ପ୍ରେମରେ ବନ୍ଧା ଥିଲା ମଣିଷ ଓ ବିଲେଇର ସମ୍ପର୍କ; ବରଫ ପଡ଼ୁଛି, ଶ୍ମଶାନରେ ବିଲେଇ ବସିଛି

କଥାରେ ଅଛି ପୋଷା ବିଲେଇ କୁକୁର ମଣିଷର ଏକ ଘନିଷ୍ଠ ବନ୍ଧୁ । ଏହା କେବଳ କଥାରେ ନାହିଁ । ବରଂ ବାସ୍ତବ ଚିତ୍ରରେ ମଧ୍ୟ ଦେଖିବାକୁ ମିଳିଛି । ସୋସିଆଲ୍‌ ମିଡିଆରେ ଦେଖିବାକୁ ମିଳିଛି ଏହିପରି କିଛି ଜ୍ୱଳନ୍ତ ଉଦାହରଣ । ଯାହା ଏବେ ଖୁବ୍‌ ଭାଇରାଲ୍‌ ହେବାରେ ଲାଗିଛି ।

ଗତ କିଛି ଦିନ ହେବ ସୋସିଆଲ୍‌ ମିଡିଆରେ ଏକ ପୋଷ୍ଟ ଭାଇରାଲ୍ ହେଉଛି । ପୋଷ୍ଟରେ ଏକ ଫୋଟ ସେୟାର ହୋଇଛି, ଯେଉଁଥିରେ ବିଲେଇ ତାର ମାଲିକର କବରରେ ବସି ତାଙ୍କୁ ଝୁରୁଥିବାର ଦେଖିବାକୁ ମିଳିଛି । ବିଲେଇଟି ପ୍ରାୟ ଦୁଇମାସ ହେବ ଏହିପରି ବସି ରହିଛି ବୋଲି ଜଣାପଡ଼ିଛି ।

ସୂଚନା ଅନୁସାରେ, ଗତ ୨୦୨୧ ନଭେମ୍ୱର ୬ ତାରିଖରେ ସର୍ବିଆର ପୂର୍ବତନ ମୁଫତି ଶେଖ୍‌ ମୁଆମେର ଜୁକୋରଲିଙ୍କ ହୃଦ୍‌ଘାତରେ ମୃତ୍ୟୁ ହୋଇଥିଲା । ସେ ମୁଆମେର ଜୁକୋରଲି ସର୍ବିଆର ମୁସଲମାନ ସଂମ୍ପ୍ରଦାୟର ଜଣେ ସୁପରିଚିତ ବ୍ୟକ୍ତି ଥିଲେ । ସେ ତାଙ୍କ ଘରେ ଏକ ପୋଷା ବିଲେଇ ରଖିଥିଲେ ।

ଜୁକୋରଲି ତାଙ୍କ ପୋଷା ବିଲେଇକୁ ନିଜ ପ୍ରାଣଠାରୁ ବି ଅଧିକ ଭଲ ପାଉଥିଲେ । ବିଲେଇ ମଧ୍ୟ ନିଜ ମାଲିକକୁ ବହୁତ ଭଲ ପାଉଥିଲା । ହେଲେ ସମୟ ବିତିବା ସହ ଗତ ନଭେମ୍ୱର ମାସ ୬ ତାରିଖରେ ହଠାତ୍‌ ହୃଦ୍‌ଘାତରେ ଜୁକୋରଲିଙ୍କ ଦେହାନ୍ତ ହୋଇଥିଲା ।

ଜୁକୋରଲିଙ୍କ ମୃତ୍ୟୁ କଥା ଜାଣିବା ମାତ୍ରେ ତାଙ୍କ ପୋଷା ବିଲେଇଟି ଶ୍ମଶାନ ପହଞ୍ଚି ତାଙ୍କ କବର ପାଖରେ ବସିରହିଲା । ହାଡ଼ଭଙ୍ଗା ଶୀତରେ ହେଉଥିବା ତୁଷାରପାତ ସହ ଭୋକ ଉପବାସରେ ବିଲେଇ ସେମିତି ବସି ନିଜ ମାଲିକକୁ ଝୁରୁଛି । ନିଜ ମାଲିକ ପ୍ରତି ବିଲେଇର ଏହି ପ୍ରେମ ଦେଖି ପାଖଆଖ ଲୋକମାନେ ଭାବପ୍ରବଣ ହେବା ସହ ବିଲେଇ ପ୍ରତି ତା ମାଲିକର ପ୍ରେମକୁ ମଧ୍ୟ ଦେଖୁଛନ୍ତି ।