ପିଲାମାନଙ୍କୁ ଲାଳନପାଳନ କରିବା ଛୋଟ କଥା ନୁହେଁ, ଏହା ଏକ ଆହ୍ୱାନପୂର୍ଣ୍ଣ କାର୍ଯ୍ୟ। କିନ୍ତୁ ଯଦି ବାପାମାଆମାନେ ପିଲାମାନଙ୍କର କିଛି ଅଭ୍ୟାସକୁ ଠିକ୍ ସମୟରେ ସୁଧାରି ଦିଅନ୍ତି, ତେବେ ଭବିଷ୍ୟତରେ ପିଲାମାନେ ଅଧିକ ଦାୟିତ୍ୱବାନ ଏବଂ ଆତ୍ମନିର୍ଭରଶୀଳ ହୋଇପାରନ୍ତି।
ବାସ୍ତବରେ, ଅନେକ ସମୟରେ ବାପାମାଆମାନେ ସେମାଙ୍କର ଅଜାଣତରେ ହେଉ ବା ସ୍ନେହରେ ହେଉ ଏପରି କିଛି କରିଦିଅନ୍ତି ଯାହା ପିଲାର ଅଭ୍ୟାସକୁ ଖରାପ କରିଦିଏ ଏବଂ ସେମାନେ ଜୀବନସାରା ଅଳସୁଆ ହୋଇଯାଆନ୍ତି।
Also Read
ଏଭଳି ପରିସ୍ଥିତିରେ ବାପାମାଆମାନେ ସଚେତନ ହେବା ସହ ପିଲାମାନଙ୍କୁ ଆତ୍ମନିର୍ଭରଶୀଳ ଏବଂ ପରିଶ୍ରମୀ ହେବାକୁ ସୁଯୋଗ ଦେବା ଜରୁରୀ। ଯଦି ଏହି ଅଭ୍ୟାସଗୁଡ଼ିକ ଠିକ୍ ସମୟରେ ପରିବର୍ତ୍ତନ ନ ହୁଏ, ତେବେ ଏହା ପିଲାମାନଙ୍କର ସମଗ୍ର ଜୀବନ ଉପରେ ପ୍ରଭାବ ପକାଇଥାଏ।
ଅଧିକ ପଢ଼ନ୍ତୁ: ପିଲାମାନଙ୍କୁ ଶିଖାଇ ଦିଅନ୍ତୁ ଜୀବନର ଏହି ୬ ମୂଳ ମନ୍ତ୍ର; ଦିନେ ଆପଣ ଗର୍ବ କରିବେ
ତେବେ ଜାଣନ୍ତୁ ବାପାମାଆଙ୍କର କେଉଁ ଭୁଲ୍ ଯୋଗୁଁ ପିଲାମାନେ ହୋଇଯାଆନ୍ତି ଅଳସୁଆ।
ସବୁ କାମ ନିଜେ କରିଦେବା:
ଅନେକ ବାପାଆଁ ସେମାନଙ୍କ ପିଲାମାନଙ୍କର ଛୋଟ ଛୋଟ ଆବଶ୍ୟକତାକୁ ବି ଧ୍ୟାନ ନିଅନ୍ତି ଏବଂ ସେମାନଙ୍କର ସମସ୍ତ କାମ ନିଜେ କରିଦିଅନ୍ତି। ସେମାନେ ନିଜେ କାମ କରିବାର ସୁଯୋଗ ପାଆନ୍ତି ନାହିଁ ଏବଂ ସେମାନେ ସେହି କାମ କିପରି କରିବେ ତାହା ମଧ୍ୟ ବୁଝିବାକୁ ଅସମର୍ଥ ହୁଅନ୍ତି। ଏହି ଅଭ୍ୟାସ ପିଲାମାନଙ୍କୁ ଅଳସୁଆ କରିଦିଏ। ତେଣୁ ପିଲାମାନଙ୍କୁ ଛୋଟ କାମ କରିବାକୁ ସୁଯୋଗ ଦିଅନ୍ତୁ।
ପିଲାମାନଙ୍କୁ ଫୋନ୍ ଦେବା:
ଆଜିକାଲି ବାପାମାଆମାନେ ନିଜ କାମ କରିବା ପାଇଁ ଓ ପିଲାମାନଙ୍କୁ ବ୍ୟସ୍ତ ରଖିବା ପାଇଁ ଫୋନ୍ ଦେବା ଏକ ସାଧାରଣ ଅଭ୍ୟାସ ହୋଇଗଲାଣି। କିନ୍ତୁ ଏହି ଅଭ୍ୟାସ ପିଲାମାନଙ୍କୁ ଶାରୀରିକ ଏବଂ ମାନସିକ ଭାବେ ଅଳସୁଆ କରିଦିଏ।
