କ୍ୱାଡର ବଳ, ଚୀନକୁ କାଳ । ଜାପାନର ଟୋକିଓରେ ଅନୁଷ୍ଠିତ କ୍ୱାଡ୍ ଶିଖର ସମ୍ମିଳନୀରେ ପୁଣି ଥରେ ମୁକ୍ତ ଇଣ୍ଡୋ ପାସିଫିକ୍ ଉପରେ ଗୁରୁତ୍ୱାରୋପ କରାଯାଇଛି । ଏହାସହ ସେଠାରେ ଚୀନର ଏକଚାଟିଆ ଦବଦବା ଜାହିର ଉଦ୍ୟମକୁ ସହ୍ୟ କରାଯିବନାହିଁ ବୋଲି ଏକସ୍ୱରରେ ମତ ଦେଇଛନ୍ତି ଚାରି ସଦସ୍ୟ ରାଷ୍ଟ୍ର ଭାରତ, ଆମେରିକା, ଜାପାନ ଓ ଅଷ୍ଟ୍ରେଲିଆ । ଏଥିସହ କୌଣସି କ୍ଷେତ୍ରରେ ବି ଏକପାଖିଆ ଭାବେ ବଳ ପ୍ରୟୋଗ କରି ସ୍ଥିତାବସ୍ଥା ପରିବର୍ତ୍ତନ ଉଦ୍ୟମକୁ ବିରୋଧ କରାଯିବ ବୋଲି ପଣ କରିଛନ୍ତି ୪ ରାଷ୍ଟ୍ରମୁଖ୍ୟ । ଏହି ଅବସରରେ କୋଭିଡ୍ ପ୍ରସଙ୍ଗରେ ଚୀନକୁ ଟାର୍ଗେଟ୍ କରିବା ସହ ମୋଦିଙ୍କ ପ୍ରଶଂସା କରିଛନ୍ତି ଆମେରିକା ରାଷ୍ଟ୍ରପତି ଜୋ ବାଇଡେନ୍ ।
କୋଭିଡ୍ ମୁକାବିଲା ପ୍ରସଙ୍ଗରେ ଆମେରିକା ରାଷ୍ଟ୍ରପତି ବାଇଡେନ୍ କହିଛନ୍ତି, ପ୍ରଧାନମନ୍ତ୍ରୀ ମୋଦିଙ୍କ ସଫଳତା ବିଶ୍ୱ ସମ୍ମୁଖରେ ଗଣତନ୍ତ୍ରର ସାମଥର୍ୟକୁ ପ୍ରମାଣିତ କରିଛି । ଗଣତାନ୍ତ୍ରିକ ପଦ୍ଧତିରେ କୌଣସି ନିଷ୍ପତ୍ତି କାର୍ଯ୍ୟକାରୀ କରିବା ପାଇଁ ଅଧିକ ସମୟ ଲାଗେ । ଚୀନ୍ ଓ ରୁଷ ଭଳି ଏକଛତ୍ରବାଦୀ ଶାସନରେ ଏଭଳି ହୁଏ ନାହିଁ ବୋଲି ଯେଉଁ ଧାରଣା ଥିଲା, ଭାରତ ତାକୁ ମଧ୍ୟ ଭୁଲ୍ ପ୍ରମାଣିତ କରିଛି ବୋଲି କହିଛନ୍ତି ବାଇଡେନ୍ । ସେ ଏହି ଉକ୍ତିକୁ କ୍ୱାଡ୍ ବୈଠକ ଅଭିଭାଷଣ ପାଇଁ ଲେଖିଆଣିନଥିଲେ ବରଂ ହଠାତ୍ ନିଜ ମନରୁ କହିଲେ ବୋଲି କୁହାଯାଉଛି ।
କ୍ୱାଡ୍ ଶିଖର ସମ୍ମିଳନୀରେ ମୁକ୍ତ ଇଣ୍ଡୋ ପାସିଫିକ୍, ଦକ୍ଷିଣ ଓ ପୂର୍ବ ଚୀନ୍ ସାଗରରୁ ବେଜିଂର ଏକଚାଟିଆ ଦବଦବା ହ୍ରାସ କରିବା ଏବଂ ଆଲୋଚନା ମାଧ୍ୟମରେ ରୁଷ-ୟୁକ୍ରେନ୍ ବିବାଦର ସମାଧାନ ପ୍ରସଙ୍ଗରେ ୪ ନେତା ସହମତି ପ୍ରକାଶ କରିଛନ୍ତି । ଏକଚାଟିଆ ଏବଂ ବଳପୂର୍ବକ କୌଣସି ସ୍ଥିତାବସ୍ଥା ପରିବର୍ତ୍ତନକୁ କ୍ୱାଡ୍ ରାଷ୍ଟ୍ର ବିରୋଧ କରନ୍ତି ବୋଲି ମତ ପ୍ରକାଶ କରାଯାଇଛି ।
ଇଣ୍ଡୋପାସିଫିକ୍ ସମେତ କୌଣସି ଅଞ୍ଚଳରେ ଏହାକୁ ମାନି ନିଆଯିବ ନାହିଁ ବୋଲି ସମସ୍ତେ ରାଜି ହୋଇଛନ୍ତି । ଏହି ଅବସରରେ ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ, କ୍ୱାଡ୍ ଖୁବ୍ ସ୍ୱଳ୍ପ ଅବଧିରେ ବିଶ୍ୱସ୍ତରରେ ନିଜର ଗୁରୁତ୍ୱ ପ୍ରତିପାଦିତ କରିପାରିଛି । କ୍ୱାଡ୍ ସଦସ୍ୟମାନେ ଟିକା ଯୋଗାଣ, ଜଳବାୟୁ ପରିବର୍ତ୍ତନର ମୁକାବିଲା, ବିପର୍ଯ୍ୟୟ ପରିଚାଳନା ଓ ଅର୍ଥନୈତିକ ସହଭାଗିତା ଆଦି କ୍ଷେତ୍ରରେ ଭାଗିଦାରୀ ପ୍ରମାଣିତ କରିଛନ୍ତି ।
କ୍ୱାଡ ରାଷ୍ଟ୍ର ସମୂହ ଇଣ୍ଡୋ-ପାସିଫିକ ଅଞ୍ଚଳର ଭିତ୍ତିଭୂମି ବିକାଶ ନିମନ୍ତେ ଆଗାମୀ ୫ ବର୍ଷରେ ୫ହଜାର କୋଟି ଡଲାର ବିନିଯୋଗ କରିବେ ବୋଲି ମଧ୍ୟ ନିଷ୍ପତ୍ତି ହୋଇଛି ।