Yogasana: ଯୋଗ କରିବାକୁ ଇଛା, କିନ୍ତୁ ବେଡ୍ ଛାଡି ହେଉନି; ବିଛଣାରେ କରନ୍ତୁ ଏହି ଆସନ

ସବୁ ଲୋକ ଫିଟ୍ ରହିବାକୁ ଚାହାଁନ୍ତି ସତ କିନ୍ତୁ କଠିନ ପରିଶ୍ରମ କରିବାକୁ କେହି ଚାହାଁନ୍ତି ନାହିଁ। ଯୋଗ ହେଉଛି ଶାରୀରିକ ଏବଂ ମାନସିକ ସ୍ୱାସ୍ଥ୍ୟର ଉନ୍ନତି ପାଇଁ ଏକ ପ୍ରାକୃତିକ ଉପଚାର। ସକାଳେ ଯୋଗାସନ ଅଭ୍ୟାସ କରିବା ଦ୍ୱାରା ଅନେକ ସ୍ୱାସ୍ଥ୍ୟ ଲାଭ ମିଳିଥାଏ। ଅନେକ କିନ୍ତୁ ସକାଳୁ ଶୀଘ୍ର ଉଠି ଯୋଗ କରିବାକୁ ଇଛା କରନ୍ତି ନାହିଁ।

ସେ ଅଳସୁଆମୀ ହେଉ କି ସମୟ ଅଭାବ, ଏହି କାରଣରୁ ପ୍ରାୟ ଲୋକ ଯୋଗ କରିପାରୁ ନାହାଁନ୍ତି। କିନ୍ତୁ ଆପଣ କ’ଣ ଜାଣନ୍ତି ଯେ ଆପଣ ବିଛଣାରେ ଶୋଇ ମଧ୍ୟ କିଛି ଆସନ କରିପାରିବେ?

ଏହି ଯୋଗାସନଗୁଡ଼ିକୁ ଅଭ୍ୟାସ କରିବା ପାଇଁ ଆପଣଙ୍କୁ ଆପଣଙ୍କ ବିଛଣା ଛାଡ଼ିବାକୁ ମଧ୍ୟ ପଡିବ ନାହିଁ। ନିଦରୁ ଉଠିବା ପରେ ଆପଣ ବିଛଣାରେ ଆରାମଦାୟକ ଅବସ୍ଥାରେ ଶୋଇ ଏହି ଯୋଗାସନଗୁଡ଼ିକ କରିପାରିବେ। ଏଠାରେ ତିନୋଟି ସହଜ କିନ୍ତୁ ପ୍ରଭାବଶାଳୀ ଯୋଗ ଆସନ ଦିଆଯାଇଛି ଯାହାକୁ ଆପଣ ବିଛଣାରେ କରିପାରିବେ।

ଅଧିକ ପଢ଼ନ୍ତୁ: ମେରୁଦଣ୍ଡ ଓ ଛାତିକୁ ମଜବୁତ କରିବାକୁ ଚାହାନ୍ତି କି… କରନ୍ତୁ ଏହି ୩ ଯୋଗ

ପବନମୁକ୍ତାସନ:

ସକାଳେ ନିଦ ଭାଙ୍ଗିବା ମାତ୍ରେ ବେଡ୍‌ରେ ଶୋଇ ରହି ପବନମୁକ୍ତାସନ ଅଭ୍ୟାସ କରିବା ଉଚିତ। ଏହାକୁ କରିବା ପାଇଁ, ବିଛଣାରେ ଆପଣଙ୍କ ପିଠି ପଟେ ଶୋଇରୁହନ୍ତୁ। ଦୁଇ ଗୋଡକୁ ଆଣ୍ଠୁରୁ ଭାଙ୍ଗି ଛାତି ପାଖକୁ ଆଣନ୍ତୁ। ଏବେ ଦୁଇ ହାତରେ ଆଣ୍ଠୁକୁ ଧରି ଧୀରେ ଧୀରେ ମୁଣ୍ଡକୁ ଉପରକୁ ଉଠାଇ ଆଣ୍ଠୁରେ ଲଗାଇବାକୁ ଚେଷ୍ଟା କରନ୍ତୁ। କିଛି ସେକେଣ୍ଡ ପାଇଁ ଏହି ସ୍ଥିତିରେ ରୁହନ୍ତୁ, ତା'ପରେ ଧୀରେ ଧୀରେ ସ୍ୱାଭାବିକ ସ୍ଥିତିକୁ ଫେରି ଆସନ୍ତୁ।

ପବନମୁକ୍ତାସନ

ପବନମୁକ୍ତାସନ ଅଭ୍ୟାସ କରିବା ଦ୍ୱାରା ଗ୍ୟାସ୍, ପେଟ ଫୁଲିବା ଏବଂ ବଦହଜମୀ ଭଳି ସମସ୍ୟାରୁ ମୁକ୍ତି ମିଳିଥାଏ। ପ୍ରତିଦିନ ସକାଳେ ଏହା କରିବା ଦ୍ୱାରା ପାଚନ ଶକ୍ତି ଭଲ ହୁଏ ଏବଂ ପେଟ ହାଲୁକା ଲାଗେ।

