୨୨ ଦିନ ମଜୁରିଆଙ୍କ ଆକାଉଣ୍ଟକୁ ଆସିଲା ୮୦ କୋଟି ଟଙ୍କା, ଦେଲା କିଏ..?

ଦିନ ମଜୁରିଆଙ୍କ ଆକାଉଣ୍ଟରେ କୋଟି କୋଟି ଟଙ୍କା । କେଉଁଠୁ ଆସିଲା କିଏ ଦେଲା କେହି ଜାଣି ନାହାନ୍ତି । ପୋଲିସର ମୁଣ୍ଡ ବି ଗୋଲ । ମଧ୍ୟ ପ୍ରଦେଶର ବାଲଘାଟରୁ ସାମ୍ନାକୁ ଆସିଛି ଏଭଳି ଏକ ଅଜବ ଘଟଣା । ବାରାସିବନିର ପ୍ରାୟ ୨୨ ଜଣ ଦିନ ମଜୁରିଆଙ୍କ ବ୍ୟାଙ୍କ ଆକାଉଣ୍ଟକୁ ଅଚାନକ ଆସିଲା ୮୦ କୋଟି ଟଙ୍କା । କିନ୍ତୁ ଗୁରୁତ୍ୱପୂର୍ଣ୍ଣ କଥା ହେଲା, ଏହି ଟଙ୍କା ବିଷୟରେ କୌଣସି ବି ଶ୍ରମିକ ଜାଣିନାହାନ୍ତି । କେଉଁଠୁ ଏହି ଟଙ୍କା ଆସିଲା, କିଏ ପଠାଇଲା, ତାହା ସେମାନଙ୍କୁ ଜଣାନାହିଁ ।

ଆଉ ଏହାଠାରୁ ବି ବଡ଼ ରୋଚକ କଥା ହେଲା, ସେମାନଙ୍କ ନାଁରେ ବ୍ୟାଙ୍କରେ ଆକାଉଣ୍ଟ ଖୋଲା ଯାଇଛି, ତାହା ମଧ୍ୟ ସେମାନେ ଜାଣିନାହାନ୍ତି । ତାଙ୍କ ଆକାଉଣ୍ଟରେ ଟଙ୍କା କୋଟି କୋଟି ଟଙ୍କା ଥିବା କଥା ସେମାନେ ସେତେବେଳେ ଜାଣିଥିଲେ ଯେତେବେଳେ ମୁମ୍ବାଇ ପୋଲିସର ଏକ ସାଇବର କ୍ରାଇମ୍‌ ୟୁନିଟ୍ ସେମାନଙ୍କ ଘରେ ପହଞ୍ଚିଥିଲା । ଅଧିକାରୀମାନେ ପହଞ୍ଚି ଟଙ୍କା କେଉଁଠୁ ଆସିଲା ବୋଲି ଦିନ ମଜୁରିଆଙ୍କୁ ପଚରାଉଚରା କରିଥିଲେ । ହେଲେ ଏହି ପ୍ରଶ୍ନର ଉତ୍ତର ସେମାନେ ଦେଇପାରିନଥିଲେ । ପୋଲିସ ଏହି ଘଟଣାର ଏବେ ତଦନ୍ତ କରୁଛି ।

ବ୍ୟାଙ୍କରେ ଆକାଉଣ୍ଟ ଅଛି ବୋଲି ଜାଣିନଥିଲେ ଦିନ ମଜୁରିଆ

ସାଇବର କ୍ରାଇମ ୟୁନିଟ ଯେତେବେଳେ ଦିନ ମଜୁରିଆଙ୍କ ଘରେ ପହଞ୍ଚି ତାଙ୍କୁ ଏହି ଟଙ୍କା ବାବଦରେ ପଚାରିଥିଲା, ସେତେବେଳେ ଏହା ଶୁଣି ଶ୍ରମିକମାନେ ଆଶ୍ଚର୍ଯ୍ୟ ହୋଇଯାଇଥିଲେ । ଆଉ କହିଥିଲେ ‘ଆମ ନାଁରେ ବ୍ୟାଙ୍କ ଆକାଉଣ୍ଟ ଅଛି ବୋଲି ଆମେ ଜାଣି ନାହୁଁ । ଏମିତିକି କୋଟିରେ କେତେଟା ଶୂନ ରହୁଛି ତାହା ମଧ୍ୟ ଆମେ ଜାଣି ନାହୁଁ ।’

