ସ୍ୱାମୀ ଚାଲିଗଲେ...ରୋଗରେ ପଡିଛି ପୁଅ : ଚିକିତ୍ସା ଲାଗି ସହାୟତା ମାଗୁଛି ମାଆ

ନୂଆପଡା ଜିଲ୍ଲା ସିନାପାଲି ବ୍ଲକ ଅନ୍ତର୍ଗତ ମଖାପଦର ଗ୍ରାମ ପଞ୍ଚାୟତର ଚଉଁରା ଗାଁର କପୁର ବନଛୋର । ବୟସର ଅପରାହ୍ନରେ ଠିଆ ହୋଇଥିବା ମହିଳାଙ୍କ ଦୁଃଖ କହିଲେ ନସରେ । ତିନିତିନିଟି ପୁଅର ମାଆ ହୋଇ ମଧ୍ୟ ସେ ଆଜି ଅସହାୟ । କାରଣ ତାଙ୍କର ବଡ଼ ପୁଅ ମାନସିକ ରୋଗୀ ହୋଇଥିବା ବେଳେ ମଝିଆ ପୁଅକୁ ବ୍ରେନ ଟ୍ୟୁମର । ସାନ ପୁଅ ଦାଦନ ଗଲେ ପରିବାର ଚଳେ। କୋଡିଏ ବର୍ଷ ତଳେ ସ୍ୱାମୀ ଦନାର ବନଛୋରଙ୍କ ମୃତ୍ୟୁ ଘଟିଲା । ଦନାର ମଖା ପଦର ଗ୍ରାମ ପଞ୍ଚାୟତରେ ପିଅନ ଭାବରେ କାର୍ଯ୍ୟ କରୁଥିଲେ । ତାଙ୍କର ମୃତ୍ୟୁ ପରେ କପୁରଙ୍କୁ ସେହି ପଞ୍ଚାୟତରେ ସଫେଇ କର୍ମଚାରୀ ପଦବୀରେ ରଖାଯାଇଛି । ଦରମା ମାସକୁ ମାତ୍ର ସାଢ଼େ ଚାରିଶହ ଟଙ୍କା । ତାହା ପୁଣି ଦୁଇ ତିନି ବର୍ଷରେ ଥରେ ମିଳେ ।

ମାସିକ ମିଳୁଥିବା ବିଧବା ଭତ୍ତା ଓ କୋଡିଏ କିଲୋ ରାସନ ହିଁ ଜୀବନ ଜିଇଁବାର ଏକମାତ୍ର ପନ୍ଥା । କପୁରଙ୍କ ବଡ଼ପୁଅ ରୂପଧର ଜନ୍ମରୁ ମାନସିକ ରୋଗୀ । ତାଙ୍କୁ ବିଭିନ୍ନ ଡାକ୍ତରଖାନାରେ ଦେଖାଇଲେ ମଧ୍ୟ ସେ ଭଲ ହେଲେନି । ମଝିଆ ପୁଅ ଭୀମସେନ ଓ ସାନ ପୁଅ ପ୍ରଦୀପ କୁଲିମଜୁରୀ କରି ପରିବାର ଚଳାଉଥିଲେ । କିନ୍ତୁ ଦଇବର ବିଧାନ ସେମାନଙ୍କ ପାଇଁ ଅଲଗା ଥିଲା ବୋଧହୁଏ । ଗତବର୍ଷ ଭୀମସେନଙ୍କ ମୁଣ୍ଡ ଭୀଷଣ ବ୍ୟଥା ହେବାକୁ ଲାଗିଲା । ତାଙ୍କୁ ଖଡ଼ିଆଳ ସ୍ଥିତ ମିଶନ ହସ୍ପିଟାଲରେ ଦେଖାଇବାରୁ ବ୍ରେନ ଟ୍ୟୁମର ହୋଇଥିବା ଜଣା ପଡିଲା ।

