World Hypertension Day: କାହିଁକି ବଢିଚାଲିଛି ଉଚ୍ଚ ରକ୍ତଚାପ ରୋଗୀ ସଂଖ୍ୟା

ପ୍ରତିବର୍ଷ ମେ ୧୭ରେ ‘ବିଶ୍ୱ ଉଚ୍ଚ ରକ୍ତଚାପ ଦିବସ’ ସମଗ୍ର ବିଶ୍ୱରେ ପାଳନ କରାଯାଏ, ଯାହାକୁ ‘ବିଶ୍ୱ ହାଇପର୍‌ଟେନ୍‌ସନ୍ ଦିବସ’ ମଧ୍ୟ କୁହାଯାଏ। ସମଗ୍ର ବିଶ୍ୱରେ ଅନେକ ରୋଗୀ ଉଚ୍ଚ ରକ୍ତଚାପରେ ପୀଡିତ। ଉଚ୍ଚ ରକ୍ତଚାପ ବିଷୟରେ ଲୋକଙ୍କ ମଧ୍ୟରେ ସଚେତନତାର ଅଭାବ ରହିଛି। ପ୍ରାୟତଃ ଲୋକମାନେ ଏହାକୁ ହାଲୁକା ଭାବରେ ଗ୍ରହଣ କରନ୍ତି କିନ୍ତୁ ଉଚ୍ଚ ରକ୍ତଚାପ ଅନେକ ପ୍ରମୁଖ ରୋଗର କାରଣ ହୋଇଥାଏ।

ଇତିହାସ:

୨୦୦୫ରେ ପ୍ରଥମ ଥର ପାଇଁ ‘ବିଶ୍ୱ ଉଚ୍ଚ ରକ୍ତଚାପ ଦିବସ’ ପାଳନ କରାଯାଇଥିଲା। ଏହା ବିଶ୍ୱ ଉଚ୍ଚ ରକ୍ତଚାପ ଲିଗ୍ ଦ୍ୱାରା ଆରମ୍ଭ ହୋଇଥିଲା। ୨୦୦୬ ଠାରୁ, ଏହା ପ୍ରତିବର୍ଷ ୧୭ ମେ’ରେ ପାଳନ ହେବା ଆରମ୍ଭ ହେଲା। ବଦଳୁଥିବା ଜୀବନଶୈଳୀ ସହିତ ଲୋକଙ୍କ ରକ୍ତଚାପ ଦିନକୁ ଦିନ ବୃଦ୍ଧି ପାଉଛି। ଏଭଳି ପରିସ୍ଥିତିରେ ଏହାକୁ ନିୟନ୍ତ୍ରଣ କରିବା ଅତ୍ୟନ୍ତ ଜରୁରୀ।

ଅଧିକ ପଢ଼ନ୍ତୁ: ଆପଣ ଉଚ୍ଚ ରକ୍ତଚାପରେ ପୀଡିତ କି; ଆପଣାନ୍ତୁ ଏହି ଟିପ୍ସ

ଉଚ୍ଚ ରକ୍ତଚାପ କ’ଣ:

ଜଣେ ସାଧାରଣ ବ୍ୟକ୍ତିଙ୍କ ରକ୍ତଚାପ ହେଉଛି ୧୨୦/୮୦। ଯଦି ଏହା ୧୪୦/୯୦ କିମ୍ବା ତା’ଠାରୁ ଅଧିକ ହୁଏ ତେବେ ଏହି ଅବସ୍ଥାକୁ ଉଚ୍ଚ ରକ୍ତଚାପ କୁହାଯାଏ। ବୟସ ବୃଦ୍ଧି, ଚାପ, ମେଦବହୁଳତା, ଅବ୍ୟବସ୍ଥିତ ଜୀବନଶୈଳୀ, ଭୁଲ୍ ଖାଦ୍ୟ, ଜେନେଟିକ୍ କାରଣ ମଧ୍ୟ ଲୋକଙ୍କଠାରେ ଉଚ୍ଚ ରକ୍ତଚାପ ସୃଷ୍ଟି କରେ। ରକ୍ତଚାପ ବୃଦ୍ଧି ହେତୁ ହୃଦୟ ଉପରେ ଚାପ ପଡିବା ଆରମ୍ଭ ହୁଏ, ଯାହା ସ୍ୱାସ୍ଥ୍ୟ ଦୃଷ୍ଟିକୋଣରୁ ଆଦୌ ଭଲ ନୁହେଁ।

