ଏ କି ପ୍ରକାର ପାଗଳାମି ! ପ୍ରେମିକା ସହ ଝଗଡ଼ା ପରେ ରେଲୱେ ସିଗନାଲ୍‌ ବକ୍ସ ନଷ୍ଟ କରିଦେଲେ ଯୁବକ

ପ୍ରେମିକା ସହ ଝଗଡ଼ା କରି ଶହ ଶହ ଲୋକଙ୍କ ଜୀବନକୁ ବିପଦକୁ ଠେଲିଦେଲା ପ୍ରେମିକ । ଓଡ଼ିଶା ଟ୍ରେନ୍‌ ଟ୍ରାଜେଡି ଘଟଣା ମନରୁ ଲିଭିନଥିବା ବେଳେ ତାମିଲନାଡୁର ତିରୁପତ୍ତୁରର ଜଣେ ୩୦ ବର୍ଷିୟ ଯୁବକ କିଛି ଏଭଳି କାଣ୍ଡ କରିଛନ୍ତି, ଯାହା ଶୁଣି ସମସ୍ତେ ଆଶ୍ଚର୍ଯ୍ୟ ହୋଇଯାଇଛନ୍ତି । ପ୍ରେମିକା ସହିତ ଝଗଡ଼ା କରିବା ପରେ ରାଗରେ ସେ ଏକ ରେଲୱେ ସିଗନାଲ୍‌ ବକ୍ସକୁ ନଷ୍ଟ କରିଦେଇଛନ୍ତି ।

ସଂଯୋଗବଶତଃ ରେଲୱେ ଅଧିକାରୀମାନେ ମଙ୍ଗଳବାର ଦିନ ରେଳ ଧାରଣା ଯାଞ୍ଚ କରିବା ବେଳେ ସିଗନାଲ୍‌ ବକ୍ସ ନଷ୍ଟ ହୋଇଥିବା ଦେଖିଥିଲେ । ଏନେଇ ତୁରନ୍ତ ରେଲୱେ ପୋଲିସ୍‌ ଫୋର୍ସକୁ ଖବର ଦିଆଯାଇଥିଲା । ଏତେ ସବୁ କରିବା ପରେ ମଧ୍ୟ ଯୁବକ ଜଣକ କୁଆଡ଼େ ନଯାଇ ଘଟଣାସ୍ଥଳରେ ଥିଲେ । ରେଳଧାରଣା ନିକଟରେ ପହଞ୍ଚିବା ପରେ ଗୋକୁଳ ନାମକ ଯୁବକଙ୍କୁ ନିଶାସକ୍ତ ଅବସ୍ଥାରେ ଉଦ୍ଧାର କରିଥିଲା ପୋଲିସ୍‌ ।

ସନ୍ଦେହ ହେବାରୁ ଆରପିଏଫ ଏବଂ ଜିଆରପିର ଅଧିକାରୀମାନେ ଗୋକୁଳଙ୍କୁ ପଚରା ଉଚରା କରିଥିଲେ । ହେଲେ ପ୍ରଥମେ ସେ ନିଜର ଦୋଷ ସ୍ୱୀକାର କରିନଥିଲା । ପରେ ବାରମ୍ବାର ପଚରାଉଚରା ପରେ ପ୍ରେମିକା ସହିତ କଜିଆ କରି ରାଗରେ ଏପରି କରିଥିବା କଥା ସ୍ୱୀକାର କରିଛି । ଅଭିଯୁକ୍ତର ବୟାନ୍‌ ଆଧାରରେ ବର୍ତ୍ତମାନ ଘଟଣାର ତଦନ୍ତ ଆରମ୍ଭ ହୋଇଛି ।

ସୂଚନାଯୋଗ୍ୟ ଶୁକ୍ରବାର ସନ୍ଧ୍ୟାରେ କରମଣ୍ଡଳ ଏକ୍ସପ୍ରେସ୍ ଘଣ୍ଟା ପ୍ରତି ୧୨୮ କିଲୋମିଟର ବେଗରେ ଦୌଡୁଥିଲା । ଆଉ ବାହାନଗାରେ ଘଟିଲା ଭୟଙ୍କର ଦୁର୍ଘଟଣା । ଆଉ ଏହି ଦୁର୍ଘଟଣାରେ ୨୮୮ ଜଣଙ୍କ ମୃତ୍ୟୁ ହୋଇଛି । କେତେ ଯେ ଲୋକଙ୍କ ଘର ଉଜାଡ଼ିବା ସହ ସଂସାର ଭସାଇ ଦେଇଛି ଏହି ଦୁର୍ଘଟଣା, ତା’ର ହିସାବ ନାହିଁ ।