ବଞ୍ଚିବାକୁ ସଂଘର୍ଷ ! ଦିନେ ଥିଲେ କର୍ପୋରେଟର୍, ଆଜି ଇଟାଭାଟି ଶ୍ରମିକ

କଟକ : ଲୋକଙ୍କ ସେବା କରିବାକୁ ଇଚ୍ଛା । ଯେତିକି ଟଙ୍କା ଥିଲା ସବୁ ଖର୍ଚ୍ଚ ହୋଇ ସାରିଛି । ଏବେ ଇଟା ଭାଟିରେ କାମ କରି ତଥା ପର ଘରେ ମୂଲ ଲାଗି ଚଳୁଛି । ପୁଅ ପାଖରେ ବି କିଛି କାମ କରୁନି । ପଇସା ନଥିଲେ ଏବେ ରାଜନୀତି କରିହେବନି । ମୋ ଜୀବନରେ ଲାଞ୍ଚ କେବେ ନେଇନି । ଲାଞ୍ଚ ନେଇଥିଲେ ମୋ ଅବସ୍ଥା ଏପରି ହୋଇଥାଆନ୍ତା କି ବୋଲି କହି ଦୁଃଖ ବଖାଣିଛନ୍ତି ପୂର୍ବତନ ମହିଳା କର୍ପୋରେଟର ।

ରାଜନୀତିରୁ ଇଟାଭାଟି । ପୂର୍ବତନ ମହିଳା କର୍ପୋରେଟର ଏଵେ ଇଟାଭାଟି ଶ୍ରମିକ । ରାଜନୀତିରେ ଛକି ଶୂନ ଖେଳ ତାଙ୍କ ପାଇଁ ଅଡ଼ୁଆ ସୂତା ପାଲଟିଗଲା ।  ସିଏମସି ତଥା କଟକ ମୁନସିପାଲ କର୍ପୋରେସନର ପ୍ରଥମ କାଉନସିଲରେ କର୍ପୋରେଟର ଭାବେ ନିର୍ବାଚିତ ହୋଇଥିଲେ ସୁକାନ୍ତୀ ସିଂ । ସେ କର୍ପୋରେଟର ଥିବା ସମୟରେ ରାସ୍ତାଘାଟ ଠାରୁ ଆରମ୍ଭ କରି ଲୋକଙ୍କୁ ସରକାରୀ ଘର, ବିପିଏଲ୍ କାର୍ଡ ସହ ଭତ୍ତା ମଧ୍ୟ ମଞ୍ଜୁର କରାଉଥିଲେ, ହେଲେ ଆଜି ତାଙ୍କ ଅବସ୍ଥା ବହୁତ ଖରାପ । ନା ମୁଣ୍ଡ ଗୁଞ୍ଜିବାକୁ ଘର ଖଣ୍ଡିଏ ଅଛି ନା ହାତରେ ଟଙ୍କା ଅଛି । ପରିସ୍ଥିତି ଏମିତି ହୋଇଛି ଯେ ଇଟା ଭାଟିରେ କାମ କରି ପେଟ ପୋଷିବାକୁ ପଡୁଛି ।

କଟକ ମ୍ୟୁନସିପାଲ କର୍ପୋରେସନର ମହିଳା କର୍ପୋରେଟର ସୁକାନ୍ତୀ ସିଂ । କଟକ ବମ୍ପକୁଦ ନିକଟରେ ଘର । ଘର ନୁହେଁ ତ ମୁଣ୍ଡ ଗୁଞ୍ଜିଛନ୍ତି କୁଡ଼ିଆ ଘରେ । ଦିନରେ ସୂର୍ଯ୍ୟ ଆଉ ରାତିରେ ଜହ୍ନ କିରଣ ପଡ଼ୁଛି । ପରିବାର କହିଲେ ସ୍ୱାମୀ, ସ୍ତ୍ରୀ ଆଉ ପୁଅ । ପୁଅ ବଡ଼ ହେଲାଣି, ହେଲେ ତା’ ପାଖରେ ବି କାମ ନାହିଁ । ପରିବାରର ତିନି ଜଣ ମୂଲ ଲାଗି ଘର ଚଳାନ୍ତି । ଦିନେ ରାଜନୀତିରେ ଚହଳ ପକାଉଥିଲେ, ଆଜି ମୂଲମଜୁରୀ କରି ପେଟ ପୋଷିବାକୁ ପଡ଼ୁଛି । ୧୩୭୫ ଖଣ୍ଡ ଭୋଟ୍‌ରେ ବିଜୟୀ ହୋଇଥିଲେ ସେ । ନିବେଦିତା ପ୍ରଧାନ ମେୟର ଥିଲା ବେଳେ ସୁକାନ୍ତୀ ଥିଲେ କର୍ପୋରେଟର । ପେସା ନୁହେଁ ନିଶା ପାଇଁ ରାଜନୀତିରେ ପ୍ରବେଶ କରିଥିଲେ ସୁକାନ୍ତୀ ।