ଅନ୍ୟ ରୋଗର କାରଣ:

ଉଚ୍ଚ ରକ୍ତଚାପ କେବଳ ନିଜ ଭିତରେ ସୀମିତ ନୁହେଁ। ଏହା ଧୀରେ ଧୀରେ ଅନେକ ରୋଗର କାରଣ ହୁଏ। ଉଚ୍ଚ ରକ୍ତଚାପର ରୋଗୀମାନଙ୍କ ପ୍ରତି ହୃଦଘାତ ଏବଂ ଷ୍ଟ୍ରୋକ୍‌ର ଆଶଙ୍କା ଥାଏ। ଏପରି ବ୍ୟକ୍ତି ସର୍ବଦା ସଚେତନ ହେବା ଉଚିତ। ଏହି କାରଣରୁ, କିଡ୍‌ନୀ ନଷ୍ଟ ହେବା ଏବଂ ଅନ୍ୟ ଅଙ୍ଗଗୁଡ଼ିକର କ୍ଷତି ହେବାର ଆଶଙ୍କା ମଧ୍ୟ ରହିଥାଏ।

କିପରି ହୁଏ ପାଳନ:

ବିଶ୍ୱ ଉଚ୍ଚ ରକ୍ତଚାପ ଦିବସରେ ଲୋକମାନକୁ ଏହା ବିଷୟରେ ସଚେତନ କରାଯାଏ। ବିଶେଷଜ୍ଞସ୍ତରୀୟ ବିଭିନ୍ନ ସେମିନାରର ଆୟୋଜନ କରାଯାଏ। ଏହି ଅବସରରେ ସ୍ୱାସ୍ଥ୍ୟ ଅନୁଷ୍ଠାନଗୁଡିକରେ ଏ ସମ୍ବନ୍ଧୀୟ ଆନୁସଙ୍ଗିକ ବିଷୟଗୁଡିକ ଉପରେ ଗୋଷ୍ଠୀ ଆଲୋଚନା କରାଯାଏ। ଏଥିରୁ ମୁକ୍ତି ପାଇବା ପାଇଁ ରୋଗୀମାନଙ୍କୁ ବିଭିନ୍ନ ଉପାୟ କୁହାଯାଏ।

ଚଳିତ ବର୍ଷର ଥିମ୍:

ପ୍ରତିବର୍ଷ ଏକ ନିର୍ଦ୍ଧିଷ୍ଟ ବିଷୟବସ୍ତୁକୁ ନେଇ ଏହି ଦିବସ ପାଳନ କରାଯାଏ। ଚଳିତ ବର୍ଷ ଏହାର ଥିମ୍ ହେଉଛି- 'ତୁମର ରକ୍ତଚାପକୁ ସଠିକ୍ ଭାବରେ ମାପ, ଏହାକୁ ନିୟନ୍ତ୍ରଣ କର ଏବଂ ଅଧିକ ଦିନ ବଞ୍ଚ'। ଚଳିତ ବର୍ଷ ବିଶ୍ୱ ସ୍ୱାସ୍ଥ୍ୟ ସଂଗଠନ ଏହି ବିଶେଷ ଥିମ୍ ମାଧ୍ୟମରେ ଉଚ୍ଚ ରକ୍ତଚାପର ବିପଦକୁ ନେଇ ଅବଗତ କରାଇବ ଏବଂ ଏହା ସହିତ ସ୍ୱଳ୍ପ ଆୟ କରୁଥିବା ପରିବାରମାନଙ୍କୁ ରକ୍ତଚାପ ପରୀକ୍ଷା ସମ୍ବନ୍ଧୀୟ ସଠିକ୍ ସୂଚନା ଦେବା ପାଇଁ ପ୍ରୟାସ କରାଯିବ।