ଦ୍ୱିତୀୟ ଥର ପାଇଁ ସୋନିଆ ଗାନ୍ଧିଙ୍କୁ ଇଡିର ପଚରାଉଚରା

ନେସନାଲ ହେରାଲ୍ଡ ମାମଲାରେ ଆଜି ପୁଣି ପ୍ରବର୍ତ୍ତନ ନିର୍ଦ୍ଦେଶାଳୟ ତଥା ଇଡିରେ ହାଜର ହୋଇଛନ୍ତି କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧି । ଦ୍ୱିତୀୟ ଥର ପାଇଁ ଆସୋସିଏଟେଡ୍ ଜର୍ଣ୍ଣାଲ ଓ ନେସନାଲ୍ ହେରାଲଡ କାରବାର ନେଇ ସୋନିଆଙ୍କୁ ପଚରାଉଚରା କରାଯାଉଛି । ଇଡି ଅଫିସକୁ ଯିବାବେଳେ ସୋନିଆଙ୍କ ସହ ଗାଡ଼ିରେ ପୁଅ ରାହୁ ଓ ଝିଅ ପ୍ରିୟଙ୍କା ଗାନ୍ଧି ଥିଲେ ।

ସୋମବାର ଦିନ ହାଜର ହେବା ପାଇଁ ଗତ ଶୁକ୍ରବାର ଦିନ ଇଡି ପକ୍ଷରୁ ସୋନିଆଙ୍କୁ ସମନ କରାଯାଇଥିଲା । ପରେ ପୁଣି ଏହାକୁ ଦିନଟିଏ ଘୁଞ୍ଚାଇ ଦିଆଯାଇଥିଲା । ନୂଆ ସମନ ଅନୁସାରେ ସୋନିଆ ଆଜି ଇଡିରେ ହାଜର ହୋଇଛନ୍ତି ।

ପୂର୍ବରୁ ମଧ୍ୟ ଗତ ଗୁରୁବାର ଦିନ ଦୁଇ ଘଣ୍ଟା ପାଇଁ ଇଡି ସୋନିଆଙ୍କୁ ପଚରାଉଚରା କରିଥିଲା । ସେଦିନ ସୋନିଆଙ୍କୁ ଇଡି ପ୍ରାୟ ୨୪ଟି ପ୍ରଶ୍ନ ପଚାରିଥିଲା । ଏସବୁ ଆସୋସିଏଟେଡ୍ ଜର୍ଣ୍ଣାଲ ଓ ନେସନାଲ ହେରାଲ୍ଡ କାରବାର ସହ ଜଡ଼ିତ ଥିଲା । ତେବେ ସୋନିଆ ଓ ରାହୁଲଙ୍କୁ ବାରମ୍ବାର ଇଡି ସମନ କରିବାକୁ ନେଇ କଂଗ୍ରେସ ତୀବ୍ର ପ୍ରତିକ୍ରିୟା ପ୍ରକାଶ କରିଛି । ଏହାସହ ଦେଶବ୍ୟାପୀ ବିକ୍ଷୋଭ କରାଯାଇଛି ।

ଆକ୍ରୋଶମୂଳକ ରାଜନୀତି କରି ଶାସକ ବିଜେପି ଏଭଳି କରୁଥିବା କଂଗ୍ରେସ ନେତା କହିଛନ୍ତି । ସେପଟେ କଂଗ୍ରେସ ନେତା ରାହୁଲ ଗାନ୍ଧିଙ୍କୁ ୫ ଦିନରେ ୫୦ ଘଣ୍ଟା ଧରି ପଚରାଉଚରା କରିଥିଲା ପ୍ରବର୍ତ୍ତନ ନିର୍ଦ୍ଦେଶାଳୟ । ଗତ ଏପ୍ରିଲରେ ଏହି ମାମଲାରେ କଂଗ୍ରେସ ନେତା ମଲ୍ଲିକାର୍ଜୁନ୍‌ ଖର୍ଗେ ଓ ପଓ୍ୱନ ବନସାଲଙ୍କୁ ଇଡି ପ୍ରଚାର କରିସାରିଛି ।

ସୋନିଆଙ୍କୁ ଜେରା ପ୍ରତିବାଦରେ କଂଗ୍ରେସର ଦେଶବ୍ୟାପି ବିକ୍ଷୋଭ :-

ସୋନିଆ ଗାନ୍ଧୀଙ୍କୁ ଇଡି ନୋଟିସ ପ୍ରସଙ୍ଗରେ ଆଜି ରାଜ୍ୟ କଂଗ୍ରେସ ପକ୍ଷରୁ ପ୍ରତିବାଦ ସହ ସତ୍ୟାଗ୍ରହ କରାଯାଇଛି । ରାଜଧାନୀରେ ଥିବା କଂଗ୍ରେସ ଭବନ ସମ୍ମୁଖରେ କଂଗ୍ରେସ ନେତା ଓ କର୍ମୀ ସତ୍ୟାଗ୍ରହରେ ବସିଛନ୍ତି । ଏଥିରେ ପିସିସି ସଭାପତି ଶରତ ପଟ୍ଟନାୟକଙ୍କ ଅଧକ୍ଷତାରେ ବହୁ ବରିଷ୍ଠ ନେତା ସମେତ ବିଧାୟକମାନେ ସାମିଲ ହୋଇଛନ୍ତି । କେନ୍ଦ୍ରରେ ଶାସନ କରୁଥିବା କେନ୍ଦ୍ର ସରକାର ଗଣତନ୍ତ୍ରକୁ ହତ୍ୟା କରୁଛି ବୋଲି ଅଭିଯୋଗ କରିଛି କଂଗ୍ରେସ । କଂଗ୍ରେସ ଭୟରେ ଇଡିକୁ ବିଜେପି ବ୍ୟବହାର କରୁଥିବା କଂଗ୍ରେସ ଅଭିଯୋଗ କରିଛି । ଏହା ପୂର୍ବରୁ ମଧ୍ୟ ଏହି ପ୍ରସଙ୍ଗରେ ଇଡି ଅଫିସ ଘେରାଉ କରିଥିଲା କଂଗ୍ରେସ ତାସହ ସମସ୍ତ ଜିଲ୍ଲାରେ ମଧ୍ୟ ପ୍ରତିବାଦ ଓ ବିରୋଧ କରାଯାଇଥିଲା ।