ଜନ୍ମ ଦିନରେ ପ୍ରଧାନମନ୍ତ୍ରୀ ମୋଦିଙ୍କୁ କାହିଁକି ଛୁଟି ନେବାକୁ କହିଲେ ଶାହରୁଖ..?

ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ୭୨ ତମ ଜନ୍ମ ଦିନ । ସାରା ଦେଶରେ ମୋଦିଙ୍କ ଜନ୍ମ ଦିନକୁ ଭିନ୍ନ ଭିନ୍ନ ଢ଼ଙ୍ଗରେ ପାଳୁଛନ୍ତି ଜନତା । କିଏ ନିଜ ଚା ଦୋକାନରେ ମାଗଣା ଚା ଓ ରସଗୋଲା ବାଣ୍ଟି ମନାଉଛନ୍ତି ତ ଆଉ କିଏ ପୂଜା ପାଠ କରି ମୋଦିଙ୍କ ଦୀର୍ଘାୟୁ କାମନା କରୁଛନ୍ତି । ଦେଶର କୋଣ ଅନୁକୋଣରୁ ଆଜି ସକାଳୁ ତାଙ୍କ ପାଖକୁ ଶୁଭେଚ୍ଛାର ସୁଅ ଛୁଟୁଛି । କେବଳ ଦେଶ କାହିଁକି ବିଦେଶରୁ ମଧ୍ୟ ମୋଦିଙ୍କୁ ଜନ୍ମ ଦିନର ଢେର୍ ସାରା ଶୁଭେଚ୍ଛା ଆସୁଛି । ବିଭିନ୍ନ ଦେଶର ରାଷ୍ଟ୍ରପତି, ପ୍ରଧାନମନ୍ତ୍ରୀଙ୍କଠାରୁ ଆରମ୍ଭ କରି ବଡ଼ ବଡ଼ ବ୍ୟକ୍ତିତ୍ୱ ତାଙ୍କୁ ଅଭିନନ୍ଦନ ଜଣାଇଛନ୍ତି । 

ଏହାରି ଭିତରେ ଅନେକ ସେଲିବ୍ରିଟି ମଧ୍ୟ ତାଙ୍କୁ ନିଆରା ଢ଼ଙ୍ଗରେ ନିଜ ନିଜ ଷ୍ଟାଇଲ୍‌ରେ ଜନ୍ମ ଦିନର ଶୁଭେଚ୍ଛା ଜଣାଇଛନ୍ତି । ସେଥିମଧ୍ୟରୁ ବଲିଉଡ୍‌ର କିଙ୍ଗ୍‌ଖାନ୍‌ ଶାହାରୁଖ ଖାନ୍‌ ମଧ୍ୟ ଶୁଭେଚ୍ଛା ଜଣାଇଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପାଇଁ କିଙ୍ଗ୍‌ ଖାନ୍‌ ଏକ ସୁନ୍ଦର ପୋଷ୍ଟ ଲେଖିଛନ୍ତି । ଯାହା କି ଚର୍ଚ୍ଚାର ବିଷୟ ପାଲଟିଛି । ଶାହାରୁଖ ଲେଖିଛନ୍ତି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନିଜ କାର୍ଯ୍ୟରୁ ଗୋଟିଏ ଦିନର ଛୁଟି ନେଇ ଜନ୍ମ ଦିନ ପାଳନ କରନ୍ତୁ ଏବଂ ଏନ୍‌ଜଏ କରନ୍ତୁ ।

