ଘରଚଟିଆ ପାଇଁ ଘର କଲେ...ଏବେ ଆମେରିକାରୁ ଆସିଲା ଡାକରା

ଘର ଚଟିଆ ପାଇଁ ବ୍ରହ୍ମପୁରରୁ ଆମେରିକା...କଥାଟା ଶୁଣିବାକୁ ଯେତିକି ଆଶ୍ଚର୍ଯ୍ୟ ଲାଗୁଛି ଘଟଣାଟି ସେତିକି ବାସ୍ତବବାଦୀ ମଧ୍ୟ...ଗାଁ ଦାଣ୍ଡରେ କିଚିରିମିଚିରି ଶବ୍ଦ କରି ବସାକୁ ବସା ବୁଲୁଥିବା ଛୋଟ ଚଢେଇଟିଏ ହେଉଛି ଘରଚଟିଆ । ମଣିଷ ସହିତ ତା’ର ନିବିଡ଼ ବନ୍ଧୁତା । ମଣିଷ ରହୁଥିବା ଘରେ ବସା ବାନ୍ଧି ରହୁଥିବାରୁ ତାକୁ ଘରଚଟିଆ କହନ୍ତି । ହେଲେ କାହିଁ କେତେକାଳରୁ ସେହି ଚଢେଇଙ୍କର ଆଉ ଦେଖାଦର୍ଶନ ନାହିଁ । କିନ୍ତୁ ଘରଚଟିଆ କେମିତି ସୁରକ୍ଷିତ ରହିବେ ସେନେଇ ଅନବରତ ଚେଷ୍ଟା କରନ୍ତି ବ୍ରହ୍ମପୁରର ସାଗର ପାତ୍ର । ଯେଉଁଥି ଲାଗି ତାଙ୍କୁ ଆମେରିକାରୁ ଆସିଛି ଡାକରା ।

ବ୍ରହ୍ମପୁର କୁକୁଡ଼ାଖଣ୍ଡି ଗୁଣ୍ଠବନ୍ଧ ଗାଁର ଯୁବକ ସାଗର କୁମାର ପାତ୍ର । ୨୦୧୧ ମସିହାରୁ ଘର କି ଗାଁରେ ଘରଚଟିଆ ଦେଖିବାକୁ ପାଇଲେନି ସାଗର । କିନ୍ତୁ କାହିଁକି ହଠାତ୍‌ ଏଇ ଛୋଟିଆ ଚଢେଇ ଉଭାନ ହୋଇଗଲେ ସେନେଇ ଆରମ୍ଭ କରିଦେଲେ ଗବେଷଣା । ଇଣ୍ଟରନେଟ୍‌ରୁ ଜାଣିବାକୁ ପାଇଥିଲେ କେମିତି ଓ କେଉଁ ସବୁ ସ୍ଥାନରେ ଘର କରି ରୁହନ୍ତି ଘରଚଟିଆ । ବାସ୍‌ ନିଜସ୍ୱ ଉଦ୍ୟମରେ କୁତ୍ରିମ ଘର କରିବା ସହିତ ମାଟି ହାଣ୍ଡି, ପ୍ଲାଇ ବକ୍ସ, ଲାଉ ତୁମ୍ବାରେ ତିଆରି କରିଥିଲେ କୃତ୍ରିମ ଘର।

ଦେଖନ୍ତୁ ଭିଡିଓ | ସୁବ୍ରତଙ୍କ ବାଲକୋନି ଏବେ ଘର ଚଟିଆଙ୍କ ଠିକଣା

ଘରଚଟିଆଙ୍କ ପାଇଁ ଖାଲି ନିଜ ଗାଁ କି ବ୍ଲକ୍‌ ନୁହେଁ ବରଂ ପୂରା ଜିଲ୍ଲାରେ ବୁଲିବୁଲି ତିଆରି କରିଥିଲେ ଘର । ଆଉ ସେହି ଘରେ ଘରଚଟିଆମାନେ ରହିବା ସହିତ ନିଜ ବଂଶବିସ୍ତାର ବି କରୁଛନ୍ତି । ସାଗର ନିଜ ଉଦ୍ୟମରେ ଚଢେଇଙ୍କ ପାଇଁ ତିଆରି କରୁଥିବା ବସା ଦେଖିବା ପରେ ଗାଁ ଲୋକ ବି ବି ଚଢେଇଙ୍କ ଲାଗି ତିଆରି କରିଛନ୍ତି ଅନେକ ବସା । ଦୁଆର ମୁହଁକୁ ହେଉ କି ବାଡି ଦୁଆରକୁ ହେଉ...ବାହାରିବା ମାତ୍ରେ ଚଢେଇଙ୍କର କିଚିରିମିଚିରି ଶବ୍ଦ ଶୁଣି ସମସ୍ତେ ଖୁସ୍‌ ।

ଗୁରୁତ୍ୱପୂର୍ଣ୍ଣ କଥା ହେଲା, ହଜିଯାଉଥିବା ଚଢେଇ ଘରଚଟିଆଙ୍କ ପାଇଁ କୁତ୍ରିମ ଘର କରି ବେଶ୍‌ ସଫଳତା ପାଇଛନ୍ତି ସାଗର । ସେଇଥି ପାଇଁ ତ କେମିତି ଓ କେତେଦିନରେ ନିଜ ଉଦ୍ୟମରେ ସଫଳ ହୋଇଛନ୍ତି ସାଗର ତାହା ଜାଣିବାକୁ ଆମେରିକାରୁ ଏବେ ଆସିଛି ଡାକରା। ସ୍ୱପ୍ନରେ ସାଗର କେବେ ଭାବିନଥିଲେ ତାଙ୍କର ଉଦ୍ୟମ ଏତେ ସଫଳ ହେବ ଆଉ ଏଇଥି ପାଇଁ ତାଙ୍କୁ ଆମେରିକା ଯିବାକୁ ପଡିବ । କିନ୍ତୁ ବିଦେଶରୁ ଡାକରା ପାଇବା ପରେ ସାଗରକୁ ସବୁଆଡୁ ଛୁଟୁଛି ପ୍ରଶଂସାର ସୁଅ...।

(ରିପୋର୍ଟ- ଜଗନ୍ନାଥ ସାହୁ, ବ୍ରହ୍ମପୁର)