ନେତା ହେବା ପରେ ବି ବଦଳି ନାହାନ୍ତି ? ବୁଲି ବୁଲି ମାଗଣାରେ ଲୋକଙ୍କ ସେବା କରୁଛନ୍ତି ରଙ୍ଗାଧର

ସକାଳ ହେଲେ ନିଇତି ବ୍ୟାଗ୍‌ ଧରି ଭାରି ପଡନ୍ତି ଗଙ୍ଗାଧାର । ଆଉ ସେହି କାଳିଆ ବ୍ୟାଗରେ ଥାଏ ଭଳିକି ଭଳି ଔଷଧ, ମଲମ ଆଉ ଡ୍ରେସିଂ ସାମଗ୍ରୀ । ଚିକିତ୍ସା ପାଇବାକୁ ଅପେକ୍ଷା କରିଥିବା ରୋଗୀ ପାଇଁ ଜଡିବୁଟି ନେଇ ଠିକ୍‌ ସମୟରେ ପହଞ୍ଚି ଯାଆନ୍ତି ରଙ୍ଗାଧର। ଦିନେ ଇଏ ସ୍ୱାସ୍ଥ୍ୟକର୍ମୀ ଥିଲେ, ଏବେ ନେତା ହେଲେଣି। ସମୟ ବଦଳିଛି ଆଉ ପଦବୀ ବି ବଦଳିଛି । ହେଲେ ବଦଳିନାହାନ୍ତି ରଙ୍ଗାଧର । ସ୍ୱାସ୍ଥ୍ୟକର୍ମୀ ଥିବା ବେଳେ ଯେମିତି ଲୋକଙ୍କ ସେବା କରୁଥିଲେ ଆଜି ନେତା ହେବା ପରେ ବି ଠିକ୍‌ ସେମିତି ସେବା ମନୋବୃତ୍ତି ଜାରି ରଖିଛନ୍ତି ।

କେନ୍ଦୁଝର ତେଲକୋଇ ପଞ୍ଚାୟତର ସମିତି ସଭ୍ୟ ରଙ୍ଗାଧର ଓରାମ । ସକାଳ ହେବା ମାତ୍ରେ କାନ୍ଧରେ ବ୍ୟାଗ ପକାଇ ବାହାରିଯାଉଛନ୍ତି ଅନ୍ୟର ସେବା କରିବା ପାଇଁ । କିଏ ଯଦି କେତେବେଳେ ଗାଡିରେ ନେଲା ତ ନେଲା ନହେଲେ ନିଜେ ଚାଲି ଚାଲି ଯାଆନ୍ତି ଅନ୍ୟର ସେବା କରିବା ଲାଗି । ଯାହାର ଡ୍ରେସିଂ ଦରକାର ତା’କୁ ଡ୍ରେସିଂ କରିଦିଅନ୍ତି ଆଉ ଯାହାକୁ ଇଂଜେକସନ୍‌ ଦରକାର ତାକୁ ଇଂଜେକସନ୍‌ ମଧ୍ୟ ଦିଅନ୍ତି । ଖାଲି ଏତିକି ନୁହେଁ ବରଂ ପୂରା ଅଂଚଳର ଲୋକଙ୍କ ସହ ବେଶ ଭଲରେ କଥା ହୁଅନ୍ତି ରଙ୍ଗାଧର ।

ତେଲକୋଇ ସ୍ୱାସ୍ଥ୍ୟ କେନ୍ଦ୍ରରେ ଆଟେଣ୍ଡାଣ୍ଟ ଭାବେ ମାତ୍ର ଦୁଇଶହ ଟଙ୍କାରେ ଚାକିରି ଆରମ୍ଭ କରିଥିଲେ ରଙ୍ଗାଧର । ଚାକିରି ସରିବା ବେଳକୁ ଦରମା ଥିଲା ୩୦ ହଜାର । ଆଉ ଏତିକି ଟଙ୍କାରେ ନିଜ ପାଇଁ ଖଣ୍ଡିଏ ଘର ଛଡା ଆଉ କିଛି କରିନାହାନ୍ତି ରଙ୍ଗାଧର । ନିଜର ସରଳିଆ ମନୋଭାବ ପାଇଁ ଚଳିତ ପଂଚାୟତ ନିର୍ବାଚନରେ ସମିତିସଭ୍ୟ ଭାବରେ ନିର୍ବାଚିତ ବି ହେଲେ । କିନ୍ତୁ ଏବେ ଦୁଇଟି କାମକୁ ବେଶ୍‌ ଭଲରେ କରୁଛନ୍ତି ରଙ୍ଗାଧର । ଏମିତିକି କାହାର ଦେହ ଖରାପ କଥା ଶୁଣିବା ମାତ୍ରେ ସେ ସାହାଯ୍ୟ ପାଇଁ ପହଞ୍ଚିଯାଆନ୍ତି ।

ସମିତିସଭ୍ୟ ସହ ସ୍ୱାସ୍ଥ୍ୟକର୍ମୀ ପରି ଦୁଇଟି ଗୁରୁତ୍ୱପୂର୍ଣ୍ଣ କାମ କରିବା ପରେ ବି ସେ ଥକୁନାହାନ୍ତି । ବରଂ ତାଙ୍କ ପରିବାର ଲୋକ ମଧ୍ୟ ତାଙ୍କୁ ସମର୍ଥନ କରୁଛନ୍ତି। ଏପରି ବ୍ୟକ୍ତିତ୍ୱ ନିଶ୍ଚିନ୍ତ ଭାବେ ବିରଳ । କାରଣ ଏବେ ରାଜନୀତିରେ ପଦ ପାଇଲେ ଲୋକେ ଭୋଟରଙ୍କୁ ଭୁଲି ଯାଉଥିବା ବେଳେ ରଙ୍ଗାଧର କିନ୍ତୁ ଲୋକଙ୍କ ଦୁଃଖକୁ ଭୁଲି ନାହାନ୍ତି । ବରଂ ତାଙ୍କ କର୍ତ୍ତବ୍ୟକୁ ଅତି ଉତ୍ତମ ଭାବରେ କରୁଛନ୍ତି ।

(ରିପୋର୍ଟ- ଚିନ୍ମୟ କୁମାର ସାହୁ, ତେଲକୋଇ)