ଦିଲ୍ଲୀର ଆପ୍ ସରକାରକୁ ଅଡୁଆ ଅବକାରୀ ନୀତି । ଅବକାରୀ ନୀତି ପ୍ରସ୍ତୁତିରେ ହୋଇଛି କି ବଡ଼ ଡିଲ୍? ଦିଲ୍ଲୀ, ପଞ୍ଜାବ ଓ ହାଇଦ୍ରାବାଦରେ ଇଡିର ମେଗା ରେଡ୍ । ବିବାଦୀୟ ଦିଲ୍ଲୀ ଏକ୍ସାଇଜ ପଲିସିକୁ ନେଇ ବିବାଦ ଥମି ନଥିବା ବେଳେ, ଏବେ ପୁଣି ଶାସକ ଦଳ ଆପ୍ ପାଇଁ ଏହା ଅଡୁଆ ବଢ଼ାଇଛି । ଦିଲ୍ଲୀ ଏବଂ ପଞ୍ଜାବର ତିନି ଡଜନରୁ ଅଧିକ ସ୍ଥାନରେ ଚଢ଼ାଉ କରିଛି ପ୍ରବର୍ତ୍ତନ ନିର୍ଦ୍ଦେଶାଳାୟ ବା ଇଡି । ଗୁରୁବାର ଦିଲ୍ଲୀର ମଦ ବ୍ୟବସାୟୀ ଇଣ୍ଡୋସ୍ପିରିଟ୍ ଗ୍ରୁପ୍ର ଏମଡି ସମୀର ମହେନ୍ଦ୍ରଙ୍କୁ ଗିରଫ କରିବାର ଦିନକ ପରେ ଗତକାଲି ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ।
ଦିଲ୍ଲୀ ନୂଆ ମଦ ନୀତିରେ ଅନିୟମିତତା ଅଭିଯୋଗକୁ ନେଇ ଗତକାଲି ଦ୍ୱିତୀୟ ଥର ପୁଣି ବଡ଼ ଧରଣର ଚଢ଼ାଉ କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ –ଇଡି । ଦିଲ୍ଲୀ, ପଞ୍ଜାବ ଓ ହାଇଦ୍ରାବାଦର ପ୍ରାୟ ୩୫ଟି ସ୍ଥାନରେ ଚଢ଼ାଉ ହୋଇଛି । ଆମ୍ ଆଦମୀ ପାର୍ଟିର ସରକାର ପାଇଁ ଏବେ ତଣ୍ଟିର କଣ୍ଟା ପାଲଟିଛି ମଦ ନୀତି ବିବାଦ । ପୂର୍ବରୁ ଏହି ମାମଲାରେ ସିବିଆଇ ଯାଞ୍ଚ କରିଥିଲା, ଯାଞ୍ଚ ଆଧାରରେ ଟଙ୍କା ନେଣ ଦେଣର ଅଭିଯୋଗ ଆସିବା ପରେ ପ୍ରଥମେ ସିବିଆଇ ଏବଂ ପରେ ଇଡି ମାମଲାକୁ ନେଇ ଆକ୍ସନ ମୋଡକୁ ଆସିଛି । ପୂର୍ବରୁ ବି ଅନେକ ଥର ରେଡ୍ ହୋଇଛି, ଗିରଫଦାରୀ ବି ହୋଇଛି । ସମାନ ଆକ୍ସନ ଆଗକୁ ବି ଜାରି ରହିବ ବୋଲି ଆଶଙ୍କା କରାଯାଉଛି ।
Also Read
