ପ୍ରଶ୍ନପତ୍ର ଲିକ୍ କାରଣରୁ OSSC ଜେଇ ମେନ୍ ପରୀକ୍ଷା ବାତିଲ; ଜାଣନ୍ତୁ ନୂଆ ତାରିଖ

ପ୍ରଶ୍ନପତ୍ର ଲିକ୍ କାରଣରୁ OSSC ଜେଇ ମେନ୍ ପରୀକ୍ଷା ବାତିଲ ହୋଇଛି। ଜୁନିୟର ଇଞ୍ଜିନିୟର (ସିଭିଲ୍) ମୁଖ୍ୟ ଲିଖିତ ପରୀକ୍ଷାର ପ୍ରଶ୍ନପତ୍ର ଲିକ୍ ହୋଇଥିବା ପୋଲିସ ନିଶ୍ଚିତ କରିବା ପରେ ଓଡିଶା କର୍ମଚାରୀ ଚୟନ ଆୟୋଗ (OSSC) ଜେଇ ସିଭିଲ୍ ମେନ୍ ପରୀକ୍ଷାକୁ ବାତିଲ କରିଦେଇଛି। ଏହି ପରୀକ୍ଷା ୧୬ ଜୁଲାଇରେ ଆୟୋଜିତ ହୋଇଥିଲା। ଏ ବାବଦରେ ନୋଟିସ୍‌ ଜାରି କରି କମିଶନ କହିଛନ୍ତି ଯେ ବାକେଶ୍ୱର ପୋଲିସ ଅଧୀକ୍ଷକଙ୍କ ରିପୋର୍ଟ ଆଧାରରେ ପରୀକ୍ଷା ବାତିଲ କରାଯାଇଛି।

OSSC ବିଜ୍ଞପ୍ତିରେ କୁହାଯାଇଛି ଯେ ବାଲେଶ୍ୱର ଏସ୍‌ପି ସାଗରିକା ନାଥଙ୍କ ରିପୋର୍ଟକୁ ଆଧାର କରି ଓଡିଶା କର୍ମଚାରୀ ଚୟନ ଆୟୋଗ ଏହି ପରୀକ୍ଷାକୁ ବାତିଲ କରିବାକୁ ନିଷ୍ପତ୍ତି ନେଇଛି।

ପ୍ରାର୍ଥୀମାନଙ୍କ ପାଇଁ ହୋଇଥିବା ଅସୁବିଧା ପାଇଁ କ୍ଷମା ପ୍ରାର୍ଥନା କରି ଆୟୋଗ ବିଜ୍ଞପ୍ତିରେ OSSC JE ସିଭିଲ୍ ମେନ୍ ଲିଖିତ ପରୀକ୍ଷାର ନୂଆ ତାରିଖ ମଧ୍ୟ ପ୍ରକାଶ କରିଛି। ବିଜ୍ଞପ୍ତିରେ କୁହାଯାଇଛି ଯେ JE (ସିଭିଲ୍) ର ନୂଆ ମୁଖ୍ୟ ଲିଖିତ ପରୀକ୍ଷା ୩ ସେପ୍ଟେମ୍ବରରେ କରାଯିବ।

ବାଲେଶ୍ୱର ଏସ୍‌ପି ରବିବାର ଏକ ସାମ୍ବାଦିକ ସମ୍ମିଳନୀରେ ପ୍ରଶ୍ନପତ୍ର ଲିକ୍ ଘଟଣାକୁ ନିଶ୍ଚିତ କରିଛନ୍ତି। ଏସ୍‌ପି କହିଛନ୍ତି, " ପରୀକ୍ଷା ପୂର୍ବରୁ ଜବତ ହୋଇଥିବା ପ୍ରଶ୍ନପତ୍ରଗୁଡ଼ିକ ମୂଳ ପ୍ରଶ୍ନପତ୍ର ସହିତ ମେଳ ଖାଉଛି। ଆମେ OSSC କୁ ଏହାର ସୂଚନା ଦେଇଛୁ।" ସେ କହିଛନ୍ତି ଯେ “ଏଥିରେ କୌଣସି ସନ୍ଦେହ ନାହିଁ ଯେ ପରୀକ୍ଷା ପୂର୍ବରୁ ମୁଖ୍ୟ ଲିଖିତ ପରୀକ୍ଷାର ପ୍ରଶ୍ନପତ୍ର ଲିକ୍ ହୋଇଛି।”

ଏହି ମାମଲାରେ ୯ ଜଣଙ୍କୁ ଗିରଫ କରାଯାଇଥିବା ପୋଲିସ କହିଛି। ପ୍ରଶ୍ନପତ୍ର ଲିକ୍‌ର ମାଷ୍ଟରମାଇଣ୍ଡ ଚିହ୍ନଟ କରାଯାଇଛି। ମାଷ୍ଟର୍‌ମାଇଣ୍ଡ୍‌ ହେଉଛି ଓଡିଶା ବାହାରର ଜଣେ ବ୍ୟକ୍ତି। ସେ ସ୍ୱୀକାର କରିଛନ୍ତି ଯେ ପ୍ରାର୍ଥୀଙ୍କୁ ୮ ଲକ୍ଷରୁ ୧୦ ଲକ୍ଷ ଟଙ୍କା ଦେବାକୁ କୁହାଯାଇଥିଲା।