ଧାର୍ମିକ ପୋଷାକ ପିନ୍ଧିବା ଲାଗି ଜିଦ୍ କରିପାରିବେନି ଛାତ୍ରଛାତ୍ରୀ । କର୍ଣ୍ଣାଟକ ହିଜାବ ବ୍ୟାନ ମାମଲାର ଶୁଣାଣି କରି ଗତକାଲି ଏହି ନିର୍ଦ୍ଦେଶ ଦେଇଛନ୍ତି ହାଇକୋର୍ଟ । ହିଜାବ ପ୍ରସଙ୍ଗକୁ ନେଇ ରାଜ୍ୟବ୍ୟାପୀ ଉତ୍ତେଜନା ଦୃଷ୍ଟିରେ ଶାନ୍ତିଶୃଙ୍ଖଳା ସୁନିଶ୍ଚିତ କରାଯିବା ଉପରେ କୋର୍ଟ ଗୁରୁତ୍ୱ ଦେଇଛନ୍ତି । ଏଥିସହିତ ୩ ଦିନ ଛୁଟି ଘୋଷଣା କରାଯାଇଥିବା ଶିକ୍ଷାନୁଷ୍ଠାନ ଗୁଡିକୁ ତୁରନ୍ତ ଖୋଲିବାକୁ କହିଛନ୍ତି କୋର୍ଟ । ସୋମବାର ହାଇକୋର୍ଟରେ ମାମଲାର ପରବର୍ତ୍ତୀ ଶୁଣାଣି ହେବ ।
କର୍ଣ୍ଣାଟକରେ ହିଜାବ ସପକ୍ଷବଦୀ ଛାତ୍ରଗୋଷ୍ଠୀଙ୍କୁ ଧକ୍କା ଲାଗିଛି । କର୍ଣ୍ଣାଟକ ହାଇକୋର୍ଟଙ୍କ ପରବର୍ତ୍ତୀ ନିର୍ଦ୍ଦେଶ ଆସିବା ଯାଏଁ ଧାର୍ମିକ ପୋଷାକ ପିନ୍ଧିବା ଲାଗି ଜିଦ୍ କରିପାରିବେ ନାହିଁ ଛାତ୍ରଛାତ୍ରୀ । ଶିକ୍ଷାନୁଷ୍ଠାନରେ ହିଜାବ ବ୍ୟାନ ମାମଲାକୁ ନେଇ ଗତକାଲି ହାଇକୋର୍ଟରେ ଶୁଣାଣି ହୋଇଥିଲା ମୁଖ୍ୟ ବିଚାରପତି ଜଷ୍ଟିସ ରିତୁରାଜ ଅବସ୍ତି, ଜଷ୍ଟିସ କ୍ରିଷ୍ଣା ଏସ ଦିକ୍ଷିତ, ଏବଂ ଜଷ୍ଟିସ ଜେ.ଏମ୍. ଖାଜିଙ୍କୁ ନେଇ ୩ ଜଣିଆ ଖଣ୍ଡପୀଠ ମାମଲାର ଶୁଣାଣି କରିଥିଲେ । ରାଜ୍ୟରେ ଶାନ୍ତିଶୃଙ୍ଖଳା ବଜାୟ ରହିବା ନିହାତି ଦରକାର ବୋଲି କୋର୍ଟ କହିଛନ୍ତି । ସେହିପରି ହିଜାବ ବ୍ୟାନକୁ ବିରୋଧ କରି ରାଜ୍ୟବ୍ୟାପୀ ବିକ୍ଷୋଭ ଓ ଉତ୍ତେଜନା ଦୃଷ୍ଟିରୁ ସ୍କୁଲ ଓ କଲେଜକୁ ୩ ଦିନ ବନ୍ଦ ରଖିବା ଲାଗି ରାଜ୍ୟ ସରକାରଙ୍କ ନିଷ୍ପତ୍ତି କୋର୍ଟ ବଦଳାଇ ଦେଇଛନ୍ତି । ତୁରନ୍ତ ସ୍କୁଲ - କଲେଜ ଖୋଲିବା ଲାଗି ନିର୍ଦ୍ଦେଶ ଦେଇଛନ୍ତି ହାଇକୋର୍ଟ । ଆସନ୍ତା ସୋମବାର କୋର୍ଟ ମାମଲାର ପରବର୍ତ୍ତୀ ଶୁମାଣି କରିବେ ।
ଶିକ୍ଷାନୁଷ୍ଠାନରେ ହିଜାବକୁ ବ୍ୟାନ କରିବା ସହ ଏକପ୍ରକାର ୟୁନିଫର୍ମ ପିନ୍ଧିବା ଲାଗି ନିର୍ଦ୍ଦେଶନାମା ଜାରି କରିଥିଲେ ରାଜ୍ୟ ସରକାର ଶିକ୍ଷାନୁଷ୍ଠାନରେ ସମାନତା ରକ୍ଷା ଲାଗି ଏହି ନିଷ୍ପତ୍ତି ନିଆଯାଇଥିବା ସରକାରଙ୍କ ତରଫରୁ କୁହାଯାଇଥିଲା । ତେବେ ଏହାକୁ ବିରୋଧ କରି ରାଜ୍ୟବ୍ୟାପୀ ପ୍ରତିବାଦ ଆରମ୍ଭ ହୋଇଥିଲା । କିଛି ଶିକ୍ଷାନୁଷ୍ଠାନରେ ହିଜାବ ସପକ୍ଷବାଦୀ ଓ ବିପକ୍ଷବାଦୀ ମୁହାଁମୁହିଁ ହେବାରୁ ଉତ୍ତେଜନା ପ୍ରକାଶ ପାଇଥିଲା ପରେ ସରକାର ବିଭିନ୍ନ ଶିକ୍ଷାନୁଷ୍ଠାନରେ ୧୪୪ ଧାରା ଲଗାଇବା ସହିତ ୩ ଦିନ ଲାଗି ଛୁଟି ଘୋଷଣା କରିଥିଲେ ।
ସେପଟେ ମାମଲା ହାଇକୋର୍ଟରେ ପହଞ୍ଚିବା ପରେ ଜଷ୍ଟିସ କ୍ରିଷ୍ଣା ଏସ ଦିକ୍ଷିତଙ୍କୁ ନେଇ ଗଠିତ ଜଣିକିଆ ଖଣ୍ଡପୀଠରେ ଏହାର ଶୁଣାଣି ହୋଇଥିଲା । ତେବେ ମାମଲାର ଗୁରୁତ୍ୱ ଦୃଷ୍ଟିରୁ ଏହାକୁ ୩ ଜଣିଆ ଖଣ୍ଡପୀଠକୁ ସ୍ଥାନାନ୍ତର କରାଯାଇଥିଲା । ସୋମବାର କୋର୍ଟରେ ମାମଲାର ପରବର୍ତ୍ତୀ ଶୁଣାଣି ହେବାକୁ ଥିବା ବେଳେ ଆଗକୁ ହିଜାବ ବିବାଦ କେଉଁ ମୋଡ ନେଉଛି ତା ଉପରେ ନଜର ରହିଛି ।