ନୱାବ୍‌ଙ୍କ ସାଂଘାତିକ ଅଭିଯୋଗ; ଧର୍ମ ପରିବର୍ତ୍ତନ କରିଛନ୍ତି ସମୀର ୱାଙ୍ଖଡେ!

ନୂଆଦିଲ୍ଲୀ: ସମୀର ୱାଙ୍ଖଡେଙ୍କ ଥମୁନି ଚର୍ଚ୍ଚା । ଦୁଇଟି ବିବାହ କରି ପୁଣି ଚର୍ଚ୍ଚାର ବିଷୟ ପାଲଟିଛନ୍ତି ସମୀର । କେବଳ ବିବାହ ନୁହେଁ ବରଂ ନିଜ ଧର୍ମ ପରିବର୍ତ୍ତନ କରିଥିବାର ଖବର ମଧ୍ୟ ବେଶ ଭାଇରାଲ ହେବାରେ ଲାଗିଛି । ନିକଟରେ ମହାରାଷ୍ଟ୍ରର ମନ୍ତ୍ରୀ ନୱାବ୍ ମଲିକ୍ ମଧ୍ୟ ସମୀରଙ୍କ ଫର୍ଜୀ ବାର୍ଥ ସାର୍ଟିଫିକେଟ୍ ସେୟାର କରିବା ସହ ଧର୍ମ ପରିବର୍ତ୍ତନ କରି ଚାକିରି କରିଥିବାର ଅଭିଯୋଗ କରିଛନ୍ତି । ଏସବୁ ଅଭିଯୋଗର ଖଣ୍ତନ କରି ସମୀର ୱାଙ୍ଖଡେଙ୍କ ସ୍ତ୍ରୀ କ୍ରାନ୍ତି ରେଡକର୍ ପ୍ରତିକ୍ରିୟା ରଖିଛନ୍ତି ।

ସମୀର ୱାଙ୍ଖଡେଙ୍କ ପତ୍ନୀ କ୍ରାନ୍ତି ରେଡକର୍‌ ସ୍ୱାମୀଙ୍କ ନାମରେ ରହିଥିବା ଅଭିଯୋଗକୁ ଭିତ୍ତିହୀନ କହିବା ସହ ସମୀର ଜଣେ ହିନ୍ଦୁ ବୋଲି ସ୍ପଷ୍ଟ କରିଛନ୍ତି । ସେ ଏହି ବାର୍ତ୍ତାଟି ଟ୍ୱିଟ ମାଧମରେ ଲୋକଙ୍କୁ ଜଣାଇଛନ୍ତି । ସେ କହିଛନ୍ତି ଯେ ତାଙ୍କ ବିବାହ ସମ୍ପୂର୍ଣ୍ଣ ଭାବେ ହିନ୍ଦୁ ରିତିନୀତି ସହ ହୋଇଛି । ସେ ସମସ୍ତ ଧର୍ମକୁ ଆଦର କରୁଥିବାର ମଧ୍ୟ କହିଛନ୍ତି । ସେ ଟ୍ୱିଟରରେ ନିଜ ବିବାହର ଦୁଇଟି ଫଟୋ ମଧ୍ୟ ସେୟାର କରିଛନ୍ତି । ତାଙ୍କ କହିବା ଆନୁଯାୟୀ ସମୀରଙ୍କ ବାପା ହିନ୍ଦୁ ଅଟନ୍ତି, କିନ୍ତୁ ତାଙ୍କ ଶାଶୁ ଅର୍ଥାତ ସମୀରଙ୍କ ମା’ ମୁସଲିମ ଥିଲେ । ଯିଏ କି ବର୍ତ୍ତମାନ ଏ ଦୁନିଆରେ ନାହାନ୍ତି । ସମୀରଙ୍କ ପୂର୍ବ ବିବାହ ସ୍ୱତନ୍ତ୍ର ବିବାହ ନିୟମ ଅଧିନରେ ହୋଇଥିବା କଥା ମଧ୍ୟ କ୍ରାନ୍ତି ଟ୍ୱିଟ ମାଧ୍ୟମରେ କହିଛନ୍ତି । ସମୀର ତାଙ୍କ ପୂର୍ବ ପତ୍ନୀଙ୍କୁ ୨୦୧୬ ରେ ଛାଡପତ୍ର ଦେଇଥିଲେ । ଏହାପରେ ୨୦୧୭ ରେ ହିନ୍ଦୁ ରିତିନୀତି ଅନୁଯାୟୀ ତାଙ୍କର ସମୀରଙ୍କ ସହ ବିବାହ ହୋଇଥିବା ମଧ୍ୟ କହିଛନ୍ତି ।

