଧିକାରୀଙ୍କ ଉପରେ ବର୍ଷିଲେ ଲୋକେ । କର୍ତ୍ତୃପକ୍ଷ କହିଲେ ଘଟଣାର ତଦନ୍ତ କରାଯାଇ ନିଆଯିବ କାର୍ଯ୍ୟାନୁଷ୍ଠାନ ।

ଏଭଳି ଏକ ବଡ଼ ଭୁଲ ହୋଇଛି କର୍ଣ୍ଣାଟକ କୁଲବର୍ଗି ରେଳ ଷ୍ଟେସନ୍‌ରେ । ରବିବାର ହୁବଲି-ସିକନ୍ଦରବାଦ ଏକ୍ସପ୍ରେସ୍‌ (୧୭୩୧୯) ଟ୍ରେନ୍‌ ପ୍ଲାଟ୍‌ଫର୍ମ ନମ୍ବର ୧ରେ ଆସିବାର ଥିଲା । ହେଲେ ଅଚାନକ କୌଣସି କାରଣ ବଶତଃ ଏହାର ରୁଟ୍‌ ବଦଳିଗଲା । ଟ୍ରେନ୍‌ଟି ଏକ ନମ୍ବର ପ୍ଲାଟ୍‌ଫର୍ମ ବଦଳରେ ଆସିଲା ଅନ୍ୟ ପ୍ଲାଟ୍‌ଫର୍ମରେ । ଆଉ ସବୁଠାରୁ ବଡ଼ କଥା ହେଲା, ଏନେଇ ଷ୍ଟେସନ୍‌ରେ ଲାଗିଥିବା ଡିଜିଟାଲ ବୋର୍ଡରେ ଦିଆଯାଇନଥିଲା କୌଣସି ସୂଚନା । ଖାଲି ସେତିକି ନୁହେଁ ପ୍ରତ୍ୟେକ ଟ୍ରେନ୍‌ ସମ୍ବନ୍ଧରେ ମାଇକ୍‌ରେ କୁହାଯାଉଥିବା ବେଳେ ଉକ୍ତ ଟ୍ରେନ୍‌ ବିଷୟରେ କୌଣସି ପ୍ରକାର ଆନାଉନ୍ସମେଣ୍ଟ କରାଯାଇନଥିଲା । ଲୋକଙ୍କ କହିବା କଥା, ଟ୍ରେନ୍‌ ଆସିବ ବୋଲି ସମୟ ତ କୁହାଯାଇଥିଲା ହେଲେ, କେଉଁ ପ୍ଲାଟ୍‌ପର୍ମରେ ଆସିବ ସେନେଇ କୌଣସି ସୂଚନା ଦିଆଯାଇନଥିଲା ।

ଜାତୀୟ ଗଣମାଧ୍ୟମ ରିପୋର୍ଟ ଅନୁଯାୟୀ, ଏହି ତ୍ରୁଟି ସେତେବେଳେ ଜଣାପଡ଼ିଲା ଯେତେବେଳେ ଡିସ୍‌ପ୍ଲେ ବୋର୍ଡରୁ ଟ୍ରେନ୍‌ର ନାଁ କାଢ଼ି ଦିଆଗଲା । ଟ୍ରେନ୍‌ ନାଁ ଦେଖାନଯିବା ପରେ ଅପେକ୍ଷାରତ ଯାତ୍ରୀମାନେ ଷ୍ଟେସନ୍‌ମାଷ୍ଟରଙ୍କ ପାଖକୁ ଗଲେ ଆଉ ଜାଣିବାକୁ ପାଇଲେ ଯେ ଟ୍ରେନ୍ ଷ୍ଟେସନ୍ ଛାଡ଼ି ଯାଇସାରିଛି । ସେଥିପାଇଁ ବୋର୍ଡରେ ଆଉ ନାଁ ଦେଖାଯାଉ ନାହିଁ । ଷ୍ଟେସନ୍ ମାଷ୍ଟରଙ୍କ କଥା ଶୁଣିବା ପରେ ଯାତ୍ରୀମାନେ ଉତ୍‌କ୍ଷିପ୍ତ ହୋଇପଡ଼ିଲେ । ଆଉ କହିଲେ ବୋର୍ଡରେ ଟ୍ରେନ୍ ଆସିବାର ସମୟ କୁହାଯାଇଥିଲା, ହେଲେ ପ୍ଲାଟ୍‌ଫର୍ମ ବିଷୟରେ କିଛି ବି କୁହାଯାଇନଥିଲା । 