ମୋଦିଙ୍କୁ ଶୁଭେଚ୍ଛା ଜଣାଇବା ପାଇଁ ଅନେକ ସେଲିବ୍ରିଟି ସୋସିଆଲ ମିଡିଆର ସାହାରା ନେଇଛନ୍ତି । ଶାହାରୁଖ ଖାନ୍‌ ମଧ୍ୟ ନିଜ ଅଫିସିଆଲ ଟ୍ୱିଟର ହ୍ୟାଣ୍ଡେଲ ବ୍ୟବହାର କରିଛନ୍ତି । ସେ ମୋଦିଙ୍କ ପାଇଁ ଲେଖିଛନ୍ତି, ‘ଦେଶ ଏବଂ ଦେଶବାସୀଙ୍କ ପାଇଁ ଆପଣ ଯେଉଁଭଳି ଅହରହ କାମ କରୁଛନ୍ତି  ତାହା ନିହାତି ଭାବେ ସ୍ୱାଗତ ଯୋଗ୍ୟ । ଆପଣଙ୍କୁ ଲକ୍ଷ୍ୟସ୍ଥଳରେ ପହଞ୍ଚିବା ପାଇଁ ସେତିକି ସାମର୍ଥ୍ୟ ଓ ଶକ୍ତି ମିଳୁ । ଗୋଟିଏ ଦିନର ଛୁଟି ନିଅନ୍ତୁ ଏବଂ ଜନ୍ମ ଦିନକୁ ପାଳନ କରି ଉପଭୋଗ କରନ୍ତୁ ।’

ଅନ୍ୟପଟେ ଆଜି ଜନ୍ମ ଦିନ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନାମିବ୍ୟାରୁ ଆସିଥିବା ଚିତା ବାଘ ଗୁଡିକୁ ମଧ୍ୟପ୍ରଦେଶର କୁନୋ ଜାତୀୟ ଉଦ୍ୟାନରେ ଛାଡିଛନ୍ତି । ଯାହାକୁ ନେଇ ପୁରା ଦେଶରେ ଚର୍ଚ୍ଚା । ତେବେ କୁନୋ ଜାତୀୟ ଉଦ୍ୟାନରେ ଚିତା ଛାଡ଼ିବା ଅବସରରେ ପ୍ରଧାନମନ୍ତ୍ରୀ ନିଜ ବକ୍ତବ୍ୟ ରଖିଛନ୍ତି ।

ସେ କହିଛନ୍ତି, ‘ବର୍ଷ ବର୍ଷ ଧରି ଚିତାଙ୍କ ପାଇଁ କିଛି ପଦକ୍ଷେପ ନିଆଯାଇନି । ଦୁର୍ଭାଗ୍ୟର କଥା ୧୯୫୨ରେ ଚିତା ଅବଲୁପ୍ତ ବୋଲି ଆମେ ଘୋଷଣା କରିଥିଲୁ । ହେଲେ ଦେଶରେ ପୁଣି ଥରେ ଚିତାଙ୍କ ଥଇଥାନ ପାଇଁ ୧୯୫୨ରୁ ଏପର୍ଯ୍ୟନ୍ତ ଦଶନ୍ଧି ଦଶନ୍ଧି ଧରି କିଛି ପଦକ୍ଷେପ ନିଆଗଲାନି । ବଡ଼ କଥା ହେଲା ଆଜାଦୀ କା ଅମୃତ ମହୋତ୍ସବ ବେଳେ ଚିତା ପୁଣି ଫେରିଛନ୍ତି । ସୁନେଲୀ ଭବିଷ୍ୟତ ପାଇଁ ଅତୀତ ମଉକା ଦେଇଛି । ତେବେ ଚିତାଙ୍କୁ ଦେଖିବାକୁ ଲୋକଙ୍କୁ କିଛି ମାସ ଅପେକ୍ଷା କରିବାକୁ ପଡ଼ିବ । ସେମାନେ ଆମର ଅତିଥି, ଏଠାକୁ ନୂଆକରି ଆସିଛନ୍ତି, ଏଠାକାର ପାଣିପବନ ଜାଣନ୍ତିନି । ଏଠାକାର ପରିବେଶ ସହ ମିଶିଗଲେ, ଆମେ ସେମାନଙ୍କୁ ଦେଖିପାରିବା ବୋଲି ସେ କହିଛନ୍ତି ।’