ସ୍କୁଲ୍‌ରେ ବିଦ୍ୟୁତ୍‌ ସକ୍‌; ୨ ଛାତ୍ର ସମେତ ପ୍ରଧାନଶିକ୍ଷକ ଗୁରୁତର

ବାଲେଶ୍ୱର ଜିଲ୍ଲା ସୋର ପୌରାଞ୍ଚଳର ତେଲିଆଗଞ୍ଜ ନଛିପୁର ସ୍କୁଲରେ ବିଦ୍ୟୁତ ଆଘାତ ଲାଗି ୨ ଛାତ୍ରଙ୍କ ସହିତ ପ୍ରଧାନଶିକ୍ଷକ ଗୁରୁତର ହୋଇଛନ୍ତି । ସପ୍ତମ ଶ୍ରେଣୀର ୨ ଜଣ ଛାତ୍ର ସ୍କୁଲ କ୍ୟାଂପସରେ ଖେଳୁଥିବାବେଳେ ପାଣି ମୋଟରରେ ଲାଗିଥିବା ତାର ସଂସ୍ପର୍ଶରେ ଆସି ଯାଇଥିଲେ । ଏହା ଦେଖି ପ୍ରଧାନଶିକ୍ଷକ ଜିତେନ୍ଦ୍ର ମହାନ୍ତି ସେମାନଙ୍କୁ ବଞ୍ଚାଇବା ଲାଗି ସେଠାକୁ ଧାଇଁ ଯାଇଥିଲେ । ଫଳରେ ସେ ମଧ୍ୟ ବିଦ୍ୟୁତ ତାର ସଂସ୍ପର୍ଶରେ ଆସି ଯାଇଥିଲେ ବି ସେ ଦୁହିଁଙ୍କୁ ବଞ୍ଚାଇବାରେ ସକ୍ଷମ ହୋଇଥିଲେ । ତେବେ ତିନି ଆହତଙ୍କୁ ପ୍ରଥମେ ସୋର ହସ୍ପିଟାଲରେ ଭର୍ତ୍ତି କରାଯାଇଥିଲା । ଏହା ପରେ ସମସ୍ତଙ୍କୁ ବାଲେଶ୍ୱର ସ୍ଥାନାନ୍ତର କରାଯାଇଛି ।

ସୂଚନା ଅନୁଯାୟୀ, ତେଲିଆଗଞ୍ଜ ପ୍ରାଥମିକ ବିଦ୍ୟାଳୟରେ ଆଜି ସ୍ୱାଭାବିକ ଭାବେ କ୍ଲାସ ଚାଲୁଥିଲା। ମଧ୍ୟାହ୍ନ ପ୍ରାୟ ୧୨ଟା ପରେ ସପ୍ତମ ଶ୍ରେଣୀର ୨ ଛାତ୍ର ସ୍କୁଲ ପରିସରରେ ଥିବା ପାଣିମୋଟର ପାଖକୁ ଯାଇଥିଲେ। ଏହି ସମୟରେ ସେଠାରେ ଥିବା ବିଦ୍ୟୁତ୍‌ ତାର ସଂସ୍ପର୍ଶରେ ସେମାନେ ଚାଲି ଆସିଥିଲେ। ବିଦ୍ୟୁତ୍‌ ଆଘାତ ପାଇ ୨ ଛାତ୍ର ଚିତ୍କାର କରିବା ସହ ଛଟପଟ ହେଉଥିଲେ।

ସେମାନଙ୍କ ଚିତ୍କାର ଶୁଣି ଅନ୍ୟ ଛାତ୍ର, ଶିକ୍ଷକ ରୁଣ୍ଡ ହୋଇ ଯାଇଥିବା ବେଳେ କେହି ସେମାନଙ୍କୁ ଉଦ୍ଧାର କରିବାକୁ ସାହସ କରୁ ନ ଥିଲେ। ଏହି ସମୟରେ ସ୍କୁଲ ପ୍ରଧାନଶିକ୍ଷକ ସେମାନଙ୍କୁ ଉଦ୍ଧାର କରିବାକୁ ଚେଷ୍ଟା କରି ଗୁରୁତର ହୋଇଛନ୍ତି।

ଗୁରୁତର ୩ ଜଣଙ୍କୁ ପ୍ରଥମେ ସୋର ମେଡିକାଲରେ ଭର୍ତ୍ତି କରାଯାଇଥିଲା। ସେଠାରୁ ସେମାନଙ୍କୁ ବାଲେଶ୍ୱର ସ୍ଥାନାନ୍ତର କରାଯାଇଛି। ପ୍ରଧାନଶିକ୍ଷକଙ୍କ ସମେତ ଜଣେ ଛାତ୍ରଙ୍କ ଅବସ୍ଥା ସଙ୍କଟାପନ୍ନ ଥିବା ଜଣାଯାଇଛି।  ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଏକ ପ୍ରକାର ଭୟର ବାତାବରଣ ଖେଳିଯାଇଛି।