ନିକଟରେ ମହାରାଷ୍ଟ୍ର ମନ୍ତ୍ରୀ ନୱାବ ମଲିକ ଅଭିଯୋଗ କରିଥିଲେ କି ସମୀର ଫର୍ଜୀ ସାର୍ଟିଫିକେଟ ବନାଇ ଚାକିରି କରିଛନ୍ତି । ଏନେଇ ସେ ଏକ ଫଟୋ ମଧ୍ୟ ସେୟାର କରିଥିଲେ, ଯେଉଁଥିରେ ସମୀରଙ୍କ ବାପାଙ୍କ ନାମ ‘ଦାଉଦ କେ ୱାଙ୍ଖଡେ’ ଲେଖା ହୋଇଛି ଏବଂ ତାଙ୍କ ଧର୍ମ ଜାଗାରେ ମୁସଲିମ ଲେଖା ହୋଇଛି । ଏହି ଟ୍ୱିଟ ପରେ କମାଲ ଆର୍ ଖାନ୍ ମଧ୍ୟ ଏକ ଟ୍ୱିଟରେ ସମୀରଙ୍କ ଠଟା ଉଡାଇଛନ୍ତି । ସେ କହିଛନ୍ତି ଯେ ସମୀର ପିଲା ବେଳୁ ହିଁ ଠକେଇର ସରଦାର ରହିଛନ୍ତି । ସମୀରଙ୍କ ନାମରେ ଦାଉଦ ରହିଥିବା ହେତୁ ସେ ଏଭଳି ଫର୍ଜୀ କରିବା ସ୍ୱାଭାବିକ ବୋଲି କମାଲ ଖାନ୍ କହିଛନ୍ତି ।

ସମୀର ଏହି ଅଭିଯୋଗ ବିପକ୍ଷରେ ପ୍ରେସମିଟ୍‌ରେ କହିଛନ୍ତି ଯେ, ‘ମୁଁ ବହୁ ଧାର୍ମିକ ପରିବାରରୁ ଆସିଛି, ମୋ ବାପା ଜ୍ଞାନଦେବ ୱାଙ୍କଡେ ଜଣେ ଅବସରପ୍ରାପ୍ତ ପୋଲିସ ଅଧିକାରୀ ଏବଂ ମୋ ମୃତ ମା’ ଜାହିଦା ମୁସଲମାନ ପରିବାରର ଅଟନ୍ତି’ । ସେ ସମସ୍ତ ଧର୍ମକୁ ଆଦର କରନ୍ତି ବୋଲି ମଧ୍ୟ କହିଛନ୍ତି । ସେ ତାଙ୍କ ପୂର୍ବ ପତ୍ନୀଙ୍କ ବିଷୟରେ ମଧ୍ୟ କହିଥିଲେ କି ୨୦୧୬ ରେ ସେ ସବାନା ଖୁରେସିଙ୍କୁ ଛାଡପତ୍ର ଦେଇ ସାରିଛନ୍ତି । ଏହା ପରେ ସେ କ୍ରାନ୍ତି ଦିନାନାଥ ରେଡକର୍‌ଙ୍କୁ ବିବାହ କରିଥିଲେ । ତାଙ୍କ ଉପରେ ଲଗାଯାଇଥିବା ସମସ୍ତ ଅଭିଯୋଗ ସମ୍ପୂର୍ଣ୍ଣ ଭାବେ ଭିତ୍ତିହୀନ ବୋଲି ସେ କହିଛନ୍ତି ।

ଗତକାଲି ସମୀରଙ୍କ ନାମରେ ଏକ ସଙ୍ଗୀନ ଅଭିଯୋଗ କରିଛନ୍ତି ପ୍ରଭାକର, ଯିଏକି କ୍ରୁଜ ଡ୍ରଗ୍ସ ପାର୍ଟି ମାମଲାରେ ସା‍କ୍ଷୀ ରହିଛନ୍ତି । ସେ କହିଛନ୍ତି ଯେ ଶାହାରୁଖଙ୍କ ପୁଅ ଆର୍ୟନଙ୍କୁ ଛାଡିବା ପାଇଁ ଏନସିବି ସମୀର ୨୫ କୋଟି ଟଙ୍କା ଡିମାଣ୍ତ କରିଛି । ଯେଉଁଥିରେ ସମୀରଙ୍କୁ ୮ କୋଟି ଟଙ୍କା ମିଳିଥାନ୍ତା । ତେବେ ଏହି ସବୁ ଅଭିଯୋଗ ପରେ ଦେଶରେ ଚର୍ଚ୍ଚାର ବିଷୟ ପାଲଟିଛନ୍ତି ସମୀର ୱାଙ୍କଡେ ।