ଗୋମୁଖାସନ:

ପବନମୁକ୍ତାସନ କରିବା ପରେ ଗୋମୁଖାସନ ଅଭ୍ୟାସ କରାଯିବା ଉଚିତ। ଏହି ଆସନ ଅଭ୍ୟାସ କରିବା ପାଇଁ ବିଛଣାରେ ଆରାମରେ ବସନ୍ତୁ। ଏବେ ଡାହାଣ ଗୋଡକୁ ତଳେ ରଖି ବାମ ଗୋଡ ଏହା ଉପରେ ରଖନ୍ତୁ। ଦୁଇ ଆଣ୍ଠୁ ଉପର ତଳ ସମାନ ରଖିବାକୁ ଚେଷ୍ଟା କରନ୍ତୁ। ଏହା ପରେ ଡାହାଣ ହାତକୁ ମୁଣ୍ଡ ଉପରୁ ପଛ ଆଡକୁ ଏବଂ ବାମ ହାତକୁ ତଳେ ପଛ ପାଖରୁ ଉପର ଆଡକୁ ଆଣନ୍ତୁ। ଦୁଇ ହାତର ଆଙ୍ଗୁଠିଗୁଡ଼ିକୁ ପରସ୍ପର ସହିତ ଧରି ରଖିବାକୁ ଚେଷ୍ଟା କରନ୍ତୁ। କିଛି ସେକେଣ୍ଡ ପାଇଁ ସ୍ଥିତିରେ ରୁହନ୍ତୁ। ଏହା ପରେ ଗୋଡ ଓ ହାତ ବଦଳାନ୍ତୁ ଏବଂ ପୁନରାବୃତ୍ତି କରନ୍ତୁ।

ଗୋମୁଖାସନ

ଏହି ଆସନ କାନ୍ଧ ଏବଂ ଛାତିର ମାଂସପେଶୀକୁ ଖୋଲିଦିଏ। ଏହା ଚାପ ହ୍ରାସ କରେ ଏବଂ ଶରୀରର ଉପର ଭାଗର ସ୍ଥିତିକୁ ଉନ୍ନତ କରେ।

ଶବାସନ:

ଯୋଗ ଅଭ୍ୟାସ ଶେଷରେ ଶବାସନ ଅଭ୍ୟାସ କରନ୍ତୁ। ଏଥିପାଇଁ, ଆପଣ ପିଠି ପଟିଆ ସିଧା ଶୋଇ ପଡ଼ନ୍ତୁ ଏବଂ ଆପଣଙ୍କ ହାତ ପାପୁଲିକୁ ଉପରମୁହାଁ କରି ଶରୀରଠାରୁ ଟିକିଏ ଦୂରରେ ରଖନ୍ତୁ। ଆଖି ବନ୍ଦ କରନ୍ତୁ, ଗଭୀର ଶ୍ୱାସ ନିଅନ୍ତୁ ଏବଂ ଆପଣଙ୍କ ଶରୀରକୁ ସମ୍ପୂର୍ଣ୍ଣ ଆରାମ ଦିଅନ୍ତୁ।

ଶବାସନ

ଏହି ସ୍ଥିତିରେ ଦୁଇରୁ ପାଞ୍ଚ ମିନିଟ୍ ପର୍ଯ୍ୟନ୍ତ ରୁହନ୍ତୁ ଏବଂ କେବଳ ଆପଣଙ୍କ ଶ୍ୱାସକ୍ରିୟା ଉପରେ ଧ୍ୟାନ ଦିଅନ୍ତୁ। ଏହି ଆସନ ଅଭ୍ୟାସ କରିବା ଦ୍ୱାରା ଥକାପଣ ଦୂର ହୁଏ। ଶରୀରକୁ ଶକ୍ତି ମିଳିଥାଏ ଏବଂ ଜଣେ ମାନସିକ ଭାବରେ ସତେଜ ଅନୁଭବ କରିଥାଏ।

ସବୁଠାରୁ ମଜ୍ଜା କଥା ହେଲା ବେଡ୍‌ରେ ରହି ଏହିସବୁ ଆସନ କରିବା ପରେ ଅଳସୁଆମୀ ଦୂର ହୋଇଯାଏ। ଶରୀର ଫ୍ରୀ ହୋଇଯାଏ। ଏହା ପରେ ବେଡ୍ ଛାଡି ଆପଣ ଅନ୍ୟାନ୍ୟ କରିଛି କରିପାରିବେ।

ଅଧିକ ପଢ଼ନ୍ତୁ: କରନ୍ତୁ ଏହି ୫ ଆସନ; ଯେତେ ଗରମ ହେଲେ ବି କିଛି ଫରକ ପଡିବନି