କାଠଯୋଡିର ଅପର ପାର୍ଶ୍ୱରେ ଥିବା ଗୋପାଳପୁର, ବାଲିକୁଦା, ବମ୍ଫକୁଦ ଆଦି ଅଞ୍ଚଳରେ ଲୋକଙ୍କୁ ସହରାଞ୍ଚଳର ମୌଳିକ ସୁବିଧା ଯୋଗାଇଦେବାକୁ ସେ କାଉନସିଲ ବୈଠକରେ ଗର୍ଜନ କରୁଥିଲେ । ସବୁ ଅଞ୍ଚଳରେ ଆଲୋକ ଓ ପାଣି ସୁବିଧା କରିବାକୁ ବାରମ୍ୱାର ଦାବି କରୁଥିଲେ ।  ଗରିବ ଲୋକଙ୍କ ପାଇଁ ଚିତ୍କାର କରୁଥିଲେ । ସେ କିଛି ଦଳଗତ ଭେଦଭେଦ ନଦେଖି ଲୋକଙ୍କ କଥା ବୁଝିବାକୁ ପ୍ରଶାସନ ଉପରେ ଚାପ ପକାଉଥିଲେ । ଲୋକଙ୍କ ପାଇଁ ନିଜେ ଟଙ୍କା ବି ଖର୍ଚ୍ଚ କରିଛନ୍ତି । ଲୋକ ପ୍ରତିନିଧି ହିସାବରେ ନିଜ କର୍ତ୍ତବ୍ୟ ପାଳନ କରିବାରେ କେବେ ଅବହେଳା କରିନାହାନ୍ତି । ତାଙ୍କର ଆଶା ଥିଲା ସରକାର ତାଙ୍କୁ  କିଛି ସାହାଯ୍ୟ କରିବେ , କିନ୍ତୁ ତାହା ବି ହେଲା ନାହିଁ ।

ନିର୍ବାଚନ ସମୟରେ ନେତା ଆସନ୍ତି । ପୂର୍ବତନ କର୍ପୋରେଟଙ୍କୁ ଏପରି ଅବସ୍ଥାରେ ଦେଖି ଆହା ପଦେ କୁହନ୍ତି । ସୁକାନ୍ତୀଙ୍କୁ ନେଇ ପ୍ରଚାର କରନ୍ତି ।  ଘର କରାଇ ଦେବାର ଅଜସ୍ର ପ୍ରତିଶ୍ରୁତି ଦେଇ ପୁଣି ବାଟହୁଡ଼ି ଚାଲି ଯାଆନ୍ତି । ଏବେ ତହସିଲ ଅଫସରେ ଘର ପାଇଁ  ସୁକାନ୍ତୀଙ୍କ କାଗଜପତ୍ର ପଡ଼ିଛି । ସବୁ କର୍ପୋରେଟରଙ୍କୁ ଘର ଦେବା ପାଇଁ କୁହାଯାଇଛି । ତଥାପି ଘର ମିଳୁନି । 

ଅନ୍ୟପଟେ କର୍ପୋରେଟର୍ ଥିବା ସମୟର ତାଙ୍କ କାମକୁ ଭୁଲି ନାହାନ୍ତି ଲୋକେ । ଏବେ ବି ଅସୁବିଧା ନେଇ ତାଙ୍କ ପାଖକୁ ଆସନ୍ତି । ହେଲେ ଦୁଃଖର ବିଷୟ ଇଚ୍ଛା ଥିଲେ ସୁଦ୍ଧା ନିଜର ଅସହାୟତା ପ୍ରକାଶ କରନ୍ତି ସୁକାନ୍ତୀ । ନିଜ ପାଇଁ ଦାନା ମୁଠାଏ ଯୋଗାଡ଼ କରିବା ତାଙ୍କ ପାଇଁ କଷ୍ଟକର ହୋଇ ପଡ଼ୁଥିବା ବେଳେ ଲୋକଙ୍କ କଥା ବୁଝିବେ ବା କ’ଣ । ଲୋକଙ୍କୁ ସହାୟ ହେଉଥିବା ମଣିଷଟି ଆଜି ନିଜେ ଅସହାୟ ହୋଇଯାଇଛି ।