ଘଣ୍ଟା ଘଣ୍ଟା ମୋବାଇଲ୍ ଧରି ବସିବା ଯୋଗୁଁ ପିଲାମାନେ କେବଳ ଶାରୀରିକ ଭାବରେ ଦୁର୍ବଳ ହୁଅନ୍ତି ନାହିଁ, ସେମାନଙ୍କର ମାନସିକ କ୍ଷମତା ମଧ୍ୟ ହ୍ରାସ ପାଏ। ତେଣୁ, ପିଲାମାନଙ୍କୁ ବାହ୍ୟ କାର୍ଯ୍ୟକଳାପ କିମ୍ବା ସୃଜନଶୀଳ କାମରେ ବ୍ୟସ୍ତ ରଖନ୍ତୁ। ଯାହାଦ୍ୱାରା ସେମାନଙ୍କର ମନ ତୀକ୍ଷ୍ଣ ଏବଂ ଶରୀର ସୁସ୍ଥ ରହିଥାଏ।
ଅଧିକ ପଢ଼ନ୍ତୁ: ସ୍କୁଲ୍ ଯିବାକୁ ଆପଣଙ୍କ ପିଲା କାନ୍ଦୁଛି କି… ଏମିତି କରନ୍ତୁ, ଖୁସିରେ ଖୁସିରେ ସ୍କୁଲ୍ ଯିବ
ପିଲାକୁ ଲେବଲ୍ କରିବା:
ଅନେକ ବାପାମାଆ ନିଜ ପିଲାମାନଙ୍କୁ ଅଳସୁଆ, ଅପଦାର୍ଥ ଇତ୍ୟାଦି ନକାରାତ୍ମକ ଲେବଲ୍ ଦିଅନ୍ତି। ଏହା ପିଲାମାନଙ୍କର ଆତ୍ମବିଶ୍ୱାସକୁ ଭାଙ୍ଗିଦିଏ ଏବଂ ସେମାନେ ନିଜ ଦକ୍ଷତା ଉପରେ ବିଶ୍ୱାସ ପାଏ ନାହିଁ।
ପିଲାମାନଙ୍କୁ ସବୁବେଳେ ପ୍ରେରଣା ଦିଅନ୍ତୁ, ସେମାନଙ୍କୁ ପ୍ରଶଂସା କରନ୍ତୁ ଏବଂ ସେମାନଙ୍କୁ ବୁଝାନ୍ତୁ ଯେ ସେମାନେ ଯେକୌଣସି କାର୍ଯ୍ୟରେ ବି ସଫଳ ହୋଇପାରିବେ। ସେମାନଙ୍କୁ ଲେବଲ୍ ଦେବା ଦ୍ୱାରା ସେମାନଙ୍କର ମନୋବଳ ଭାଙ୍ଗିଯାଏ ଏବଂ ସେମାନଙ୍କୁ ଅଧିକ ଅଳସୁଆ କରିଥାଏ।
ନିଜେ ଅଳସୁଆ ହେବା:
ପିଲାମାନେ ସେମାନଙ୍କ ବାପାମାଆଙ୍କୁ ଆଦର୍ଶ ଭାବରେ ଗ୍ରହଣ କରନ୍ତି। ଯଦି ବାପାମାଆ ଅଳସୁଆ ହୁଅନ୍ତି ଏବଂ ଘରର କାମରୁ ଦୂରେଇ ରୁହନ୍ତି, ପିଲାମାନେ ମଧ୍ୟ ସେହିଭଳି ଶିକ୍ଷା ଗ୍ରହଣ କରନ୍ତି।
ପିଲାମାନେ କଠିନ ପରିଶ୍ରମ କରିବାକୁ, ସକ୍ରିୟ ଏବଂ ଉତ୍ସାହୀ ହେବାକୁ ଏକ ଆପଣ ନିଜେ ସେମାନଙ୍କ ପାଇଁ ଉଦାହରଣ ସୃଷ୍ଟି କରନ୍ତୁ। ଯେତେବେଳେ ପିଲାମାନେ ଦେଖିବେ ଯେ ସେମାନଙ୍କର ବାପାମାଆ କଠିନ ପରିଶ୍ରମ କରୁଛନ୍ତି, ସେମାନେ ମଧ୍ୟ ତାହା ହିଁ ଶିଖିବେ ଏବଂ ଅଳସୁଆ ହେବେ ନାହିଁ।
କଠିନ ପରିସ୍ଥିତିରୁ ରକ୍ଷା କରନ୍ତୁ:
ଅନେକ ସମୟରେ ବାପାମାଆ ନିଜ ପିଲାମାନଙ୍କୁ ଛୋଟ ଛୋଟ ସମସ୍ୟାରୁ ବି ରକ୍ଷା କରନ୍ତି। ସେମାନେ ନିଜେ ପିଲାମାନଙ୍କ ସମସ୍ୟାର ସମାଧାନ ଖୋଜନ୍ତି, ଯେପରି ପିଲାମାନେ ଅସୁବିଧାରେ ନ ପଡିବେ।
କିନ୍ତୁ ଏହି କାରଣରୁ ପିଲାମାନେ ଅସୁବିଧାର ସମ୍ମୁଖୀନ ହେବାର ଉପାୟ ଶିଖି ପାରନ୍ତି ନାହିଁ। ପିଲାମାନଙ୍କୁ ବେଳେବେଳେ ସଂଘର୍ଷ କରିବାର ସୁଯୋଗ ଦିଅନ୍ତୁ। ଯାହା ଦ୍ୱାରା ସେମାନେ ନିଜ ସମସ୍ୟାର ସମାଧାନ ଖୋଜିପାରିବେ ଏବଂ ଆତ୍ମନିର୍ଭରଶୀଳ ହୋଇପାରିବେ।