ଦିନ ମଜୁରିଆଙ୍କଠାରୁ ଏଭଳି କଥା ଶୁଣିବା ପରେ ପୋଲିସର ସନ୍ଦେହ ହେଲା, ଏମାନଙ୍କ ପରିଚୟପତ୍ରକୁ ବ୍ୟବହାର କରି କେହି ଜଣେ ଦୁର୍ବତ୍ତ ଫେକ୍‌ ଆକାଉଣ୍ଟ ଖୋଲିଛି । ଆଉ ଏହି ଫେକ୍‌ ଆକାଉଣ୍ଟ ମାଧ୍ୟମରେ କଳା ଟଙ୍କା ନେଣ ଦେଣ କରାଯାଉଛି । ଏହି ସବୁ ଫେକ୍‌ ଆକାଉଣ୍ଟ ଭୋପାଲଠାରୁ ପ୍ରାୟ ୪୬୦ କିଲୋମିଟର ଦୂରରେ ଥିବା ମହାରାଷ୍ଟ୍ର ସୀମାକୁ ଲାଗିଥିବା ବାରାସିବନୀର ଏକ ପ୍ରାଇଭେଟ ବ୍ୟାଙ୍କରେ ଖୋଲାଯାଇଥିବା ପୋଲିସ କହିଛି ।

ତେବେ କୋଟି କୋଟି ଟଙ୍କା ନେଣ ଦେଣ ନେଇ ଯେତେବେଳେ ପୋଲିସ ୫ ଜଣ ଦିନ ମଜୁରିଆଙ୍କୁ ନୋଟିସ କରିଥିଲା, ସେତେବେଳେ ସେମାନେ ଏକଥା ଜାଣିନଥିବା କହିବା ସହ ସେଥିମଧ୍ୟରୁ କିଛି ଜଣ ପୋଲିସର ଦ୍ୱାରସ୍ଥ ମଧ୍ୟ ହୋଇଥିଲେ । ଏମିତିକି ପରେ ସୂଚନା ମିଳିଛି ଯେ, କିଛି ଦିନ ପୂର୍ବରୁ ଜଣେ ଠକ ବ୍ୟକ୍ତି ଉକ୍ତ ଦିନ ମଜୁରିଆଙ୍କଠାରୁ ସେମାନଙ୍କ ପରିଚୟପତ୍ର ନେଇଥିଲା । ଆଉ କହିଥିଲା ବ୍ୟାଙ୍କ ଆକାଉଣ୍ଟ ଖୋଲିଦେବ । କିନ୍ତୁ ୪-୫ ଦିନ ପରେ ସେ ବ୍ୟାଙ୍କ ଆକାଉଣ୍ଟ ଖୋଲି ହେବ ନାହିଁ ବୋଲି କହିଥିଲା ।

ତେବେ ଏହି ଘଟଣା ନେଇ ପୋଲିସ ଏବେ ସୁଦ୍ଧା କୌଣସି ନିଷ୍କର୍ଷରେ ପହଞ୍ଚି ପାରି ନାହିଁ । ଘଟଣାର ତଦନ୍ତ ଚାଲିଛି । ବିଭିନ୍ନ ସ୍ଥାନରେ ଚଢ଼ାଉ କରାଯାଉଛି । କେଉଁଠୁ ଟଙ୍କା ଡିପୋଜିଟ କରଯାଇଛି ସେନେଇ ମଧ୍ୟ ପୋଲିସ ତଦନ୍ତ କରୁଛି ।