ଦିଲ୍ଲୀରେ ପୁଣି ଦ୍ରୁତ ଗତିରେ ମାଡ଼ିଲାଣି କରୋନା । ଦିନକରେ ୧ ହଜାର ୯ ଜଣ ପଜିଟିଭ ଚିହ୍ନଟ ହୋଇଥିବାବେଳେ ଜଣକର ମୃତ୍ୟୁ ହୋଇଛି ।
ତେବେ ରାଜଧାନୀରେ କରୋନାର ପଜିଟିଭିଟି ହାର ୫ ଦଶମିକ ୭କୁ ବୃଦ୍ଧି ପାଇଛି । ବିଶେଷ କରି ଏପ୍ରିଲ ୧୧ରୁ ୧୮ ତାରିଖରେ ମଧ୍ୟରେ ପଜିଟିଭିଟି ହାର ୩ ଗୁଣା ବୃଦ୍ଧି ପାଇଥିବାରୁ ଚିନ୍ତା ବଢ଼ିଛି । ଦିଲ୍ଲୀ ସ୍ୱାସ୍ଥ୍ୟ ବିଭାଗ ପକ୍ଷରୁ ଏହି ସୂଚନା ଦିଆଯାଇଛି । ଦିଲ୍ଲୀରେ ଯେତେ ସଂକ୍ରମିତ ଚିହ୍ନଟ ହୋଇଛନ୍ତି, ତାହା ଦେଶର ମୋଟ ସଂକ୍ରମିତଙ୍କର ୩୦ ପ୍ରତିଶତ ରହିଥିବା ଜଣାପଡିଛି।
Also Read
ହସ୍ପିଟାଲରେ ଭର୍ତ୍ତି ହେଉଥିବା ଆକ୍ରାନ୍ତଙ୍କ ସଂଖ୍ୟା ୩ ପ୍ରତିଶତରୁ କମ୍ ରହିଛି । ବଢୁଥିବା କରୋନାକୁ ଦୃଷ୍ଟିରେ ରଖି ଦିଲ୍ଲୀ ସରକାର ପୁଣି ଥରେ ମାସ୍କ ପିନ୍ଧିବା ନିୟମକୁ କଡ଼ାକଡ଼ି କରିଛନ୍ତି । ବିଶେଷ କରି ସର୍ବସାଧାରଣ ଓ ଗହଳି ସ୍ଥାନରେ ନିହାତି ଭାବେ ମାସ୍କ ପିନ୍ଧିବାକୁ କୁହାଯାଇଛି ନ ହେଲେ ୫ ଶହ ଟଙ୍କା ଫାଇନ୍ ଦେବାକୁ ପଡ଼ିବ ବୋଲି ନିଷ୍ପତ୍ତି ନିଆଯାଇଛି ।
ଗୋଟିଏପଟେ ଦିଲ୍ଲୀରେ ସଂକ୍ରମଣ ବୃଦ୍ଧି ପାଉଥିବା ବେଳେ ଅନ୍ୟପଟେ ଓଡ଼ିଶାରେ ମୁହଁ ମୁକୁଳା। ନା ଏଠି କେହି ମାସ୍କ ପିନ୍ଧୁଛନ୍ତି ନା କେହି କୋଭିଡ୍ ନିୟମକୁ ଠିକ୍ ଭାବେ ପାଳନ କରୁଛନ୍ତି। ସର୍ବସାଧାରଣ ସ୍ଥାନ, ମାର୍କେଟ, ମଲ୍ ସବୁଠି ଲୋକମାନେ ଖୁଲମଖୁଲା ନିୟମକୁ ଉଲ୍ଲଂଘନ କରୁଥିବା ନଜର ଆସିଛି। ଯଦି ବେଳ ବେଳ ଥାଉ ଥାଉ ଲୋକମାନେ ସଚେତନ ନହୁଅନ୍ତି ଓ ପୂର୍ବଭଳି ନିୟମକୁ କଡ଼ାକଡ଼ି ପାଳନ ନକରନ୍ତି ତା’ହେଲେ ଦିଲ୍ଲୀ ଭଳି ଓଡ଼ିଶାରେ ମଧ୍ୟ ସ୍ଥିତି ଉପୁଜିପାରେ।