ଭାରତରେ ଅନେକ ରହସ୍ୟମୟ ମନ୍ଦିର ଅଛି ଯାହାର ରହସ୍ୟ ଆଜି ପର୍ଯ୍ୟନ୍ତ ଉନ୍ମୋଚିତ ହୋଇ ନାହିଁ। ଏଠାରେ ଏମିତି ଏକ ମନ୍ଦିର ଅଛି ଯେଉଁଠାରେ ସମୁଦାୟ ୯୯ ଲକ୍ଷ ୯୯ ହଜାର ୯୯୯ ପଥର ମୂର୍ତ୍ତି ଅଛି। ଅନେକ ପଣ୍ଡିତ ଏହି ମନ୍ଦିରର ରହସ୍ୟ ସମାଧାନ କରିବାକୁ ଚେଷ୍ଟା କରିଥିଲେ ମଧ୍ୟ ସେମାନେ ସଫଳ ହୋଇ ନାହାନ୍ତି। ଏହି ମନ୍ଦିରର ୯୯ ଲକ୍ଷ ୯୯ ହଜାର ୯୯୯ ପ୍ରତିମା ଏକ ରହସ୍ୟ। କିଏ ଏହି ପଥର ମୂର୍ତ୍ତି ତିଆରି କଲା? ଏହି ମୂର୍ତ୍ତିଗୁଡ଼ିକ କେବେ ଓ କାହିଁକି ତିଆରି ହେଲା?
ସବୁଠାରୁ ବଡ ରହସ୍ୟ ହେଉଛି ଯେ ଏକ କୋଟିରୁ ଗୋଟିଏ କମ୍ ପ୍ରତିମା କାହିଁକି ତିଆରି ହୋଇଛି? ଏହି ମୂର୍ତ୍ତିଗୁଡ଼ିକ ବିଷୟରେ ଅନେକ କାହାଣୀ ମଧ୍ୟ ରହିଛି। ଏହି ମନ୍ଦିରର ରହସ୍ୟ ବିଷୟରେ ଜାଣିବା ପାଇଁ ଏଠାକୁ ଆସୁଥିବା ଭକ୍ତଙ୍କ ମନରେ କୌତୁହଳ ସୃଷ୍ଟି ହୁଏ। କିନ୍ତୁ ଏଯାଏ ଏହାର ରହସ୍ୟ ପର୍ଦାଫାସ ହୋଇନି। ତେବେ ଆସନ୍ତୁ ଜାଣିବା ଏହି ରହସ୍ୟମୟ ମନ୍ଦିର ବିଷୟରେ।
Also Read
ଏହି ମନ୍ଦିରକୁ ନେଇ ବିଶ୍ୱାସ କରାଯାଏ ଯେ ଥରେ ଭଗବାନ ଶିବ ଏକ କୋଟି ଦେବତାଙ୍କ ସହିତ କୌଣସି ସ୍ଥାନକୁ ଯାଉଥିଲେ। ସମସ୍ତ ଦେବତା ଶୋଇପଡ଼ିଲେ। ଯେତେବେଳେ ଭଗବାନ ଶିବ ସକାଳୁ ଉଠିଲେ ଦେଖିଲେ ସମସ୍ତ ଦେବତା ଶୋଇଛନ୍ତି। ଶିବ କ୍ରୋଧିତ ହୋଇ ଅଭିଶାପ ଦେଲେ ଏବଂ ସମସ୍ତ ଦେବତା ପଥର ହୋଇଗଲେ। ମନ୍ଦିରରେ ୯୯ ଲକ୍ଷ ୯୯ ହଜାର ୯୯୯ ପ୍ରତିମା ପଛରେ ଏହା ଏକା କାରଣ।
ଏହି ମୂର୍ତ୍ତିଗୁଡ଼ିକ ବିଷୟରେ ଆଉ ଏକ କାହାଣୀ ମଧ୍ୟ ପ୍ରଚଳିତ। କୁହାଯାଏ, କାଲୁ ନାମକ ଜଣେ କାରିଗର ଥିଲେ। ସେ ଭଗବାନ ଶଙ୍କର ଏବଂ ମାତା ପାର୍ବତୀଙ୍କ ସହ କୈଳାଶ ପର୍ବତକୁ ଯିବାକୁ ଚାହୁଁଥିଲେ। କିନ୍ତୁ ଏହା ଅସମ୍ଭବ ଥିଲା। କାରିଗରଙ୍କ ଜିଦି ଯୋଗୁଁ ଭଗବାନ ଶଙ୍କର ତାଙ୍କୁ କହିଲେ ଯେ ଯଦି ତୁମେ ଗୋଟିଏ ରାତିରେ ଗୋଟିଏ କୋଟି ଦେବତା ଏବଂ ଦେବୀଙ୍କ ମୂର୍ତ୍ତି ତିଆରି କର, ତେବେ ତୁମକୁ ସାଙ୍ଗରେ ନେବି।
ଏହା ପରେ କାରିଗର ରାତିସାରା ମୂର୍ତ୍ତି ଗଢିବାରେ ଲାଗିଲେ, କିନ୍ତୁ ଗୋଟିଏ କୋଟିରୁ ଗୋଟିଏ ପ୍ରତିମା କମି ଗଲା। ଫଳରେ ଭଗବାନ ଶିବ କାରିଗରଙ୍କୁ ଆଉ ସାଙ୍ଗରେ ନେଇ ନଥିଲେ। କୁହାଯାଏ ଯେ ଏହି କାରଣରୁ ଏହି ସ୍ଥାନର ନାମ ହେଉଛି 'ଉନାକୋଟି'। ଉନାକୋଟି ମନ୍ଦିର ତ୍ରିପୁରାର ରାଜଧାନୀ ଅଗରତାଲା ଠାରୁ ପ୍ରାୟ ୧୪୫ କିଲୋମିଟର ଦୂରରେ ଅବସ୍ଥିତ। ଏହି ମନ୍ଦିର ଭାରତର ସବୁଠାରୁ ବଡ ରହସ୍ୟମୟ ମନ୍ଦିରରେ ଅନ୍ତର୍ଭୁକ୍ତ।