ଥାନା ପାଲଟିଲା ବାହା ମଣ୍ଡପ : ପୋଲିସ୍‌ ମ୍ୟାଡାମଙ୍କ ଉପସ୍ଥିତିରେ ସାତ ଜନମର ସାଥୀ ହେଲେ ପ୍ରେମୀଯୁଗଳ

ନା ଥିଲା ବାଣ ରୋଷଣୀ, ନା ଥିଲା ବାହା ବେଦୀ । ପରିବାର ଲୋକ ବି ନଥିଲେ । ହେଲେ କେବଳ ଫୁଲମାଳ ଅଦଳବଦଳ କରି ଅନୁଷ୍ଠିତ ହୋଇଗଲା ଆଦର୍ଶ ବିବାହ । ସାତ ଜନମର ସାଥି ହୋଇଗଲେ ପ୍ରେମୀଯୁଗଳ । ଆଉ ଏହି ବିବାହରେ ସାକ୍ଷୀ ରହିଲେ ଖୋଦ ଥାନା ଅଧିକାରୀ । ଏପରି ଏକ ବିବାହ ଦେଖିବାକୁ ମିଳିଛି ବରଗଡ଼ ସଦର ଥାନା ପରିସରରେ ।

ବରଗଡ଼ ରୁହୁନିଆ ଗାଁର ହରିହର ଭୋଇ ଓ ଖୁଣ୍ଟପାଲି ଗାଁର ଉର୍ମିତା ପ୍ରଧାନ । ଉଭୟ ଦୀର୍ଘ ଦିନରୁ ପରସ୍ପରକୁ ଭଲ ପାଉଥିଲେ, ଭବିଷ୍ୟତକୁ ନେଇ ନୂଆ ନୂଆ ସ୍ୱପ୍ନ ବୁଣୁଥିଲେ । କଥା ବିବାହ ପର୍ଯ୍ୟନ୍ତ ଯାଇଥିଲା, ହେଲେ ଝିଅଘର ପରିବାର ବିବାହକୁ ବିରୋଧ କରିଥିଲେ । ଉଭୟେ ସମାନ ଜାତିର ହୋଇଥିଲେ ହେ ପାରିବାରିକ ସ୍ୱୀକୃତି ମିଳି ନଥିଲା । ଶେଷରେ ଅନ୍ୟଉପାୟ ନପାଇ ଗାଧୋଇ ଯିବାକୁ କହି ଉର୍ମିତା ନିଜ ଘରୁ ଗୋଡ଼ କାଢ଼ିଥିଲେ । ପ୍ରେମିକ ପାଇଁ ପରିବାର ଲୋକଙ୍କୁ ଭୁଲି ଚାଲିଆସିଲେ । 

ତେବେ ସିଧାସଳଖ ବିବାହ ନକରି ପ୍ରେମୀଯୁଗଳ ଥାନାର ଦ୍ୱାରସ୍ଥ ହୋଇଥିଲେ । ଆଉ ସେଠାରେ ଓକିଲ ଓ ଥାନା ଅଧିକାରୀଙ୍କୁ ସାକ୍ଷୀ ରଖି ବିବାହ କରିଥିଲେ । ବରଗଡ଼ ସଦର ଥାନା ଅଧିକାରୀ ସ୍ୱପ୍ନାରାଣୀ ଗୋଚ୍ଛାୟତ ଉଭୟଙ୍କ ବିବାହ କରାଇବା ସହ ଆଶୀର୍ବାଦ କରିଥିଲେ ।

ବର୍ତ୍ତମାନ ଵିଵାହ ଉତ୍ସବରେ ଲୋକେ ଲକ୍ଷାଧିକ ଟଙ୍କା ଖର୍ଚ୍ଚ କରୁଥିବା ବେଳେ ବହୁ ସମୟରେ ନବ ବଧୂକୁ ଯୌତୁକ ନିର୍ଯ୍ୟାତନା ଦିଆଯାଉଥିବା ଦେଖିବାକୁ ମିଳୁଛି । ଆଉ ଏପରି ସମୟରେ ଦୁଇଟି ଫୁଲମାଲ ଦ୍ୱାରା ବିବାହ ବନ୍ଧନରେ ବାନ୍ଧି ହୋଇ ଏହି ପ୍ରେମୀଯୁଗଳ ଅନନ୍ୟ ଉଦାହରଣ ସୃଷ୍ଟି କରିଛନ୍ତି ।

ବରଗଡ଼, ଦୀପକ ଶର୍ମା