୨୦୨୪ ଟି-୨୦ ବିଶ୍ୱକପ୍ ପାଇଁ ଆଉ ହାତରେ ଅଧିକ ସମୟ ନାହିଁ। ଆସନ୍ତା ଜୁନ୍ ମାସରେ ୱେଷ୍ଟଇଣ୍ଡିଜ୍ ଓ ଆମେରିକାରେ ଖେଳାଯିବ ଟି-୨୦ ବିଶ୍ୱକପ୍। ଦିନିକିଆ ବିଶ୍ୱକପ୍ରେ ପରାଜୟ ପରେ ଟି-୨୦ ବିଶ୍ୱକପ୍ ପାଇଁ ପ୍ରସ୍ତୁତି ଆରମ୍ଭ କରି ସାରିଛି ଟିମ୍ ଇଣ୍ଡିଆ। ନିକଟରେ ଭାରତ ଅଷ୍ଟ୍ରେଲିଆ ବିପକ୍ଷରେ ପାଞ୍ଚଟି ଟି -୨୦ ମ୍ୟାଚ୍ ଖେଳିଛି। ଏବେ ଦକ୍ଷିଣ ଆଫ୍ରିକାରେ ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ ଖେଳିବ ଭାରତ।
Also Read
ତେବେ ଏହାରି ମଧ୍ୟରେ ସବୁଠାରୁ ବଡ଼ ପ୍ରଶ୍ନ ହେଉଛି ଟି-୨୦ ବିଶ୍ୱକପ୍ରେ ଭାରତୀୟ ଦଳର ଅଧିନାୟକ କିଏ ହେବେ। ତାହାକୁ ନେଇ ଏବେ ଚିତ୍ର ସ୍ପଷ୍ଟ ହୋଇନାହିଁ । ଯଦିଓ ରୋହିତ ଶର୍ମା ତିନୋଟି ଫର୍ମାଟରେ ଅଧିନାୟକ ଅଛନ୍ତି, କିନ୍ତୁ ବିଗତ ଏକ ବର୍ଷ ମଧ୍ୟରେ ସେ ଗୋଟିଏ ବି ଟି-୨୦ ମ୍ୟାଚ୍ ଖେଳିନାହାନ୍ତି। ଗତ ବର୍ଷର ବିଶ୍ୱକପରେ ରୋହିତଙ୍କ ଶେଷ ଟି -୨୦ ଅନ୍ତର୍ଜାତୀୟ ମ୍ୟାଚ୍ ଇଂଲଣ୍ଡ ବିପକ୍ଷରେ ଖେଳିଥିଲେ।
ଆସନ୍ତା ବର୍ଷ ଅନୁଷ୍ଠିତ ହେବାକୁ ଥିବା ଟି -୨୦ ବିଶ୍ୱକପରେ ରୋହିତ ଭାରତୀୟ ଦଳର ନେତୃତ୍ୱ ନେବେ ବୋଲି ଗଣମାଧ୍ୟମରେ ଖବର ପ୍ରକାଶ ପାଇଛି। ତେବେ ଏହି ଖବର ଉପରେ ଏବେ ବଡ଼ ବୟାନ ଦେଇଛନ୍ତି ବିସିସିଆଇ ସମ୍ପାଦକ ଜୟ ଶାହ। ସେ କହିଛନ୍ତି ଯେ ଏ ବାବଦରେ ନିଷ୍ପତ୍ତି ନେବାକୁ ଏବେ ପର୍ଯ୍ୟାପ୍ତ ସମୟ ଅଛି । ଜୟ ଶାହା ଶନିବାର ମୁମ୍ବାଇରେ ସାମ୍ବାଦିକମାନଙ୍କୁ କହିଛନ୍ତି, 'ବର୍ତ୍ତମାନ ଏହା ଉପରେ ସ୍ପଷ୍ଟୀକରଣର ଆବଶ୍ୟକତା କ’ଣ ? ଜୁନ୍ ମାସରୁ ଟି -୨୦ ବିଶ୍ୱକପ୍ ଆରମ୍ଭ ହେବ। ଏହାପୂର୍ବରୁ ଆଇପିଏଲ୍ ଏବଂ ଆଫଗାନିସ୍ତାନ ବିପକ୍ଷରେ ଟି -୨୦ ସିରିଜ୍ ଖେଳାଯିବ। ଏହି ସିରିଜ୍ ପରେ କିଛି ନିଷ୍ପତ୍ତି ନିଆଯିବ ବୋଲି କହିଛନ୍ତି ଜୟ ଶାହ।
ସୂଚନା ଅନୁସାରେ ଦିନିକିଆ ବିଶ୍ୱକପ୍ ପରେ ରୋହିତ୍ ଶର୍ମାଙ୍କୁ ଟି-୨୦ ବିଶ୍ୱକପ୍ରେ ପୁଣି ଥରେ ଅଧିନାୟକ ପଦ ମିଳିବ ନା ଟିମ୍ ଇଣ୍ଡିଆ ଆଉ କାହା ସପକ୍ଷରେ ଯିବ ସେନେଇ ଚର୍ଚ୍ଚା ଜାରି ରହିଛି। ତେବେ ନିକଟରେ ଖେଳାଯାଇଥିବା ଅଷ୍ଟ୍ରେଲିଆ ସିରିଜ୍ ସୂର୍ଯ୍ୟ କୁମାର ଯାଦବ ଓ ଆଜିଠାରୁ ଖେଳାଯିବାକୁ ଥିବା ଦକ୍ଷିଣ ଆଫ୍ରିକା ବିପକ୍ଷ ସିରିଜ୍ରେ ମଧ୍ୟ ସେ ଟିମ୍ ଇଣ୍ଡିଆର କ୍ୟାପଟେନ୍ ଭାର ତୁଲାଇବେ।