Harassment By Professors: ନିର୍ଯାତନା ସହି ନପାରି ଜୀବନ ହାରିଦେଲେ ଡାକ୍ତରୀ ଛାତ୍ରୀ, ଦୁଇ ପ୍ରଫେସରଙ୍କ ନାଁରେ ଲେଖିଛନ୍ତି ଏମିତି…

ମୁଁ ଚାହୁଁଛି ସେମାନେ ଜେଲ୍ ଯାଆନ୍ତୁ । ସେମାନେ ମୋତେ ନିର୍ଯାତନା ଦେଇଛନ୍ତି । ମାନସିକ ଯନ୍ତ୍ରଣା ଦେଇଛନ୍ତି । ଅପମାନିତ କରିଛନ୍ତି । ମୁଁ ଦୀର୍ଘ ଦିନ ଧରି ଚାପରେ ଅଛି । ମୁଁ ଚାହୁଁଛି ଏବେ ସେମାନେ ବି ସେଇଆ ଭୋଗନ୍ତୁ । ଏମିତି ଜୀବନ ବଞ୍ଚିବାକୁ ଇଚ୍ଛା ନାହିଁ । ସୁଇସାଇଡ୍ ନୋଟରେ ଏମିତି ଲେଖି ଜୀବନ ହାରି ଦେଇଛନ୍ତି ଦିଲ୍ଲୀର ଜଣେ ବିଡିଏସ୍ ଛାତ୍ରୀ ।

ଗ୍ରେଟର ନଏଡାର ଏକ ଘରୋଇ ବିଶ୍ୱବିଦ୍ୟାଳୟରେ ଜ୍ୟୋତି ଶର୍ମା ନାମ୍ନୀ ଏହି ଛାତ୍ରୀ ଦ୍ୱିତୀୟ ବର୍ଷରେ ପଢୁଥିଲେ । ଜଣେ ଡାକ୍ତର ହେବା ସ୍ୱପ୍ନ ଦେଖି ବିଡିଏସ (ବ୍ୟାଚେଲର ଅଫ ଡେଣ୍ଟାଲ ସର୍ଜରୀ)ରେ ସେ ଗତ ବର୍ଷ ଆଡମିଶନ ନେଇଥିଲେ । ଗତ ରାତିରେ ସେ ତାଙ୍କ ହଷ୍ଟେଲ ରୁମରେ ଆତ୍ମହତ୍ୟା କରିଛନ୍ତି। ତାଙ୍କ ଘର ଗୁରୁଗ୍ରାମରେ । ଏହି ଆତ୍ମହତ୍ୟା ପାଇଁ ସେ ତାଙ୍କର ଦୁଇ ଜଣ ପ୍ରଫେସର ଓ ବିଶ୍ୱବିଦ୍ୟାଳୟ ପ୍ରଶାସନକୁ ଦାୟୀ କରିଛନ୍ତି । ଏହି ଘଟଣାରେ ଦିଲ୍ଲୀରେ ପ୍ରତିବାଦର ସ୍ୱର ଉଠିଛି ।

ଜ୍ୟୋତି ଶର୍ମାଙ୍କ ହଷ୍ଟେଲ ରୁମରୁ ମିଳିଥିବା ସୁଇସାଇଡ ନୋଟରେ ସେ ସିଧାସଳଖ ଦୁଇ ଶିକ୍ଷକଙ୍କୁ ଦାୟୀ କରିଛନ୍ତି । ଏହି ମାନସିକ ଚାପ ଯୋଗୁଁ ଦୀର୍ଘଦିନ ଧରି ସେ ଅତ୍ୟଧିକ ଡିପ୍ରେସନରେ ଥିଲେ ଏବଂ ଆଉ ବଞ୍ଚିବାର ଇଚ୍ଛା ତାଙ୍କର ନଥିଲା। ଏହା ସେ ସେଥିରେ ଉଲ୍ଲେଖ କରିଛନ୍ତି ।

ଜ୍ୟୋତିଙ୍କ ପରିବାରର ଅଭିଯୋଗ ଆଧାରରେ ପୋଲିସ ଦୁଇ ଅଭିଯୁକ୍ତ ଶିକ୍ଷକଙ୍କୁ ଗିରଫ କରିଛି।

ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ଏହି ଦୁଇ ଶିକ୍ଷକଙ୍କୁ ତଦନ୍ତ ରିପୋର୍ଟ ଆସିବା ପର୍ଯ୍ୟନ୍ତ ନିଲମ୍ବନ କରିଛି । ବିଶ୍ୱବିଦ୍ୟାଳୟର ପବ୍ଲିକ ରିଲେସନ ଅଫିସର ଡକ୍ଟର ଅଜିତ କୁମାର କହିଛନ୍ତି ଯେ ଯେଉଁମାନେ ଦୋଷୀ ସାବ୍ୟସ୍ତ ହେବେ, ତାଙ୍କ ବିରୁଦ୍ଧରେ କଡ଼ା କାର୍ଯ୍ୟାନୁଷ୍ଠାନ ନିଆଯିବ।

ଏହି ଘଟଣା ପରେ ବିଶ୍ୱବିଦ୍ୟାଳୟରେ ଛାତ୍ରଛାତ୍ରୀମାନେ ପ୍ରତିବାଦ ପ୍ରଦର୍ଶନ କରିଛନ୍ତି । ଏହି କାରଣରୁ କ୍ୟାମ୍ପସରେ ଉତ୍ତେଜନା ଦେଖାଦେଇଛି।

ଜ୍ୟୋତିଙ୍କ ମା’ ଏହି ଘଟଣାକୁ ଆତ୍ମହତ୍ୟା ନୁହେଁ, ବରଂ ହତ୍ୟା ବୋଲି ଅଭିଯୋଗ କରିଛନ୍ତି ଏବଂ ବିଶ୍ୱବିଦ୍ୟାଳୟ ପ୍ରଶାସନ ଉପରେ ଦୋଷାରୋପ କରିଛନ୍ତି। ପୋଲିସ ଏହି ମାମଲାରେ ତଦନ୍ତ ଜାରି ରଖିଛି ।

ଅଧିକ ପଢ଼ନ୍ତୁ: ପୋଲିସ ଖୋଲିଦେଲା ଛାଙ୍ଗୁର ବାବାର ମୁଖା, ଆରଏସଏସର ନାଁ ବ୍ୟବହାର କରି...