ସ୍କୁଲ ଗେଟ୍ ଯେତେ ଚକ୍ଚକ୍ ଦିଶୁଛି, ସାମ୍ନାପଟ୍ଟ ସେତିକି ଅଳିଆ ଆବର୍ଜନାରେ ଭର୍ତ୍ତି ହୋଇଛି । ସ୍ଥିତି ଏମିତି ହେଲାଣି ଯେ ସ୍କୁଲ ଗେଟ୍ ଦେଇ ସ୍କୁଲକୁ ପଶିବାକୁ ନାରାଜ ହେଉଛନ୍ତି ପିଲାମାନେ । ସ୍କୁଲ ସାମ୍ନାରେ ପ୍ରବଳ ମାତ୍ରାରେ କୁଢ କୁଢ ଅଳିଆ ପଡ଼ିଛି । ଏଠାରେ କିଏ ପକାଇଲା ତାହାକୁ ନେଇ ଚର୍ଚ୍ଚା ଆରମ୍ଭ ହୋଇଯାଇଛି ।
ରଙ୍ଗ ହେଲା ପରେ ସ୍କୁଲ୍ ଗେଟ୍ ଚକ୍ଚକ୍ ଦିଶୁଛି । ଖାଲି ଗେଟ୍ କାହିଁକି? ସ୍କୁଲ ଭିତରର ଦୃଶ୍ୟ ଯିଏ ବି ଦେଖିବ ନାକ ଟେକିବ। କାରଣ ସ୍କୁଲ ସାମ୍ନାରେ ଯେତେ ପରିମାଣରେ କୁଢକୁଢ ଅଳିଆ ପଡ଼ିଛି ଆଉ ସେଥିରୁ ବାହାରୁଥିବା ଦୁର୍ଗନ୍ଧରେ ଆକ୍ତାମାକ୍ତ ହେଲେଣି ସ୍କୁଲ ପିଲା ଓ ସ୍ଥାନୀୟ ଅଂଚଳର ଲୋକ।
Also Read
କନ୍ଧମାଳ ଜିଲ୍ଲା ରାଇକିଆ ବିଜୟ ହାଇସ୍କୁଲ ସାମ୍ନାରେ ଏଭଳି ଦୃଶ୍ୟ ଦେଖିବାକୁ ମିଳିଛି । ରାଜ୍ୟ ସରକାରଙ୍କ ଏହି ସ୍ମାର୍ଟ ସ୍କୁଲର ଉନ୍ନତି ପାଇଁ ପାଖାପାଖି ୪୫ ଲକ୍ଷ ଟଙ୍କା ଖର୍ଚ୍ଚ ହୋଇଛି । ହେଲେ ଭିତର ଯେତେ ଚିକ୍କଣ ବାହାର ପରିବେଶ ସେତେ ଅରୁଚିକର ହୋଇ ପଡ଼ିଛି । ତେବେ ସ୍କୁଲ ସାମ୍ନାରେ ପଡ଼ିଥିବା ଏହି ଅଳିଆ ପାଇଁ ଅସ୍ୱାସ୍ଥ୍ୟକର ପରିବେଶ ସୃଷ୍ଟି କରୁଛି । ଯାହାକୁ ନେଇ ସ୍କୁଲ କର୍ତ୍ତୃପକ୍ଷ ଓ ଛାତ୍ରଛାତ୍ରୀ ମଧ୍ୟ ଅସନ୍ତୋଷ ପ୍ରକାଶ କରିଛନ୍ତି ।
ସ୍ମାର୍ଟ ସ୍କୁଲ ରୂପାନ୍ତର ପ୍ରକ୍ରିୟା ସରିବା ପରେ ବେଶ୍ ଯାକଜମକରେ ଉଦଘାଟନ କରାଯାଇଥିଲା । ଏବେ କିନ୍ତୁ ସ୍ମାର୍ଟ ସ୍କୁଲ ଅଳିଆ ସ୍କୁଲରେ ପରିଣତ ହୋଇଛି । ସ୍କୁଲ ସାମ୍ନାରେ ଅଳିଆ ଆର୍ବଜନା ନ ପକାଇବା ଲାଗି ପ୍ରଧାନ ଶିକ୍ଷକ ସ୍ଥାନୀୟ ଲୋକଙ୍କୁ ଅନୁରୋଧ କରିଛନ୍ତି । ତେବେ ଦେଖିବାକୁ ବାକି ରହିଲା କେବେ ଏହି ସମସ୍ୟାର ସମାଧାନ କରୁଛି ପ୍ରଶାସନ ।
ରିପୋର୍ଟର- ଅଜିତ ନାୟକ