ଛଳ ଛଳ ଭକ୍ତପ୍ରାଣ, ଭାବବିହ୍ବଳ ଶ୍ରଦ୍ଧାଳୁ । ଗହଳ ଚହଳ ପବିତ୍ର ବଡଦାଣ୍ଡ । ନବଯୌବନ ଦର୍ଶନ ପାଇଁ କାହିଁ କେତେ ଦୂରରୁ ଧାଇଁ ଆସିଛି ଭକ୍ତଟିଏ, ଶ୍ରଦ୍ଧାଳୁଟିଏ । ଯୋଡ଼ ହସ୍ତ ସାଙ୍ଗକୁ ମନରେ କାଳିଆ ଦର୍ଶନର ଆବେଗ । ଗତ ୧୫ ଦିନ ଧରି ନିଜ ଆରାଧ୍ୟ ଦେବତାଙ୍କୁ ଦର୍ଶନ ପାଇନଥିବା ଭକ୍ତ ଶ୍ରୀମନ୍ଦିର ସିଂହଦ୍ୱାର ଆଗରେ ଅପଲକ ନୟନରେ ଚାହିଁରହିଛି । ଶ୍ରୀକ୍ଷେତ୍ରର ଭକ୍ତିମୟ ପରିବେଶ ଭକ୍ତ ଓ ଭଗବାନଙ୍କୁ କରୁଥିଲା ଏକାକାର । ଅଣସର ପରେ ଆଜି ହଜାର ହଜାର ଭକ୍ତ ଶ୍ରୀଜିଉଙ୍କ ନବଯୌବନ ଦର୍ଶନ କରିଛନ୍ତି । ଅବକାଶ, ଦଶାବତାର, ଦିଅଁ ବାହୁଡ଼ା ବିଜେ ହୋଇ ସକାଳ ୭.୧୫ରୁ ଆରମ୍ଭ ହୋଇଥିଲା ପରିମାଣିକ ଦର୍ଶନ । ଭକ୍ତମାନେ ଦକ୍ଷିଣ ଦ୍ୱାର ଦେଇ ଶ୍ରୀମନ୍ଦିରକୁ ଯାଇ ମହାପ୍ରଭୁଙ୍କ ଦର୍ଶନ କରିଥିଲେ । ମହାପ୍ରଭୁଙ୍କ ଅପାର କରୁଣାରୁ କରୋନା ଏବଂ କରୋନା ଜନିତ କଟକଣାରୁ ମୁକ୍ତି ମିଳିଥିବାରୁ ଲକ୍ଷ ଲକ୍ଷ ଶ୍ରଦ୍ଧାଳୁ ମନଭରି ଭଗବାନଙ୍କୁ ନବଯୌବନ ବେଶରେ ଦର୍ଶନ କରିଛନ୍ତି ।
ପୂର୍ବ ନିର୍ଦ୍ଧାରିତ ସମୟ ଅନୁଯାୟୀ, ଭିନ୍ନ ଭିନ୍ନ ପର୍ଯ୍ୟାୟରେ ଆଜି ସର୍ବସାଧାରଣ ଦର୍ଶନ ଜାରି ରହିଛି । ଯାହା ରାତି ସାଢ଼େ ୧୨ଟାଏଁ ଯାଏଁ ଚାଲିବ । ରାତି ପାହିଲେ ହେବ ଉଭା ଯାତ୍ରା । ମହାପ୍ରଭୁଙ୍କ ଦର୍ଶନ ସାଢ଼େ ୫ଟା ପର୍ଯ୍ୟନ୍ତ ଜାରି ରହିବ । ଏହାପରେ ଅର୍ଥାତ ଦିନକ ପରେ ହେବ ମହାପ୍ରଭୁଙ୍କ ବିଶ୍ୱବିଦିତ ଘୋଷଯାତ୍ରା । ଏଥିପାଇଁ ରଥ ନିର୍ମାଣ କାମ ମଧ୍ୟ ଶେଷ ପର୍ଯ୍ୟାୟରେ ପହଞ୍ଚିଛି । ରଥରେ ଶେଷ ସ୍ପର୍ଶ ଦେଉଛନ୍ତି ବିଶ୍ୱକର୍ମା ମହାରଣା, ଭୋଇ ସେବାୟତ, ରୂପକାର ଓ ଦରଜୀ ସେବାୟତ ।
କରୋନା ଯୋଗୁ ୨ ବର୍ଷର ବ୍ୟବଧାନରେ ଭକ୍ତ ଓ ଭଗବାନଙ୍କ ଅପୂର୍ବ ମିଳନ ହେଉଛି । ଏସବୁ ଭିତରେ କେମିତି ହେବ ଶୃଙ୍ଖଳିତ ରଥଯାତ୍ରା ଏବଂ ସୁରକ୍ଷା ବ୍ୟବସ୍ଥା, ଏଥିପାଇଁ ପୋଲିସ ବ୍ୟବସ୍ଥାକୁ ବ୍ୟାପକ କରାଯାଇଛି । ବିଶ୍ୱପ୍ରସିଦ୍ଧ ରଥଯାତ୍ରାବେଳେ ଆତଙ୍କବାଦୀ କାର୍ଯ୍ୟକଳାପକୁ ପ୍ରତିହତ ପାଇଁ ଆଜି ସ୍ପେଶାଲ୍ ଟାକ୍ଟିକାଲ୍ ୟୁନିଟ୍- ଏସଟିୟୁ ପକ୍ଷରୁ ମକଡ୍ରିଲ୍ କରାଯାଇଥିଲା । ଏହାସହ ଲକ୍ଷ ଲକ୍ଷ ଶ୍ରଦ୍ଧାଳୁଙ୍କ ସମାଗମ ଏବଂ ସମ୍ଭାବ୍ୟ କରୋନା ସଂକ୍ରମଣକୁ ଦେଖି ଜନସଚେତନତାକୁ ଗୁରୁତ୍ୱ ଦିଆଯାଇଛି । ଯେଉଁମାନେ ଆସୁଛନ୍ତି, ସେମାନେ ମାସ୍କ ପିନ୍ଧିବାକୁ କୁହାଯିବା ସହ ଥଣ୍ଡା, ଜ୍ୱର, କାଶ ହୋଇଥିବା ଲୋକଙ୍କୁ ଭିଡ଼କୁ ନଆସିବାରୁ ସ୍ୱତନ୍ତ୍ର ରିଲିଫ୍ କମିଶନର ପରାମର୍ଶ ଦେଇଛନ୍ତି ।