ରିପୋର୍ଟ ଅନୁଯାୟୀ, ହୁବଲି-ସିକନ୍ରାଦରାବାଦ ଏକ୍ସପ୍ରେସ ରବିବାର ସକାଳ ୬.୩୫ରେ କଲବୁର୍ଗି ଷ୍ଟେସନରେ ପହଞ୍ଚି, ୯ ମିନିଟ ରହିବା ପରେ ପରେ ୬.୪୪ରେ ଛାଡିଥିଲା । ଟ୍ରେନ୍ ଛାଡି ଚାଲିଯିବା ମାତ୍ରେ ହିଁ ଶହ ଶହ ଯାତ୍ରୀ ଷ୍ଟେସନ ମାଷ୍ଟରଙ୍କ ନିକଟରେ ପହଞ୍ଚି ହୋହଲ୍ଲା କରିଥିଲେ । ଷ୍ଟେସନ ମାଷ୍ଟର ଯେତେବେଳେ ଏନେଇ କର୍ମଚାରୀଙ୍କ ସହ ଆଲୋଚନା କରିଥିଲେ ସେତେବେଳେ ଜଣାପଡ଼ିଥିଲା ଯେ, ଶେଷ ମୁହୁର୍ତ୍ତରେ ଟ୍ରେନର ପ୍ଲାଟଫର୍ମ ବଦଳାଯାଇଥିଲା । କିନ୍ତୁ ଏନେଇ କୌଣସି ଘୋଷଣା କରାଯାଇନଥିଲା । 

ଡିସ୍‌ପ୍ଲେ ବୋର୍ଡରୁ ନାଁ କଢ଼ାଯିବା ପରେ ଲୋକଙ୍କର ସନ୍ଦେହ ହେଲା

ଯାତ୍ରୀମାନେ କହିଛନ୍ତି ଯେ ଯେତେବେଳେ ଇଲେକ୍ଟ୍ରୋନିକ୍ ଡିସ୍‌ପ୍ଲେ ବୋର୍ଡରେ ସକାଳ ୬.୩୨ ରେ ଟ୍ରେନ ପହଞ୍ଚିବାର ସମୟ ଦେଖାଯାଇଥିଲା, ସେତେବେଳେ ବି ପ୍ଲାଟଫର୍ମ ନେଇ କୌଣସି ସୂଚନା ଦିଆଯାଇନଥିଲା । ଏହା ପରେ, ଟ୍ରେନ୍ ୬.୪୨ରେ ପହଞ୍ଚିବ ବୋଲି କୁହାଗଲା, ସେତେବେଳେ ବି ପ୍ଲାଟଫର୍ମ ନେଇ କିଛି କୁହାଯାଇନଥିଲା । ୬.୪୫ରେ କିନ୍ତୁ ଡିସ୍‌ପ୍ଲେ ବୋର୍ଡରୁ ଟ୍ରେନ୍‌ର ନାଁ ହଟେଇ ଦିଆଗଲା । କିଛି ମିନିଟ୍ ଅପେକ୍ଷା କରିବା ପରେ ଯାତ୍ରୀମାନେ ବିରକ୍ତ ହେବାକୁ ଲାଗିଲେ।

କ୍ଷମା ମାଗିଲେ ଷ୍ଟେସନ୍‌ ମାଷ୍ଟର

ଯାତ୍ରୀମାନଙ୍କ ହୋହଲ୍ଲା ଓ ଅସନ୍ତୋଷ ଦେଖି ଷ୍ଟେସନ ମାଷ୍ଟର ପିଏ ନର୍ଗୁଣ୍ଡକର, ଏଭଳି ତ୍ରୁଟି ପାଇଁ ଯାତ୍ରୀଙ୍କୁ କ୍ଷମା ପ୍ରାର୍ଥନା କରିଛନ୍ତି । ଏହାସହ ସେମାନଙ୍କ ଅଲଗା ଟ୍ରେନ୍‌ର ବ୍ୟବସ୍ଥା ବି କରିଛନ୍ତି ।