ସରକାର ଶୁଣିଲେନି, ନିଜସ୍ୱ ଖର୍ଚ୍ଚରୁ ପିଲାଙ୍କ ପାଇଁ ପାଇଖାନା ତିଆରି କରିଦେଲେ ରଞ୍ଜନ...

ସୁନ୍ଦର ଭାବରେ ସ୍କୁଲ୍‌ର ପାଇଖାନା କାନ୍ଥରେ ରଙ୍ଗ ମରାଯାଇଛି । ପ୍ରତି ସରକାରୀ ସ୍କୁଲରେ ପାଇଖାନା ଏମିତି ତିଆରି ହେଉ ବୋଲି ସମସ୍ତଙ୍କର ଆଶା । ଏଥରେ ନୂଆ କଥା କଣ? କାରଣ କେଉଁ ସରକାର ଏହି ପାଇଖାନା ତିଆରି କରିନାହାନ୍ତି, ବରଂ ଜଣେ ବଦାନ୍ୟ ବ୍ୟକ୍ତି ଏହାକୁ ତିଆରି କରିଛନ୍ତି। ଯାହାକୁ ନେଇ ଏବେ ବଢିଛି ଚର୍ଚ୍ଚା । ଏଭଳି ଘଟଣା ଦେଖିବାକୁ ମିଳିଛି ବାଲେଶର ରେମଣା ବ୍ଲକ୍‌ ଭାଗବତ ଗୋସାଇଁ ଉଚ୍ଚ ମାଧ୍ୟମିକ ବିଦ୍ୟାଳୟରେ ।

ବିଦ୍ୟାଳୟରେ ଶିକ୍ଷକ ଅଛନ୍ତି , ଛାତ୍ରଛାତ୍ରୀ ଅଛନ୍ତି , ପାଠ ପଢା ମଧ୍ୟ ହେଉଛି । ହେଲେ ବଡ ସମସ୍ୟା ଯେ, ଆଜି ପର୍ଯ୍ୟନ୍ତ ପିଲାମାନେ ମୌଳିକ ସୁବିଧାରୁ ବଞ୍ଚିତ ଅଛନ୍ତି । ପିଇବା ପାଣି ପାଇଁ ସେମିତି ସ୍ୱତନ୍ତ୍ର ବ୍ୟବସ୍ଥା ନାହିଁ କିମ୍ବା ଶୌଚାଳୟଟିଏ ନାହିଁ । ଯାହା ପାଇଁ ଦୂରଦୂରନ୍ତରୁ ଆସୁଥିବା ପିଲାମାନେ ବହୁ ଅସୁବିଧାରେ ସମ୍ମୁଖିନ ହେଉଛନ୍ତି । ତେବେ ଏହା ଜାଣିପାରି ସ୍ଥାନୀୟ ଗାଁର ଜଣେ ସହୃଦୟ ବ୍ୟକ୍ତି ରଞ୍ଜନ କୁମାର ବେହେରା ବିନା ସ୍ୱାର୍ଥରେ ନିଜ ଖର୍ଚ୍ଚରୁ କିଛିକିଛି ଅର୍ଥ ଜମା କରି ବିଦ୍ୟାଳୟରେ ଛାତ୍ରଛାତ୍ରୀ ମାନଙ୍କ ପାଇଁ ନିର୍ମଣା କରିଛନ୍ତି ପାଇଖାନା ଗୃହ ।

ପିଲାଙ୍କ ସୁବିଧା ପାଇଁ ସରକାର ଯୋଜନା ପରେ ଯୋଜନା କରୁଛନ୍ତି । ପାଣି ପରି ଟଙ୍କା ଖର୍ଚ୍ଚ ବି କରୁଛନ୍ତି। ହେଲେ ସ୍କୁଲରେ ପିଲାଙ୍କ ପାଇଁ ଖଣ୍ଡେ ପାଇଖାନା ତିଆରି ହୋଇପାରିଲାନି। ଯେଉଁଠି ପିଲାଙ୍କ କଥା ସରକାର ବୁଝିପାରିଲେନି ସେଇଠି ଜଣେ ବଦାନ୍ୟ ବ୍ୟକ୍ତି ପିଲାଙ୍କ ପାଇଁ ପାଇଖାନା ତିଆରି କରିଦେଲେ । ମିଳିଥିବା ସୂଚନା ଅନୁସାରେ, ପାଇଖାନା ତିଆରି କରିଥିବା ବ୍ୟକ୍ତିଙ୍କୁ ସ୍ୱତନ୍ତ୍ର କାର୍ଯ୍ୟକ୍ରମରେ ପୁରସ୍କାର କରାଯିବ ।