ସେଠାରେ ଚିକିତ୍ସା ବ୍ୟବସ୍ଥା ନଥିବାରୁ ଅନ୍ୟ ହସ୍ପିଟାଲକୁ ନେବାକୁ ପରାମର୍ଶ ଦେଇଥିଲେ କର୍ତ୍ତୃପକ୍ଷ । ଅଭାବୀ କପୁରଙ୍କ ପାଇଁ ଲୁହ ଝରାଇବା ଛଡା ଅନ୍ୟ ଉପାୟ ନଥିଲା । କାରଣ ପୁଅକୁ ଚିକିତ୍ସା କରାଇବା ପାଇଁ ଫଟା ପାହୁଲା ଟାଏ ତାଙ୍କ ପାଖରେ ନଥିଲା। କିନ୍ତୁ ତାଙ୍କୁ ସହଯୋଗ କରିବାକୁ ଆଗେଇ ଆସିଲେ ଗ୍ରାମବାସୀ । ଗାଁ ଲୋକେ ଚାନ୍ଦା କରି ରାୟପୁର ସ୍ଥିତ ବାଲାଜି ହସ୍ପିଟାଲକୁ ଭୀମସେନକୁ ନେଇ ଭର୍ତ୍ତି କରାଇଥିଲେ । ହେଲେ ସେଠାରେ ୧୫ ଦିନ ରହି ଅସ୍ତ୍ରୋପଚାର କରାଇ ଭଲ ଲାଗିବାରୁ ଘରକୁ ଫେରି ଆସିଲେ । ହେଲେ ଏବେ ପୁଣି ଥରେ ସମାନ ଅବସ୍ଥା । ବେଳେବେଳେ ସେ ମୂର୍ଚ୍ଚା ହେଉଛନ୍ତି । ଯାହାକୁ ନେଇ ଚିନ୍ତାରେ ପରିବାର ଲୋକେ । ସେପଟେ ସାନ ପୁଅ ବାହାର ରାଜ୍ୟରେ ଦାଦନ ଖଟିଲେ ପରିବାର ଚଳିବ ତେଣୁ ଏବେ କେମିତି ଓ କଣ କରିବେ ସେନେଇ ଚିନ୍ତାରେ ପରିବାର ।

କପୁରଙ୍କ ପରିବାର ପାଖରେ ସ୍ମାର୍ଟ କାର୍ଡ ଥିଲେ ବି ତାହା କେମିତି କାମ ଦେବ ସେମାନେ ଜାଣି ନାହାନ୍ତି । ତେବେ ମାସିକ ପାଉଣା ନମିଳୁଥିବାରୁ ପରିବାର ଚଳିବା ବଡ କଷ୍ଟକର ହୋଇପଡିଲାଣି । ତେଣୁ ମାଆଙ୍କୁ ନିୟମିତ କରିବା ସହ ପ୍ରତି ମାସ ଦରମା ଦେବାକୁ ପୁଅ ଭୀମସେନ ଦାବି କରିଛନ୍ତି । ସେପଟେ ଚିକିତ୍ସାକୁ ନେଇ ଗୋଷ୍ଠୀ ଚିକିତ୍ସାଧିକାରୀ କହୁଛନ୍ତି, ତାଙ୍କ ଘରକୁ ମେଡିକାଲ ଟିମ୍ ଯିବ । ଯଦି ଦରକାର ପଡିବ ତେବେ ନୂଆପଡା ବଡ ମେଡିକାଲରେ ଭର୍ତ୍ତି କରାଯାଇ ଚିକିତ୍ସା କରାଯିବ । ତେବେ ସମୟ କହିବ କେବେ ଏଇ ପରିବାରର ଦୁଃଖ ଶୁଣୁଛନ୍ତି ସରକାର ।

(ଖଡିଆଳରୁ କୁନାଲ ବେହେରାଙ୍କ ରିପୋର୍ଟ)