ଆର୍ଥିକ ବର୍ଷ ୨୦୨୧ ଓ ୨୦୨୨ରେ ଆପ୍ ସରକାର ମଦ ନୀତି ଜରିଆରେ ଦୁର୍ନୀତିରେ ସଂପୃକ୍ତ ଥିବା ଅଭିଯୋଗ ହୋଇଛି । ଦିଲ୍ଲୀ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କ ବିରୋଧରେ ଥାନାରେ ମାମଲା ରୁଜୁ ହୋଇଛି । ଉଭୟ ଇଡି ଏବଂ ସିବିଆଇ ସିସୋଦିଆଙ୍କ ବିରୋଧରେ ମାମଲା ରୁଜୁ କରି କରିବା ସହ ତାଙ୍କ ଘର ଓ ବ୍ୟାଙ୍କ ଲକର୍ ଘାଣ୍ଟିଛନ୍ତି । ସେପଟେ ଗତକାଲିର ଏହି ରେଡକୁ ନେଇ ଟୁଇଟ କରି କେଜ୍ରିଓ୍ୱାଲ କହିଛନ୍ତି ଯେ, ୫୦୦ରୁ ଅଧିକ ରେଡ୍ ହେଲାଣି, ୩ ମାସରୁ ଅଧିକ ସମୟ ଧରି ସିବିଆଇ/ଇଡିର ୩୦୦ରୁ ଅଧିକ ଅଧିକାରୀ କେବଳ ମନୀଷ ସିସୋଦିଆଙ୍କ ବିରୋଧରେ ପ୍ରମାଣ ଯୋଗାଡ଼ ପାଇଁ ୨୪ ଘଣ୍ଟା ଲାଗି ରହିଛନ୍ତି । କିଛି ବି ମିଳୁନାହିଁ, କାହିଁକିନା ସେ କିଛି ବି ଭୁଲ୍ କରିନାହାନ୍ତି । ନିଜର ହୀନ ରାଜନୀତି ପାଇଁ ଏଭଳି ଅଧିକାରୀଙ୍କ ସମୟ ବରବାଦ କରାଯାଉଛି । ଏମିତିରେ ଦେଶ ଆଗକୁ ବଢ଼ିବ କି? ବୋଲି ପଚାରିଛନ୍ତି କେଜ୍ରିଓ୍ୱାଲ ।
ଏହି ମାମଲାରେ ଗତ ସେପ୍ଟେମ୍ବରରେ ବ୍ୟବସାୟୀ ବିଜୟ ନାୟାର ଏବଂ ସମୀର ମହେନ୍ଦ୍ର ଗିରଫ ହୋଇଛନ୍ତି । ଇଡିର FIR ଅନୁସାରେ ଇଣ୍ଡୋସ୍ପିରିଟ୍ ଗ୍ରୁପର ଏମଡି ସମୀର ମହେନ୍ଦ୍ରଙ୍କ ଦ୍ୱାରା ସିସୋଦିଆଙ୍କ ନିକଟତମ ସହଯୋଗୀଙ୍କୁ ଦୁଇଟି କିସ୍ତିରେ ବିପୁଳ ପରିମାଣର ଟଙ୍କା ଦିଆଯାଇଥିଲା । ସିବିଆଇର ଏତଲା ଅନୁସାରେ ସିସୋଦିଆଙ୍କ ସହଯୋଗୀ ଅର୍ଜୁନ ପାଣ୍ଡେ ଏଣ୍ଟରଟେନମେଣ୍ଟ ଆଣ୍ଡ୍ ଇଭେଣ୍ଟ ମ୍ୟାନଜମେଣ୍ଟ କମ୍ପାନୀର ପୂର୍ବ ସିଇଓ ବିଜୟ ନାୟାରଙ୍କ ତରଫରୁ ସମୀର ମହେନ୍ଦ୍ରଙ୍କ ଠାରୁ ମୋଟ ୨ରୁ ୪କୋଟି ନଗଦ ନେଇଥିଲେ । ଏହି ମାମଲାରେ ଗତ ୧୬ ସେପ୍ଚେମ୍ବରରେ ହାଇଦ୍ରାବାଦର ୨୫ଟି ଠିକଣା ସହ ମୋଟ ୪୦ଟି ସ୍ଥାନରେ ରେଡ୍ ହୋଇଥିଲା । ୬ ସେପ୍ଟେମ୍ବରରେ ମଧ୍ୟ ବିଭିନ୍ନ ରାଜ୍ୟରେ ଚଢ଼ାଉ କରି ୨ ଜଣଙ୍କୁ ଗିରଫ କରିଥିଲା ଇଡି। ସେମାନଙ୍କ ମଧ୍ୟରେ ଜଣେ ହେଉଛନ୍ତି ବିଜୟ ନାୟାର ।