ବର୍ତ୍ତମାନ ଚାଲିଛି ବାହାଘର ସିଜିନ୍ । ପୁଅ ଘର ଲୋକ ଝିଅ ଖୋଜୁଛନ୍ତି। ଆଉ ଝିଅ ଘର ଲୋକ ପୁଅ ଖୋଜୁଛନ୍ତି ।ଜାତକ, ଯୋଗ୍ୟତା ଓ ଉଚ୍ଚତା ପରଖି ଉପଯୁକ୍ତ ପିଲା ବାଛିବାରେ ଲାଗି ପଡିଛନ୍ତି । ଏମିତି ବେଳେ ମୁନ୍ନା-ମମତାଙ୍କ ଯୋଡିକୁ ନେଇ ସାରା ଦେଶରେ ଚର୍ଚ୍ଚା । ବର ହୋଇ ବାହା ହେବାକୁ ଆସିଥିବା ମୁନ୍ନାର ଉଚ୍ଚତା ୩୬ ଇଞ୍ଚ ହୋଇଥିବା ବେଳେ କନ୍ୟା ସାଜିଥିବା ମମତାଙ୍କ ଉଚ୍ଚତା ଥିଲା ମାତ୍ର ୩୪ ଇଞ୍ଚ ।
ବିହାର ଭାଗଲପୁର ଜିଲ୍ଲାର ବାସିନ୍ଦା ଗୁଜୋ ମଣ୍ଡଳଙ୍କ ୨୪ ବର୍ଷର ଝିଅ ମମତା ସେହି ଜିଲ୍ଲା ମସାରୁ ନିବାସୀ ବିନ୍ଦେଶ୍ୱରୀ ମଣ୍ଡଳଙ୍କ ପୁଅ ମୁନ୍ନା ଭାରତୀଙ୍କୁ ବିବାହ କରିଛନ୍ତି । ଉଭୟଙ୍କ ଉଚ୍ଚତା କମ ହୋଇଥିବାରୁ ଦୁହିଁଙ୍କ ବିବାହରେ ସମସ୍ୟା ଦେଖା ଦେଉଥିଲା । ଅନେକ ଖୋଜାଖୋଜି କରିବା ପରେ ଶେଷରେ ପରିବାର ଲୋକେ ମମତା ଓ ମୁନ୍ନା ପାଇଥିଲେ । ଶେଷରେ ଦୁହିଁଙ୍କ ବିବାହ ହୋଇଛି । ତେବେ ନିମନ୍ତ୍ରଣ ନଥାଇ ବି ଏଭଳି ଯୋଡ଼ିଙ୍କ ବିବାହ ଦେଖିବା ପାଇଁ ହଜାର ହଜାର ଲୋକଙ୍କ ଭିଡ଼ ଲାଗିଥିଲା ।
କୁହାଯାଏ ସ୍ୱର୍ଗରେ ଯୋଡି ତିଆରି ହୁଏ । ପୃଥିବୀରେ ମିଳନ ହୋଇଥାଏ । ଭଗବାନ ବି ଯୋଡି ତିଆରି କରିଥାନ୍ତି । କିଏ କାହାର ଜୀବନ ସାଥୀ ସାଜିବେ ସେଥିରେ ଭଗବାନଙ୍କର ଇଛା ଥାଏ ବୋଲି କୁହାଯାଏ। ସେଥିପାଇଁ ମମତା-ମୁନ୍ନାଙ୍କ ସୁନ୍ଦର ଯୋଡିକୁ ମିଳିଛି ଢେର ସାରା ଆଶିର୍ବାଦ।