ଭାଷାକୁ ନେଇ ବିଦେଶରେ ବି ଉତ୍ସାହିତ ହେଲେ ଓଡ଼ିଆ

୨୦୧୪ ମସିହା ମାର୍ଚ୍ଚ ୧୧ରେ ଓଡ଼ିଆ ଭାଷାକୁ କେନ୍ଦ୍ର ସରକାର ଶାସ୍ତ୍ରୀୟ ଭାଷାକୁ ମାନ୍ୟତା ଦେଇଥିଲେ । ତେଣୁ ପ୍ରତିବର୍ଷ ମାର୍ଚ୍ଚ ୧୧ ତାରିଖରେ ରାଜ୍ୟ ବ୍ୟାପୀ ଶାସ୍ତ୍ରୀୟ ଓଡ଼ିଆ ଭାଷା ଦିବସ ପାଳନ କରାଯିବାକୁ ରାଜ୍ୟ ସରକାର ନିଷ୍ପତ୍ତି ଗ୍ରହଣ କରିଥିଲେ । ଏହି ଅବସରରେ ଆମେରିକାରେ ବାସ କରୁଥିବା ଆମେରିକୀୟମାନେ ଏକ ସମବେତ କଣ୍ଠ ସଂଗୀତ ପ୍ରସ୍ତୁତ କରିଛନ୍ତି ।

ଗୀତିକାର ଦେବୁ ପଣ୍ଡାଙ୍କ ଦ୍ୱାରା ଲିଖିତ ଗୀତକୁ ଦିଲୀପ ଆଚାର୍ଯ୍ୟ ସଂଗୀତ ନିର୍ଦ୍ଦେଶନା ଦେଇଥିଲେ । କାଲିଫର୍ଣ୍ଣିଆ ଓ ଓ୍ୱାଶିଂଟନରେ ରହୁଥିବା ୩୦ରୁ ଅଧିକ ଓଡ଼ିଆ ଏଥିରେ କଣ୍ଠଦାନ କରିଛନ୍ତି । ଗୀତ ରେକର୍ଡିଂ ସରିଥିବାବେଳେ ଆଜି ଏହାକୁ ୟୁଟ୍ୟୁବରେ ଅପଲୋଡ୍ କରାଯିବ । ଦୀର୍ଘ ବର୍ଷ ଧରି ଆମେରିକାରେ ରହୁଥିଲେ ବି ଓଡ଼ିଶାର ପାଣି ପବନ ଓ ଜନ୍ମମାଟି ପ୍ରତି ମୋହ ଅତୁଟ ରହିଥିବା ପ୍ରବାସୀମାନେ କହିଛନ୍ତି ।

ସବୁବର୍ଷ ଶାସ୍ତ୍ରୀୟ ଓଡ଼ିଆ ଭାଷା ଦିବସ ପାଳନ ଅବସରରେ ଜିଲ୍ଲା ଓ ରାଜ୍ୟସ୍ତରରେ ଉଚ୍ଚବିଦ୍ୟାଳୟ ଓ ମହାବିଦ୍ୟାଳୟସ୍ତରୀୟ ପ୍ରବନ୍ଧ ଓ ତର୍କ ପ୍ରତିଯୋଗିତା ଆୟୋଜନ କରାଯାଏ । ଓଡ଼ିଆ ଭାଷା, ଆମର ଅସ୍ମିତା ଏବଂ ଓଡ଼ିଆ ଭାଷାର ଶାସ୍ତ୍ରୀୟତାକୁ ପ୍ରତିପାଦନ କରିବା ପାଇଁ ବିଭିନ୍ନ ପ୍ରତିଯୋଗିତା ସହିତ ଜିଲ୍ଲା ଓ ରାଜ୍ୟସ୍ତରରେ ସଭାସମିତି ଆୟୋଜନ, ଆଲୋଚନା ଚକ୍ର ଓ ପୁସ୍ତକ ଉନ୍ମୋଚନ ଇତ୍ୟାଦିର କାର୍ଯ୍ୟକ୍ରମ ଆୟୋଜନ ହୁଏ । ଏପରି ଆୟୋଜନ ଫଳରେ ଓଡ଼ିଆ ଭାଷାର ଶାସ୍ତ୍ରୀୟତା ବାବଦରେ ଓଡ଼ିଶାବାସୀ ବିଶେଷ ଭାବରେ ସଚେତନ ହେବା ସହିତ ରାଜ୍ୟରେ ଓଡ଼ିଆ ପ୍ରଚଳନର ବ୍ୟାପକତା ପ୍ରତି ଉତ୍ସାହଜନକ ପରିବେଶ ସୃଷ୍ଟି କରିବାର ପ୍ରୟାସ କରାଯାଏ ।