ଅଗଷ୍ଟ ୧ ରୁ ସୁଟିଂ ହେବ ନାହିଁ ତେଲୁଗୁ ଫିଲ୍ମ। ଏମିତି କହିଛନ୍ତି ସାଉଥ୍ ନିର୍ମାତା ଗିଲ୍ଡ। ସେପର୍ଯ୍ୟନ୍ତ କୌଣସି ଫିଲ୍ମ ସୁଟିଂ ହେବ ନାହିଁ ଯେପର୍ଯ୍ୟନ୍ତ ନିର୍ମାତା ସମସ୍ୟାର ସମାଧାନ ଖୋଜି ନ ପାଇଛନ୍ତି।
କହିବାକୁ ଗଲେ ଗତ କିଛି ସପ୍ତାହ ମଧ୍ୟରେ RRR, KGF 2 ଏବଂ ଅନ୍ୟ କିଛି ଚଳଚ୍ଚିତ୍ରକୁ ଛାଡି ଗଲା ସପ୍ତାହରେ ରିଲିଜ୍ ହୋଇଥିବା ଫିଲ୍ମର ଖରାପ ପ୍ରଦର୍ଶନ କାରଣରୁ 'ଆକ୍ଟିଭ୍ ତେଲୁଗୁ ପ୍ରଡ୍ୟୁସର୍ସ ଗିଲ୍ଡ (ଏଟିପିଜି)' ବହୁତ ଚିନ୍ତିତ। ତେଣୁ ସେ ତେଲୁଗୁ ଶିଳ୍ପକୁ ପୁନର୍ଗଠନ କରିବା, ଫିଲ୍ମ ବଜେଟ୍, OTT ରିଲିଜ୍ ଏବଂ ଥିଏଟ୍ରିକାଲ୍ ରିଲିଜ୍ ସହିତ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ବିଷୟ ଉପରେ ଆଲୋଚନା କରିବାର ଲକ୍ଷ୍ୟ ନେଇ ଏଭଳି ନିଷ୍ପତ୍ତି ନେଇଛନ୍ତି।
ଜାରି କରାଯାଇଥିବା ଚିଠିରେ ପରିବର୍ତ୍ତିତ ରାଜସ୍ୱ ଏବଂ ମୂଲ୍ୟ ଉପରେ ମଧ୍ୟ ଆଲୋକପାତ କରାଯାଇଛି। ଏହି ପରିବର୍ତ୍ତନଶୀଳ ପରିସ୍ଥିତିକୁ ଦୃଷ୍ଟିରେ ରଖି ନିର୍ମାତାମାନେ ଫିଲ୍ମର ସୁଟିଂ ସେପର୍ଯ୍ୟନ୍ତ ବନ୍ଦ କରିବାକୁ ନିଷ୍ପତ୍ତି ନେଇଛନ୍ତି ଯେପର୍ଯ୍ୟନ୍ତ କୌଣସି ସମାଧାନ ନ ବାହାରିଛି। ତେଲୁଗୁ ପ୍ରଡ୍ୟୁସର ଗିଲ୍ଡ କହିଛନ୍ତି, “ଆମର ଇକୋସିଷ୍ଟମ୍ରେ ଉନ୍ନତି ଆଣିବା ଏବଂ ଆମର ଚଳଚ୍ଚିତ୍ରକୁ ଏକ ସୁସ୍ଥ ପରିବେଶରେ ରିଲିଜ୍ କରିବା ଆମର ଦାୟିତ୍ୱ। ଏହି ପରିପ୍ରେକ୍ଷୀରେ, ଗିଲ୍ଡଙ୍କ ସବୁ ନିର୍ମାତା ସ୍ୱେଚ୍ଛାକୃତ ଭାବରେ ଅଗଷ୍ଟ ୧ ରୁ ସୁଟିଂ ବନ୍ଦ କରିବାକୁ ନିଷ୍ପତ୍ତି ନେଇଛନ୍ତି।”
ଏହା କିନ୍ତୁ ସ୍ପଷ୍ଟ ହୋଇ ନାହିଁ ଯେ କେଉଁ ପ୍ରଡକ୍ସନ୍ ହାଉସ୍ ଏବଂ ଚଳଚ୍ଚିତ୍ର ଏହି ନିଷ୍ପତ୍ତି ପାଳନ କରିବେ। କିନ୍ତୁ ଅନୁମାନ କରାଯାଉଛି ଯେ ମହେଶ ବାବୁ, ଜୁନିୟର୍ ଏନ୍ଟିଆର୍ ଏବଂ ପ୍ରଭାସଙ୍କ ପରି ଅଭିନେତାଙ୍କ ଆଗାମୀ ଫିଲ୍ମର ସୁଟିଂ ଏହି କାରଣରୁ ବନ୍ଦ ହୋଇପାରେ।
ମହାମାରୀ ପରେ ତେଲୁଗୁ ଚଳଚ୍ଚିତ୍ର ଶିଳ୍ପ ଅନେକ ହିଟ୍ ଫିଲ୍ମ ଦେଇଛି। ଏହି ଶିଳ୍ପ ଆର୍ଆର୍ଆର୍ ଏବଂ ପୁଷ୍ପା: ଦି ରାଇଜ୍ ଭଳି ଫିଲ୍ମ ଦେଇଛି। କିନ୍ତୁ ଉତ୍ପାଦକ ପରିବର୍ତ୍ତିତ ରାଜସ୍ୱ ମଡେଲ ପ୍ରତି ସତର୍କ ଅଛନ୍ତି। ଜଣେ ଚଳଚ୍ଚିତ୍ର ନିର୍ମାତା କହିଛନ୍ତି ଯେ "ଆର୍ଆର୍ଆର୍, ପୁଷ୍ପା ଭଳି ବ୍ଲକବଷ୍ଟର ଫିଲ୍ମକୁ ଛାଡିଦେଲେ ରାଜସ୍ୱ ୨୦% କୁ ହ୍ରାସ ପାଇଛି। ଏନେଇ ଶିଳ୍ପର ସ୍ଥିରତା ପାଇଁ ସମସ୍ତେ ଚିନ୍ତିତ।”