ଭାରତର ବଡ଼ ଧନୀ: ପକେଟ୍‌ରେ ଟଙ୍କା ନଥାଏ କି ପାଖରେ କାର୍ଡ ବି ନଥାଏ

ଚର୍ଚ୍ଚାରେ ମୁକେଶ ଅମ୍ବାନୀ । ସୋସିଆଲ ମିଡିଆରେ ତାଙ୍କର ଏକ ପୁରୁଣା ଭିଡିଓ ବେଶ୍‌ ଭାଇରାଲ ହେବାରେ ଲାଗିଛି । ଏହି ଭିଡିଓରେ ସେ ଏକ ସାକ୍ଷାତ୍‌କାର ଦେଉଛନ୍ତି । ଆଉ ଏହି ସାକ୍ଷାତ୍‌କାରକୁ ନେଇ ବଢିଛି ଚର୍ଚ୍ଚା । ଭିଡିଓ ଦେଖିବା ପରେ ସମସ୍ତେ ଆଶ୍ଚର୍ଯ୍ୟ ହୋଇଯାଇଥିଲେ । କାରଣ ମୁକେଶ ନିଜେ କହିଛନ୍ତି ମୁଁ କେବେ ପକେଟ୍‌ରେ ଟଙ୍କା ରଖେନାହିଁ । ଏହା ମୋର ପିଲାଦିନରୁ ଅଭ୍ୟାସ ରହିଛି । ଖାଲି ଟଙ୍କା ନୁହେଁ ବରଂ କ୍ରେଡିଟ୍‌ କାର୍ଡ ବି ରୁହେନାହିଁ । ଏକଥା କହିବା ପରେ ସେ ନିଜେ ହସିବାକୁ ଲାଗିଛନ୍ତି । ଯାହାର ଭିଡିଓ ଏବେ ବି ସୋସିଆଲ ମିଡିଆରେ ଗୋଟିଏ ମୋବାଇଲରୁ ଅନ୍ୟ ମୋବାଇଲକୁ ଘୂରି ବୁଲୁଛି ।

ରିଲାଏନ୍ସ ଇଣ୍ଡଷ୍ଟ୍ରିଜ୍ ଲିମିଟେଡ୍‌ର ଅଧ୍ୟକ୍ଷ ତଥା ଏସିଆର ସବୁଠାରୁ ଧନୀ ଶିଳ୍ପପତି ମୁକେଶ ଅମ୍ବାନୀ କେବଳ ଆମ ଦେଶରେ ନୁହେଁ, ସମଗ୍ର ବିଶ୍ୱରେ ବେଶ୍‌ ପ୍ରସିଦ୍ଧ ଅର୍ଥାତ୍‌ ତାଙ୍କୁ ସମସ୍ତେ ଜାଣନ୍ତୁ । ହୁରୁନ୍ ଗ୍ଲୋବାଲ୍ ରିଚ୍ ତାଲିକା ଅନୁଯାୟୀ ରିଲାଏନ୍ସ ଇଣ୍ଡଷ୍ଟ୍ରିଜ୍ ଚେୟାରମ୍ୟାନ୍ ତଥା ଏମଡି ମୁକେଶ ଅମ୍ବାନୀ ହେଉଛନ୍ତି ଏକମାତ୍ର ଭାରତୀୟ ଯିଏକି ବିଶ୍ୱର ଶ୍ରେଷ୍ଠ ୧୦ ଧନୀ ତାଲିକାରେ ସାମିଲ ହୋଇଛନ୍ତି । ତେଣୁ ତାଙ୍କର ପ୍ରତ୍ୟେକ କଥା ବା ସାକ୍ଷାତ୍‌କାର ଭାଇରାଲ ହେବା ସ୍ୱାଭାବିକ ।

ତେବେ ମୁକେଶ ଅମ୍ବାନୀଙ୍କର ଏକ ପୁରୁଣା ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି । ଏହି ସାକ୍ଷାତ୍‌କାର ସମୟରେ ଯେତେବେଳେ ମୁକେଶ ଅମ୍ବାନୀଙ୍କୁ ପଚରାଯାଇଥିଲା ଯେ ଆପଣଙ୍କ ପାଇଁ ଅର୍ଥର ମୂଲ୍ୟ କ’ଣ ? ସେ ଦେଇଥିବା ଉତ୍ତର ଶୁଣି ଆପଣ ଆଶ୍ଚର୍ଯ୍ୟ ହୋଇଯିବେ । କାରଣ ସେ ଅତି ଭଦ୍ର ଭାବରେ କହିଥିଲେ ଯେ ‘ବ୍ୟକ୍ତିଗତ ଭାବେ ଖୁବ୍ କମ୍ ଲୋକ ଏକଥା ଜାଣନ୍ତି ଯେ ପିଲାଦିନରୁ ବର୍ତ୍ତମାନ ପର୍ଯ୍ୟନ୍ତ ମୁଁ ମୋ ପକେଟରେ ଟଙ୍କା ରଖେ ନାହିଁ ।

ମୋର କୌଣସି କ୍ରେଡିଟ୍ କାର୍ଡ ବି ନାହିଁ।’ ବିଲ୍‌ ପୈଠ ପାଇଁ ତ‌ାଙ୍କ ସହ କେହି ନା କେହି ନିଶ୍ଚୟ ଥ‌ାଆନ୍ତି ବୋଲି ସେ କହୁଥିବାର ଭିଡିଓରେ ଶୁଣିବାକୁ ମିଳିଛି । ତେବେ ଅମ୍ବାନୀ ଏତେ ଧନୀ ହେବା ପରେ ବି ପକେଟ୍‌ରେ ଟଙ୍କା କି କ୍ରେଡିଟ୍‌ କାର୍ଡ ନେଉନଥିବା କଥା ସହଜରେ ବିଶ୍ୱାସ ହେଉନଥିଲେ ବି ପୂରା ସତ ।