ଜଳିପୋଡ଼ି ପାଉଁଶ ହୋଇଗଲା ସବୁ ସ୍ୱପ୍ନ; ଏବେ ଝିଅ ବାହାଘର କେମିତି କରିବି?

ଧାନ ଖଳାରେ ନିଆଁ ଲାଗି ସବୁ ପୋଡି ନଷ୍ଟ ହୋଇଯାଇଛି । ଆଉ ଖଳାରେ ବସି ବାହୁନି ବାହୁନି କାନ୍ଦୁଛି ଜଣେ ମାଆ । ଆଉ କହୁଛି ମୋର ସବୁ ସ୍ୱପ୍ନ ଭାଙ୍ଗିଗଲା, ସବୁ କିଛି ପଳେଇ ଗଲା । ଏବେ ମୋ ଝିଅ ବାହାଘର ହେବ କେମିତି? ମୁଁ ଟଙ୍କା ଆଣିବି କୋଉଠୁ?

ଆପଣମାନେ କିଛି ବୁଝିପାରୁନଥିବେ ନିଶ୍ଚୟ । ଖଳାରେ ପୋଡିଯାଇଥିବା ଧାନକୁ ଖେଳେଇ ଖେଳେଇ କିଛି ଖୋଜିବାରେ ବ୍ୟସ୍ତ ଅଛନ୍ତି ଗାଁଲୋକେ । ଖାଲି ଖୋଜୁଛନ୍ତି ତାହା ନୁହେଁ ବରଂ ଆଖି ସାମ୍ନାରେ ବର୍ଷକର ଫସଲ ନଷ୍ଟ ହୋଇଯାଇଥିବାରୁ ବାହୁନି ବାହୁନି କାନ୍ଦୁଛନ୍ତି । ଏ ଦୃଶ୍ୟ ହେଉଛି ନୂଆପଡା ପାଇକମାଳ ମାଲପଡା ଗାଁର ।

ଅଧିକ ପଢ଼ନ୍ତୁ: ରାସ୍ତାକଡ଼ LED ଲାଇଟ୍‌ ଉଜାଡ଼ି ଦେଉଛି ଫସଲ ! ଚିନ୍ତାରେ ଚାଷୀ, କ’ଣ ଏହାର ବିକଳ୍ପ ?

ବାହୁନି ବାହୁନି କାନ୍ଦୁଛନ୍ତି ଗୀତା ହାତୀ । ଧାର କରଜ କରି ଧାନ ଚାଷ କରି ଥିଲେ । ଧାନ ବି ଭଲ ହୋଇଥିଲା । ଅମଳ ହେବା ପରେ ଧାନ କାଟି ଖଳାରେ ରଖି ଥିଲେ । ଆଶା କରିଥିଲେ,ରାତି ପାହିଲେ ଧାନ ଅମଳ କରିବେ । କିନ୍ତୁ ରାତି ପାହିବା ପୂର୍ବରୁ ସବୁ ଜଳି ପୋଡି ପାଉଁଶ ହୋଇ ଯାଇଥିଲା । ଅଧରାତିରେ ତାଙ୍କ ବିଲରେ କେହି ଜଣେ ଦୁର୍ବୃତ୍ତ ନିଆଁ ଲଗାଇଦେବାରୁ ସବୁତକ ସମ୍ପତ୍ତି ଜଳିପୋଡି ପାଉଁଶ ହୋଇଗଲା । ଅମଳ ହେବାକୁ ଥିବା ପ୍ରାୟ ୧୦୦ ବସ୍ତା ଧାନ ପାଉଁଶ ହୋଇଯାଇଛି । ଏବେ ଝିଅ ବାହାଘର କେମିତି ହେବ? ବର୍ଷକ ଯାକ ସେମାନେ ଖାଇବେ କଣ? ପିନ୍ଧିବେ କଣ? ଓ ଚଳିବେ କେମିତି ?

ସେହି ଚିନ୍ତାରେ ଖଳାରେ ଏମିତି କାନ୍ଦୁଛନ୍ତି ପୂରା ପରିବାର । ସେପଟେ ଏ ଅସମୟରେ ସରକାର ଯଦି କିଛି ସାହାଯ୍ୟ କରନ୍ତେ, ତେବେ ଝିଅ ବାହାଘର ସହିତ ବଞ୍ଚିପାରନ୍ତା ପରିବାର ବୋଲି କହିଛନ୍ତି ଡମ୍ବୁରଧର । ସ୍ୱପ୍ନ ଥିଲା ଧାନ ଅମଳ ହେଲେ ଝିଅ ବାହାଘର କରିବେ, ହେଲେ ରାତିକ ମଧ୍ୟରେ ଖଳାରେ ନିଆଁ ଲଗାଇ ଡମ୍ବୁରଙ୍କ ସ୍ୱପ୍ନକୁ ଚୁରମାର କରିଦେଲା ଦୁର୍ବୃତ୍ତ । ଯାହାକୁ ନେଇ ଦୁଃଖରେ ସମୟ କାଟୁଛନ୍ତି ପୂରା ପରିବାର ।

(ରିପୋର୍ଟ- ମାୟାଧର ସରାଫ, ନୂଆପଡା)