ଆଜି ଚତୁର୍ଥ ଥର ଲାଗି ଇଡିରେ ହାଜର ହୋଇଛନ୍ତି ରାହୁଲ ଗାନ୍ଧି । ଗତ ୧୪, ୧୫ ଓ ୧୬ ତାରିଖ ତିନି ଦିନ ଧରି ଲଗାତାର ରାହୁଲ ଗାନ୍ଧିଙ୍କୁ ଘାଣ୍ଟିଥିଲା ପ୍ରବର୍ତ୍ତନ ନିର୍ଦ୍ଦେଶାଳୟ (ED) । ୩ ଦିନରେ ୨୫ ଘଂଟାରୁ ଅଧିକ ସମୟ ଧରି ଜେରା କରିଥିଲା ଇଡି । ନାସନାଲ ହେରାଲ୍ଡ ଆର୍ଥିକ ହେରଫେର ମାମଲାରେ ରାହୁଲ ଗାନ୍ଧିଙ୍କୁ ଜେରା କରୁଛି ଇଡ଼ି ।
ନ୍ୟାସନାଲ୍ ହେରାଲ୍ଡ ଖବରକାଗଜ ସଂସ୍ଥାକୁ ଆସୋସିଏଟେଡ୍ ଜର୍ଣ୍ଣାଲ୍ସ ଠାରୁ କିଣିଥିବା କଂପାନୀ ୟଙ୍ଗ୍ ଇଣ୍ଡିଆନ୍ ଲିମିଟେଡ୍ର ବୋର୍ଡ ଅଫ୍ ଡିରେକ୍ଟର୍ସ ଅଛନ୍ତି ସୋନିଆ ଏବଂ ରାହୁଲ ଗାନ୍ଧି । ତେଣୁ ଏହି ମାମଲାରେ ଉଭୟଙ୍କ ସଂପୃକ୍ତି ସନ୍ଦେହ ଘେରରେ ଥିବାରୁ ରାହୁଲଙ୍କୁ ଜେରା କରାଯାଉଛି । ଆସୋସିଏଟେଡ ଜର୍ଣ୍ଣାଲ୍ସ ଲିମିଟେଡ୍ର ରାହୁଲଙ୍କ ପଦବୀ କଣ ଥିଲା? ୟଙ୍ଗ୍ ଇଣ୍ଡିଆନ୍ ଲିମିଟେଡ୍ ସହିତ ସଂପର୍କ କଣ? ସେନେଇ ପ୍ରଶ୍ନବାଣରେ ଘାଇଲା କରୁଛି ଇଡି ।
Also Read
ସେପଟେ କେବେଳ ନାସନାଲ୍ ହେରାଲ୍ଡ ନୁହଁ, ଅନେକ ପ୍ରସଙ୍ଗରେ କଂଗ୍ରେସକୁ ଟାର୍ଗେଟ କରିବା ସହ ଇଡିକୁ ହାତ ବାରସି କରି ବିଜେପି ଏଭଳି କରୁଥିବା କହିଛନ୍ତି ମଲିକାର୍ଜୁନ ଖରଗେ । ଏହାକୁ ନେଇ ଦିଲ୍ଲୀର ଜନ୍ତର ମନ୍ତର କଂଗ୍ରେସ ତରଫରୁ ସତ୍ୟାଗ୍ରହ ଜାରି ରହିଛି । ଅନ୍ୟପଟେ କଂଗ୍ରେସର ଆରୋପ ନେଇ ପ୍ରତିକ୍ରିୟା ରଖିଛନ୍ତି ବିଜେପି ମୁଖପାତ୍ର ସମ୍ବିତ ମହାପାତ୍ର । ସେ କହିଛନ୍ତି 'ଏ ଦେଶରେ କିଏ ରଜା ନୁହଁ କି ରାଣୀ ନୁହଁ, ଯାହାକୁ କିଏ ବି ପଚରା ଉଚରା କରିବନି। ଯିଏ ଭ୍ରଷ୍ଟାଚାର କରିଛି ସେ ତଦନ୍ତର ସାମନା କରିବାକୁ କାହିଁକି ଡରୁଛି' ବୋଲି ସେ ପାଲଟା ପ୍ରଶ୍ନ କରିଛନ୍ତି ।